Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Memleket basshysynyń atyna Jeńis kúnine oraı quttyqtaýlar kelip jatyr

2021 jyldyń 8 mamyr 2021 18:33

NUR-SULTAN. QazAqparat -Qasym-Jomart Toqaevtyń atyna Uly Jeńistiń 76 jyldyǵyna oraı shet memleketterdiń basshylarynan quttyqtaý jedelhattary kelip túsip jatyr, dep habarlaıdy QazAqparat Aqordaǵa silteme jasap.

Reseı Prezıdenti Vladımır Pýtın óziniń quttyqtaý hatynda ákelerimiz ben atalarymyzdyń, sansyz qurbandardyń erligin esimizde saqtaý, ardagerlerimizge qamqorlyq kórsetip, olarǵa árdaıym kóńil bólý bizdiń ortaq paryzymyz dep jazǵan. Vladımır Pýtın qatal soǵys jyldarynda shyńdalǵan baýyrlas dostyq pen ózara qoldaý dástúrleri Reseı men Qazaqstan arasyndaǵy strategııalyq áriptestik pen odaqtastyqtyń senimdi negizi bolyp tabylatynyn aıtqan.

Ózbekstan Prezıdenti Shavkat Mırzıeevtiń jedelhatynda 9 mamyr bizdiń halyqtarymyzdyń jeńimpaz batyrlyǵy men erligin, olardyń beıbitshilik, bostandyq jáne ózara yntymaqtastyq úshin qaharmandyq kúresin bildiretin aıtýly kún delingen.

Qyrǵyzstan Prezıdenti Sadyr Japarov bizdiń halyqtarymyzdyń ómirinde erekshe oryn alatyn Jeńis kúni máńgi erlik pen birliktiń sımvoly bolyp qala beretinin atap ótken.

Tájikstan Prezıdenti Emomalı Rahmon óziniń quttyqtaýynda 9 mamyr memleketterimizdiń qazirgi tarıhyndaǵy aıtýly data ekenine toqtalyp, bul kúni jaýǵa qarsy janqııarlyqpen soǵysqan babalarymyzdyń kózsiz erlikterin, batyldyǵy men otansúıgishtigin jáne qaısarlyǵyn eske alamyz dep atap ótken.

Túrikmenstan Prezıdenti Gýrbangýly Berdimuhamedov jedelhatynda babalarymyzdyń uly erligi máńgi umytylmaıtynyna jáne onyń eki el arasyndaǵy dostyq qatynastar men jan-jaqty yntymaqtastyqty odan ári nyǵaıtýdyń berik negizi bolatynyna senim bildirgen.

Ázerbaıjan Prezıdenti Ilham Álıev Uly Otan soǵysy jyldaryndaǵy aýyr synaqqa abyroımen tótep bergen halyqtarymyzdyń dostyq dástúri men kórsetken ózara qoldaýy eki memleket arasyndaǵy qarym-qatynastardyń odan ári damyp, nyǵaıýynyń myqty irgetasy bolatynyn jetkizgen.

Belarýs Prezıdenti Aleksandr Lýkashenko óz jedelhatynda batyr babalardyń rýhyna taǵzym etý olardyń erlikterine kórsetken qurmetimiz ekenin atap ótip, munyń ózara yntymaqtastyqty arttyrýdyń berik negizi bolatynyn jáne qazirgi álemniń syn-qaterlerine tıimdi tótep berýge múmkindik beretinin aıtqan.

Armenııa Prezıdenti Armen Sarkısıan eki el halyqtarynyń soǵys kezinde shyńdalǵan dostyǵy Armenııa men Qazaqstan arasyndaǵy baılanystardy ári qaraı damytýǵa qyzmet ete beretinine senim bildirgen.

Armenııa Premer-Mınıstriniń mindetin atqarýshy Nıkol Pashınıan óz quttyqtaýynda ortaq qaharmandarymyzdyń esimderin ulyqtaý Armenııa men Qazaqstan arasyndaǵy yntymaqtastyqty eki halyqtyń ıgiligi úshin damytýdyń basty baǵdary bolady dep senetinin aıtqan.

Jeńis kúni merekesine oraı Reseı Federatsııasy Qaýipsizdik Keńesi tóraǵasynyń orynbasary Dmıtrıı Medvedev, TMD Atqarý komıtetiniń tóraǵasy - Atqarýshy hatshysy Sergeı Lebedev, UQShU Bas hatshysy Stanıslav Zas, Eýrazııalyq ekonomıkalyq komıssııa alqasynyń tóraǵasy Mıhaıl Mıasnıkovıch, Eýrazııalyq damý bankiniń basqarma tóraǵasy Nıkolaı Podgýzov jáne Baıqońyr qalasy ákimshiliginiń basshysy Konstantın Býsygın quttyqtaý jedelhattaryn joldady.

Jedelhattar áli de tolassyz kelip túsýde.


Basty sózder: Qazaqstan Prezıdenti, Jeńis kúni,
Joǵary qaraı