Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Memleket basshysy Aqmola oblysynyń ákimi Ermek Marjyqpaevtyń esebin tyńdady

2021 jyldyń 22 shilde 2021 16:23

NUR-SULTAN. QazAqparat - Prezıdent Qasym-Jomart Toqaev Aqmola oblysynyń ákimi Ermek Marjyqpaevpen óńirdi damytýdyń ózekti máselelerin telefon arqyly talqylady. Bul týraly Memleket basshysynyń baspasóz hatshysy Berik Ýálı Facebook-tegi paraqshasynda jazdy, dep habarlaıdy QazAqparat.

Memleket basshysyna oblystyń birinshi jartyjyldyqtaǵy áleýmettik-ekonomıkalyq damý qorytyndylary baıandaldy. Negizgi kórsetkishter boıynsha ósimniń oń qarqyny bar ekeni atap ótildi.

Qasym-Jomart Toqaevqa koronavırýs indetine qarsy kúres boıynsha júrgizilip jatqan jumystar týraly málimet berildi. Oblysta vaktsına saldyrýǵa tıisti halyqtyń 49 paıyzy ekpe alǵan. Suranysqa ıe dári-dármekterdiń eki aılyq azaıtylmaıtyn qory ázirlengen.

Budan bólek oblys ákimi Prezıdentke egin egý jáne jem-shóp daıyndaý máseleleri týraly aıtty. Aýyl sharýashylyǵy daqyldary egilgen jer kólemi 5 mıllıon gektardan asady. Óńirdegi jaýyn-shashynnyń azdyǵynan Torǵaı aımaǵy (Jarqaıyń, Esil, Jaqsy aýdandary) kóbirek zardap shekti. Osyǵan baılanysty kórshiles aýdandarda birlese shóp daıyndaý jumystary uıymdastyrylady.

Sonymen qatar Ermek Marjyqpaev Memleket basshysynyń tapsyrmalarynyń oryndalý barysy týraly baıandady. Atap aıtqanda Qosshy aýylyna oblystyq mańyzy bar qala mártebesin berý jóninde, jylý elektr ortalyǵyn salý úshin áleýetti ınvestorlar izdestirip jatqanyn, sondaı-aq, sý basatyn aımaq turǵyndaryn kóshirý úshin Atbasar qalasynda 100 páterlik eki úıdiń qurylysy bastalǵanyn jetkizdi.

Elimizdegi eleýli saıası oqıǵa – aýyl ákimderin saılaýǵa daıyndyq barysyna erekshe mán berildi. Jalpy oblys boıynsha 95 ákim saılanady.

Áńgimelesý sońynda Memleket basshysy birqatar naqty tapsyrma berdi.


Joǵary qaraı