Aýa raıy
Astana -6 °S
Almaty -3 °S
valıýta baǵamy
USD 421.58
EUR 496.83
RUB 5.53
CNY 62.20

Memleket basshysy «Atameken» ulttyq kásipkerler palatasynyń VII sezine qatysty

2020 jyldyń 29 qazan 2020 18:37

NUR-SULTAN. QazAqparat – Memleket basshysy «Atameken» ulttyq kásipkerler palatasynyń VII sezine qatysty, dep habarlaıdy QazAqparat Aqordanyń baspasóz qyzmetine silteme jasap.

Qasym-Jomart Toqaev óz sózinde «Atameken» ulttyq kásipkerler palatasy bıznestiń quqyqtary men zańdy múddelerin tabysty qorǵap, kásipkerlikti qoldaý jónindegi memlekettik saıasatty júzege asyrýǵa belsendi qatysyp kele jatqanyn atap ótti. Prezıdenttiń sózinshe, búgingi kúni kásipkerlik el ekonomıkasynyń qozǵaýshy kúshine aınaldy deýge tolyq negiz bar.

– Sońǵy bes jyl ishinde shaǵyn jáne orta bıznestiń el ekonomıkasyndaǵy úlesi 24 paıyzdan 32 paıyzǵa artty. Kásipkerlik salasynda eńbek etetin azamattardyń sany 21 paıyzǵa, ıaǵnı 2,8 mıllıonnan 3,4 mıllıonǵa deıin ósti. Qazir jumyspen qamtylǵandardyń 40 paıyzǵa jýyǵy shaǵyn jáne orta bızneste eńbek etedi. Buǵan memleket pen bıznesti baılanystyryp otyrǵan Ulttyq palatanyń sińirgen eńbegi mol, – dedi Memleket basshysy.




Qasym-Jomart Toqaev Úkimet pen «Atameken» UKP-nyń úılesimdi jumysy elimizdegi bıznes ahýalǵa oń áser etip otyrǵanyn da atap ótti. Bıyl qaıta retteýdi jalǵastyrýdy, bıznes úshin rásimderdi jeńildetýdi, memlekettik qyzmet kórsetý merzimderin qysqartýdy qarastyratyn zań shyǵarý bastamalarynyń segizinshi toptamasy qabyldandy.

– Meniń tapsyrmam boıynsha kásipkerlerdiń quqyqtaryn qorǵaý úshin «bızneske adaldyq prezýmptsııasy» qaǵıdaty zań júzinde bekitildi. Bul barsha daýly jáne túsiniksiz máselelerdi kásipkerlerdiń paıdasyna sheshýge múmkindik beredi. Atalǵan zań shyǵarýdaǵy ózgerister tıisti sot tájirıbesinde qoldaý tabatynyna senemin. Osy jyldyń 1 qańtarynan bastap meniń Jarlyǵyma sáıkes shaǵyn jáne orta bıznesti úsh jylǵa deıin tekserýden bosatý týraly moratorıı kúshine endi. Nátıjesinde mundaı sýbektilerdi tekserý kólemi 8 ese qysqardy, – dedi Prezıdent.




Memleket basshysy Úkimet pen Qazaqstandaǵy bıznestiń úılesimdi jumysynyń nátıjesinde pandemııa kezinde densaýlyq saqtaý salasyndaǵy jáne ekonomıkadaǵy jaǵdaıdy baqylaı alǵanymyzdy aıtty. Shaǵyn jáne orta bızneske qoldaý kórsetý maqsatynda daǵdarysqa qarsy teńdessiz birqatar shara qabyldanyp, kásipkerliktiń 700-den astam sýbektisi salyq tóleýden bosatyldy nemese olar úshin salyq mólsherlemeleri tómendetildi. «Qarapaıym zattar ekonomıkasy» baǵdarlamasy belsendi jumys isteı bastady. Memlekettik jáne kvazımemlekettik uıymdardyń ǵımarattarynda ornalasqan shaǵyn jáne orta bıznes sýbektileri jyl sońyna deıin jalǵa alý tólemderinen bosatyldy. Sondaı-aq qatty zardap shekken sektorlar úshin bıýdjetten tys barlyq qorlarǵa aýdarymdar jiberý toqtatyldy. Asa qatty zardap shekken shaǵyn jáne orta bıznes sýbektileriniń nesıeleri jylyna 6 paıyzǵa deıingi mólsherlememen sýbsıdııalanady.

Qasym-Jomart Toqaev Úkimet pen Ulttyq bankke 2021 jylǵa arnalǵan «Jumyspen qamtýdyń jol kartasy» baǵdarlamasyn uzartýdy tapsyrdy. Bul rette, jańartylǵan baǵdarlamada birinshi kezeńdi iske asyrý barysynda anyqtalǵan kemshilikterdi eskerý qajet.

– Bul jerde óńirlerge bólinetin qarajattardy sapaly ári tıimdi bólý jóninde sóz bolyp otyr. Tikeleı maǵynasynda aqshany jelge ushyrýǵa nemese «óz» kompanııalaryna kelisimsharttardy bólip berýge jol berilmeýi tıis. Qarajattardyń bir bóligin mıkro nesıe berýge jumsaýǵa bolady. Úkimet pen Ulttyq Bank 1 jeltoqsanǵa deıin naqty usynystar berýi tıis. Ulttyq palata daǵdarysqa qarsy sharalardy ázirleý men olardy iske asyrýda birshama qoldaý kórsetkenin atap ótkim keledi. Medıtsına tilimen aıtsaq, biz birlese otyryp problemaǵa durys dıagnoz qoıyp, emdeýdiń qajetti sharalaryn qabyldaı aldyq, – dedi Prezıdent.

Qasym-Jomart Toqaevtyń aıtýynsha, pandemııa men daǵdarys Qazaqstannyń aldyna jańa mindetter qoıyp otyr. Sondyqtan memleket elimizde bıznes júrgizýdiń sharttaryn júıeli túrde jaqsartýdy jalǵastyra beredi. Prezıdenttiń tapsyrmasy boıynsha sapaly jańa retteýshilik júıe ázirlene bastady. Qoldanystaǵy barlyq baqylaý-qadaǵalaý, ruqsat berý jáne basqa da retteýshi quraldarǵa úlken ári naqty tekserýler jasalady.

– Biz quqyq qorǵaý jáne sot júıelerin reformalaýdy bastadyq. Reforma jedel, ashyq jáne tıimdi bolýy tıis. Bul jumysty ózim tikeleı qadaǵalaımyn. Mundaı kúrdeli, jabyq júıelerdi, onyń ishinde, bıznestiń quqyqtary men múddelerin qorǵaı otyryp ózgertý qajet. Sondyqtan «Atamekennen» naqty usynystar kútemin. Quqyq qorǵaý organdarynyń barsha qyzmetkerleri, ınspektordan bastap generalǵa deıin elimizde qolaıly bıznes ahýaldy qalyptastyrý jumysynyń tolyqqandy qatysýshylary ekenderin sezinýleri tıis, – dedi Memleket basshysy.

Otandyq ónim kólemin ulǵaıtý jáne qaıta óńdeý ónerkásibin qoldaý máseleleri basty nazarda bola bermek. Úkimet satyp alýdy retteý jónindegi normatıvtik-quqyqtyq bazany ózektendirýdi bastady. Kvazımemlekettik sektordy satyp alý jobasy boıynsha joba júrip jatyr. Óńdeý óndirisine shıkizat jetkizý tetikteri ázirlenýde. Otandyq ónerkásip sektory úshin jańa zańnamalyq baza daıyndalýda. Agroónerkásip keshenin damytý jónindegi ulttyq jobany ázirleý bastaldy.

– Qazir bizdiń ótkennen sabaq alatyn, aýyl sharýashylyǵynyń búgingi jaǵdaıyn jáne bolashaǵyn dálme-dál anyqtaıtyn, óz áleýetimizdi durys baǵalaıtyn múmkindigimiz bar. Aldymen pármendi sharalar men qoldaý ınstıtýttaryn aıqyndap, durys retteý ortasyn qalyptastyrý kerek. Sodan keıin ǵana qapysyz jáne basymdyqtardy jyl saıyn ózgertpeı batyl alǵa jyljýǵa bolady. Agroónerkásip kesheni boıynsha baǵdarlamalyq qujattyń ázirlenýin tikeleı qadaǵalap otyratyn bolamyn. Bul rette sheneýnikterdiń de, kásipkerlerdiń de, sarapshylardyń da pikirin tyńdaımyn. Óıtkeni aýyl sharýashylyǵynyń áleýetin kóteretin kez jetti. Olaı bolmaǵan jaǵdaıda bizdiń ekonomıkamyz úshin ókinishke uryndyratyn teris saldar oryn alýy múmkin, – dedi Prezıdent.

Qasym-Jomart Toqaev otandyq kompanııalardy belsendi túrde syrtqy naryqtarǵa shyǵýǵa shaqyrdy. Úkimetke Ulttyq kásipkerler palatasymen birlesip eksporttyq áleýeti bar salalar men kásiporyndardy anyqtaý tapsyrylǵan. Mundaı jobalarǵa qarjylandyrý jeńildigi, eksporttyq qoldaý tetikteri, zattaı grant berý sekildi keshendi qoldaý sharalary kórsetiledi. Qazaqstan keler jyly shıkizattyq emes eksporttyń kólemin 29 mıllıard dollarǵa deıin arttyrýdy kózdep otyr.

Prezıdent baıandamasynda elimizdiń ekonomıkasyn tsıfrlandyrý qarqynyn saqtaýǵa baılanysty da erekshe kóńil bólindi.

– Jaqyn arada jerge qol jetkizý sekildi kásipkerler úshin taǵy da bir mańyzdy másele sheshilýi kerek. Meniń tapsyrmam boıynsha Úkimet jer qatynastaryn tsıfrlandyrý jáne otandyq bıznestiń aýyl sharýashylyǵyna arnalmaǵan jer resýrstaryna qol jetkizýin jeńildetý jóninde zań jobasyn daıyndady. Sondaı-aq zańda jer qatynastary men sáýlet salasynda memlekettik qyzmetterdi elektrondy túrde kórsetý, jer ýchaskelerin berý merzimin 1 jyldan 20 kúnge deıin qysqartý, memlekettik aktini, jerge ornalastyrý jobasyn alyp tastaý jáne basqa da birqatar mańyzdy máseleler qarastyrylǵan. Úkimet jyl sońyna deıin atalǵan zań jobasyn Parlamentke berýi qajet, – dedi Memleket basshysy.

Qasym-Jomart Toqaev otandyq kásipkerlerdi qoldaý jáne qorǵaý el damýy úshin mańyzdy mindet ekenin aıtty. Sonymen qatar bul Prezıdenttiń saılaýaldy ýádeleri men basymdyqtarynyń biri. Sondyqtan ol ulttyq bıznesti damytýǵa árqashan basa nazar aýdarady.

– Úkimet pen basqa da memlekettik organdar bıznesti qoldaýǵa baılanysty mindetterdiń tıisinshe oryndalýyn qamtamasyz etetin bolady. Alaıda bıznes sektor da jańa talaptarǵa tez beıimdelýi kerek. Kásipkerler óz bıznesin jańǵyrtýǵa nazar aýdarýǵa tıis. Bul, eń aldymen, básekege qabiletti bolý, árqashan jańa bastamalar men jańa jobalardy iske asyrýǵa umtylý degen sóz. Sonymen birge biz tabysty ádil bólýdiń mańyzdylyǵyn da umytpaýymyz kerek. Kásipkerlerge jumys oryndaryn ashyp, tabysyn ulǵaıtýy qajet. Eń aldymen, bul memleketten qarjylaı kómek alatyn kásiporyndardyń mindeti, – dedi Prezıdent.

Sóziniń sońynda Qasym-Jomart Toqaev birlesip jumys isteý arqyly ǵana el ekonomıkasyn qalpyna keltirip, damýdyń jańa deńgeıine shyǵa alatynymyzdy atap ótti. Prezıdent «Atameken» ulttyq kásipkerler palatasy aldaǵy ýaqytta da búkil qazaqstandyq bıznes-qoǵamdastyqtyń múddelerin bildiretin bedeldi qurylym bolyp qala beretinine senim bildirdi.


Joǵary qaraı