Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Memleket fermerlerdiń ekinshi deńgeıli bankterden alatyn nesıesin kepildendiredi

2021 jyldyń 5 mamyr 2021 09:36

NUR-SULTAN. QazAqparat - Aýyl sharýashylyǵy mınıstrligi ekinshi deńgeıli bankter agrobızneske uzaq merzimdi nesıe bergende qandaı baǵyttar memlekettik kepildendirýge jatatynyn habarlady.

QR Aýyl sharýashylyǵy mınıstrligi ekinshi deńgeıli bankterden nesıe rásimdeıtin fermerler úshin «Aýyl sharýashylyǵyn qarjylaı qoldaý qory» AQ arqyly nesıelerdi memlekettik kepildendirý mehanızmi 2020 jyldan beri iske asyrylyp kele jatqanyn eske salady.

Fermerlerdi qoldaýdyń jańa formasy ekinshi deńgeıli bankterdi aýyl sharýashylyǵyn nesıeleýge yntalandyrý, bankterdiń nesıelik táýekelderin azaıtý jáne agrarlyq salany qarjylandyrýdyń tartymdylyǵyn arttyrý úshin engizildi.

Aýyl sharýashylyǵy taýaryn óndirýshiler – ekinshi deńgeıli bank nesıesiniń kómegimen ınvestıtsııalyq jobalardy iske asyrýdy josparlaǵan jeke kásipkerlik sýbektiler (AQ, JShS, ShQ, FQ jáne t.b.) kepildik berý júıesine qatysa alady.

Shart boıynsha, jyldyq syıaqy mólsheri 17%-dan aspaıtyn 5 mlrd teńgege deıingi nesıeni 10 jylǵa deıingi merzimge alatyn fermerlerge kepildik berý kózdelgen. Kepildendirý komıssııa kepildik mólsheriniń 30%-yn quraıdy, onyń 29,9% - yn memleket (jergilikti atqarýshy organ), al 0,1% - yn aýyl sharýashylyǵy taýaryn óndirýshi tóleıdi.

Kepildendirý mólsheri – negizgi qaryz somasynyń 50%-na deıin (biraq 1,5 mlrd teńgeden aspaýy tıis).

Jobany iske qosqanǵa deıin basym ınvestıtsııalyq jobalar boıynsha kepildik mólsheri – 85% (biraq 2,55 mlrd teńgeden aspaýy tıis). Joba paıdalanýǵa berilgennen keıin kepildik mólsheri standartty sharttarǵa deıin tómendetiledi.

Kepildik Agroónerkásip keshenindegi qyzmettiń barlyq túrleri boıynsha, sondaı-aq tamaq ónimderin óndirý qyzmetiniń ınvestıtsııalyq jobalaryn iske asyrýǵa beriledi.

Budan basqa, kepildik berý sheńberinde mynadaı basym ınvestıtsııalyq baǵyttar bar:

- taýarly sút fermalary;

- etti qus sharýashylyǵy;

- qarqyndy baq;

- jylyjaılar;

- qant qyzylshasyn ósirý jáne qyzylsha qantyn óndirý;

- jarma óndirisi;

- kókónister men jemisterdi qaıta óńdeý;

- ósimdik maıy men maı ónimderin óndirý.


Basty sózder: Ekonomıka, Qarjy, Aýyl sharýashylyǵy,
Joǵary qaraı