Aýa raıy
Astana -17 °S
Almaty -1 °S
valıýta baǵamy
USD 421.58
EUR 496.83
RUB 5.53
CNY 62.20

Memleket basshysynyń tóraǵalyǵymen Qorǵanys mınıstrliginiń keńeıtilgen alqa májilisi ótti

2020 jyldyń 19 qarasha 2020 17:47

NUR-SULTAN. QazAqparat - Qazaqstan Prezıdenti – Qarýly Kúshterdiń Joǵarǵy Bas qolbasshysy Qasym-Jomart Toqaev Qorǵanys mınıstrliginiń keńeıtilgen alqa májilisine qatysty, dep habarlaıdy QazAqparat Aqordanyń baspasóz qyzmetine silteme jasap.

Memleket basshysynyń tóraǵalyǵymen Qorǵanys mınıstrliginiń keńeıtilgen alqa májilisi ótti.

Prezıdent jıynǵa deıin qyzmet barysynda qaza tapqan áskerı qyzmetshilerge arnap ornatylǵan «Máńgi esimizde» monýmentine gúl qoıyp, taǵzym etti.

Otyrysty ashqan Joǵarǵy Bas qolbasshy keler jyly qasterli Táýelsizdigimizge 30 jyl tolatynyn atap ótip, osy jyldar ishinde beıbit ómirimizdiń qorǵany bolǵan ulttyq áskerimiz tolyq qalyptasqanyn, elimizdiń armııasy egemendigimiz ben tutastyǵymyzdyń tiregine aınalǵanyn aıtty.

– Memleketimizdiń qorǵanys qabiletin arttyrý úshin aýqymdy jumys atqaryldy. Bul Tuńǵysh Prezıdent, Elbasy Nursultan Ábishuly Nazarbaevtyń qajyrly eńbeginiń arqasy, – dedi Prezıdent.




Qasym-Jomart Toqaev Qorǵanys mınıstrliginiń basshylyǵyn jahandyq masshtabta da, jekelegen aımaqtarda da kúrt ózgerip jatqan álemdegi ahýaldy jiti baqylap otyrýǵa shaqyrdy. Onyń sózinshe, qazirgi qaýipsizdik arhıtektýrasy daǵdarysqa ushyraǵan.

Memleket basshysy ishki tolqýlar, tóńkerister eldiń tutastyǵyna sózsiz áser etedi dep sanaıdy. Oǵan Brest bitiminen bastap Qap taýyndaǵy sońǵy jaǵdaılarǵa deıingi tarıhtyń jańa paraqtary kýá.

– Mundaı jaǵdaıda memlekettiń egemendigi men tutastyǵynyń jalǵyz kepili – Qarýly Kúshter. Elimizdi syrtqy qaýip-qaterden qorǵap turǵan áskerı qyzmetshilerdi memleket árdaıym qoldaıdy. Prezıdent jáne Joǵarǵy Bas qolbasshy retinde qorǵanys salasyna erekshe kóńil bóleýdi óz jumysymnyń basym baǵyty retinde sanaımyn, – dedi Qasym-Jomart Toqaev.

Memleket basshysy Qorǵanys mınıstrligi sońǵy jyldary áskerı josparlaý qujattaryn daıyndaý boıynsha aýqymdy jumys atqarǵanyn atap ótti. Bul armııa men memlekettik organdardyń syrtqy qaýip-qaterge qarsy maqsatty túrde daıyndyq júrgizýine múmkindik bergen.




Prezıdenttiń pikirinshe, osyǵan deıin qol jetken jetistikterdi saqtaý úshin Qarýly Kúshterdiń qyzmetindegi birqatar basymdyqqa kóńil bólý qajet.

Atap aıtqanda, áskerdegi moraldyq-psıhologııalyq ahýaldy jáne sarbazdardyń jaýyngerlik rýhyn kóterý asa mańyzdy.

– Qorǵanys mınıstrligine múddeli organdarmen birlesip, 2021 jylǵy 1 qarashaǵa deıin Qarýly Kúshterdegi, basqa da áskerler men áskerı qurylymdardaǵy ıdeologııalyq jumystardyń tujyrymdamasyn ázirleýdi tapsyramyn, – dedi Qasym-Jomart Toqaev.

Sonymen qatar ol áskerılerdi áleýmettik-quqyqtyq turǵydan qorǵaý máselesine toqtaldy. Prezıdent kelesi jyldan bastap kúshtik qurylymdarǵa arnalǵan azyq-túlikke bólinetin qarjy kólemi artatynyn, aldaǵy 3 jyl ishinde áskerı qyzmetshilerge beriletin qarjylaı tólemdi ortasha eseppen 30 paıyzǵa kóbeıtý týraly sheshim qabyldanǵanyn habarlady.

Joǵarǵy Bas qolbasshy armııanyń áskerı mashyǵyn udaıy shyńdap otyrý kerek ekenin aıtty. Qasym-Jomart Toqaev bıyl ótken áskerı jattyǵýlarda qazaqstandyq áskerıler joǵary daıyndyǵyn kórsetip, bitimgerlik mıssııalarǵa qatysýǵa ázir ekenin atap ótti. Osyǵan oraı Qorǵanys mınıstrligine múddeli memlekettik organdarmen birlesip 2021 jyldyń 1 tamyzyna deıin Qazaqstan Qarýly Kúshteriniń BUU bitimgerlik operatsııalaryna qatysýyn keńeıtý jónindegi Jol kartasyn ázirleýdi mindettedi.




Memleket basshysy óziniń tapsyrmasy boıynsha Beırýt portyndaǵy jarylystyń saldaryn joıý kezinde Lıvan halqyna kórsetken kómekteri úshin Qarýly Kúshterdiń áskerı dárigerlerine rızashylyǵyn bildirdi. Sondaı-aq Qasym-Jomart Toqaev koronavırýspen kúres kezinde ózderine júktelgen jaýapty mindetti abyroımen atqarǵan barlyq áskerı qyzmetshilerge alǵys aıtty.

Prezıdent qazaqstandyq armııanyń eń ozyq tsıfrlyq tehnologııalarmen jáne quraldarmen jabdyqtaýdyń mańyzdy ekenin eskertti. Bul máseleni sheshý úshin Memleket basshysy Qorǵanys mınıstriniń tsıfrlandyrý jónindegi orynbasary qyzmetin engizý týraly sheshim qabyldady. Budan bólek Qasym-Jomart Toqaev 2021 jyldyń 1 qarashasyna deıin Áskerı baǵyttaǵy birtutas aqparattyq-kommýnıkatsııalyq ınfraqurylym operatoryn qurýdy tapsyrdy.




Memleket basshysy áskerı qurylymdardy qazirgi syn-qaterlerdi eskere otyryp zamanaýı qarý-jaraqpen qamtamasyz etýdiń birqatar basymdyǵyn atady. Prezıdent áýe qorǵanysyn kúsheıtý, ásker túrleriniń radoıoelektrondy kúres elementterin damytý, áskerdiń jedel áreket etý áleýetin kóterý maqsatynda áskerı-transporttyq avıatsııa parkin arttyrý baǵyttaryna basymdyq berdi.

Qasym-Jomart Toqaev armııa memleketimizdiń tiregi, egemendiktiń kepili ekenin jáne árbir qazaqstandyq sarbaz ben sardar qasterli Táýelsizdigimizdi kúzetip turǵanyn udaıy esinde ustaýǵa tıis ekenin aıtty.

Alqa májilisinde Qorǵanys mınıstri Nurlan Ermekbaev Prezıdentke Qarýly Kúshterdi damytýdyń qorytyndylary, sondaı-aq, mınıstrliktiń strategııalyq baǵyty jóninde esep berdi.

Sonymen qatar «Ońtústik» óńirlik qolbasshylyǵy áskeriniń tank brıgadasynyń komandıri Tabyldy Isalıev pen «Ońtústik» óńirlik qolbasshylyǵy áskeri 66597 áskerı bóliminiń vzvod serjanty Azat Shaıhy baıandama jasady.

Jıynnan keıin Prezıdent eldiń Qarýly Kúshteriniń quramyndaǵy radıoelektrondy kúres júrgizýge arnalǵan zamanaýı joǵary tehnologııalyq qural-jabdyqtardyń úlgilerimen tanysty.




























Joǵary qaraı