Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Memleket basshysy Jezqazǵandaǵy daryndy balalarǵa arnalǵan mektep-ınternatqa bardy

2021 jyldyń 20 qazan 2021 14:40

NUR-SULTAN. QazAqparat - Qasym-Jomart Toqaev Qaraǵandy oblysyna jumys sapary barysynda Jezqazǵan qalasyndaǵy daryndy balalarǵa arnalǵan mamandandyrylǵan «Órken» mektep-ınternatyna bardy, dep habarlaıdy QazAqparat Aqordanyń resmı saıtyna silteme jasap.

Prezıdent zamanaýı quraldarmen jabdyqtalǵan «Órken-medıa», ólketaný, dombyra jáne art-stýdııa kabınetterin aralap kórip, pedagogtarmen jáne oqýshylarmen áńgimelesti.

– Ǵylym, bilim degen óte mańyzdy. «Bilimdi myńdy jyǵady» degen danalyq sóz bar. Bilim – qazirgi aýmaly-tókpeli zamanda eń kúshti, eń tıimdi qural. Bilimdi bolsań, barlyq qıyndyqtardy eńseresiń. Mindetti túrde. Sondyqtan bizdiń memleketimizdiń úlgili, laıyqty, abyroıly azamattary bolyńdar. Elimizdiń bolashaǵy senderdiń qoldaryńda, – dedi Memleket basshysy.




«Órken» mektep-ınternatynyń oqýshylary ólketaný kabınetinde Ulytaý óńiri men Saryarqanyń tarıhy, qasıetti oryndary týraly oqıdy. Qasym-Jomart Toqaev týǵan ólkeniń jáne qazaq halqynyń tarıhyn bilýdiń mańyzdy ekenin atap ótti.

900 oryndyq qazaq tilinde oqytatyn oqý ordasy 2020 jyly salynǵan. Mektep-ınternatta jaratylystaný jáne matematıkalyq baǵyt boıynsha kásibı baǵdarǵa negizdelgen salalyq bilim berý baǵdarlamalary oqytylady.




Bilim berý modelderin júzege asyrý úshin E.A.Bóketov atyndaǵy Qaraǵandy memlekettik ýnıversıtetimen, Ó.Baıqońyrov atyndaǵy Jezqazǵan ýnıversıtetimen jáne Jezqazǵan qalasyndaǵy tarıhı-arheologııalyq mýzeımen yntymaqtastyq ornatylǵan.

Oqýshylardyń shyǵarmashylyq áleýetin damytý úshin 4 sport sektsııasy men 6 úıirme ashylǵan.

Mektepti aralap kórý barysynda Memleket basshysyna Qaraǵandy oblysynda sapaly bilim berýdi qamtamasyz etý jóninde bergen tapsyrmalarynyń oryndalýy týraly baıandaldy.

Óńirdegi 499 mektepte 206 myńǵa jýyq oqýshy bilim alady. Onyń ishinde 21318 bala birinshi synyp oqýshylary. Mektepterdegi oryn tapshylyǵyna qatysty máseleni sheshý úshin 2022-2025 jyldary 16 mektep, onyń ishinde úsheýi memlekettik-jekemenshik seriktestik esebinen, sondaı-aq bir jeke mektep salý josparlanǵan.

Qasym-Jomart Toqaevqa aýyl mektepterin jańǵyrtý jumystary týraly málimet berildi. Bıyl óńirde 166 mektep jóndeýden ótken jáne 2025 jylǵa deıin 299 mektep jańǵyrtylady dep josparlanǵan.

Oqýshylardyń qaýipsizdigin qamtamasyz etý úshin Qaraǵandy oblysynyń barlyq bilim berý nysandarynda dabyl túımesheleri men habar berý júıeleri ornatylǵan. 300-den astam bala oqıtyn mektepterde arnaıy kúzet qyzmeti jumys isteıdi jáne týrnıketter qoıylǵan.






































Basty sózder: Aqorda, Qazaqstan Prezıdenti, Bilim,
Joǵary qaraı