Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Medqyzmetkerlerge ústemeaqy jańa ádispen tólenedi

2021 jyldyń 26 qarasha 2021 11:43

NUR-SULTAN. QazAqparat – QR Premer-Mınıstriniń orynbasary Eraly Toǵjanov koronavırýs ınfektsııasymen kúreste medıtsına qyzmetkerlerine tólengen ústemeaqynyń nelikten toqtatylǵanyn túsindirdi, dep habarlaıdy QazAqparat tilshisi.

«Memleket basshysynyń tapsyrmasyn oryndaý úshin 2020 jyldyń naýryzynan COVID-19 koronavırýs ınfektsııasymen kúres aıasyndaǵy jumysqa ústemeaqy belgilendi. Ol juqtyrý táýekeliniń deńgeıine baılanysty úsh sanatpen (1-sanat «óte joǵary táýekel» - 850 myń teńge, 2-sanat «joǵary táýekel» - 425 myń teńge, 3-sanat «ortasha táýekel» - 215,5 myń teńge) tólendi. Osy maqsatqa respýblıkalyq bıýdjetten 2020-2021jyldarǵa 250,8 mlrd teńge bólindi Búginde osy jyldyń qańtar-qyrkúıegi kezeńinde medıtsına uıymy qyzmetkerlerine ústemeaqy tolyq kólemde tólendi», - delingen Úkimet basshysy orynbasarynyń Májilis depýtattary saýalyna bergen jaýabynda.

Onyń atap ótýinshe, dárigerlerge ústemeaqy Qazaqstan, jalpy búkil álemde medıtsına pandemııamen kúreske daıyn bolmaǵan kezde engizildi. Ol ýaqytta vırýs zertelmegen, emdeý hattamasy únemi aýysyp, medıtsına qyzmetkerleri arasynda belgisiz vırýstan qorqynysh bar bolatyn. Sondyqtan olardy qosymsha yntalandyrý qajet boldy.

«Búginde ahýal ózgerdi. Qyzmetkerlerdiń vırýs táýekelderin múldem joıatyn tıimdi qorǵanys quraldary qalyptasyp, emdeý hattamasy bekitildi. Infektsııandan qorǵaıtyn senimdi vaktsınatsııa paıda boldy. Buǵan qosa, medıtsına qyzmetkerleri alǵashqylardyń biri bolyp vaktsınatsııaǵa qol jetkizdi. Qazirgi ýaqytta medıtsına qyzmetkerleriniń 99 paıyzy ekpe aldy. Búginde revaktsınatsııa júrgizilip jatyr. Ony da medıtsına qyzmetkerleri alǵashqylardyń biri bolyp alady», - dedi Eraly Toǵjanov.

Vıtse-premerdiń aıtýynsha, osyǵan baılanysty 2021 jyldyń 28 mamyrynda ótken Qazaqstan aýmaǵynda COVID-19 koronavırýs ınfektsııasynyń paıda bolýyna jáne taralýyna jol bermeý jónindegi vedmostvoaralyq komıssııa 2021 jyldyń 1 tamyzynan KVI-ge baılanysty tólenetin ústemeaqyny 50 paıyzǵa tómendetý, al 1 qazannan densaýlyq saqtaý júıesi qyzmetkerleri jalaqysyn kóterýdiń jańa ádisterin aıqyndaı otyryp alyp tastaý týraly sheshim qabyldanǵan.

«Medıtsına qyzmetkerlerin qarjylaı qoldaý jáne yntalandyrýdy jalǵastyrý maqsatynda osy jyldyń 1 qazanynan táýekel tobyna baılanysty belgili bir mamandyqtarǵa jalaqyny arttyrý is-sharalary qabyldandy. 2021 jyldyń 1 qazanyna deıin KVI-ge baılanysty buǵan deıin tólenip kelgen ústemeaqy ýaqytsha tólem bolatyn. Al jańa ádiste kózdelgen ústemeaqy qyzmetker jalaqysynyń negizgi bóligine qosylady jáne turaqty túrde tólenedi», - dedi ol.


Joǵary qaraı