Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Memleket jalǵa alynǵan baspana qunynyń 50% ótep beredi - mınıstrlik sharttaryn ázirledi

2022 jyldyń 27 qańtar 2022 11:00

NUR-SULTAN. QazAqparat –Qazaqstandyqtar jalǵa alatyn baspana qunynyń teń jartysy memleketten óteletin bolady. Bul týrly QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat.

Mınıstrlik turǵyn úıdi jalǵa alǵany úshin tólem berý tetigin ázirledi. Ataýly turǵyn úı kómegi jalǵa alý qunynyń «50% memleket, qalǵan 50% jalǵa alýshy tóleıdi» qaǵıdatyna negizdeledi.

Mundaı tólemder jergilikti atqarýshy organdarda kezekte turǵan azamattarǵa beriledi jáne olardyń tabysy eń tómengi kúnkóris deńgeıiniń 1 eselengen kóleminen aspaýy kerek.

«Búgingi tańda elimizde mundaı 70 myń jan bar. Olar: kópbalaly otbasylar, 1 jáne 2-toptaǵy múgedekter, múgedek balalar jáne ata-anasynyń qamqorlyǵynsyz qalǵan balalar. Osy sanattaǵy azamattarǵa jalǵa beriletin turǵyn úı qunynyń jartysyn taǵaıyndaý kózdeledi. Operator retinde «Otbasy bankin» anyqtaý usynyldy», - delingen mınıstrlik aqparatynda.

Ótinish berýshiler úshin mynandaı negizgi talaptar qoıylady:

1) Qazaqstan Respýblıkasynyń azamaty bolýy;

2) otbasynyń (azamattyń) árbir múshesine shaqqandaǵy sońǵy 6 (alty) aıdaǵy jıyntyq tabysy tıisti qarjy jylyna arnalǵan respýblıkalyq bıýdjet týraly Zańmen bekitilgen eń tómen kúnkóris deńgeıiniń 1 eselengen shamasynan aspaýy;

3) «Turǵyn úı qatynastary týraly» Zańǵa sáıkes baspanaǵa muqtaj retinde esepke qoıylyp, turǵyn úıge muqtaj mártebesin alýy;

4) turǵyn úıdiń menshik ıesi men jalǵa alýshy arasynda jasalǵan, sondaı-aq quqyqtyq kadastrda tirkelgen sharttyń bolýy.

Eske salaıyq, baspanaǵa asa muqtaj azamattarǵa qaıtalama naryqta baspanany jalǵa alǵany úshin tólem taǵaıyndaý tapsyrmasyn Memleket basshysy Qasym-Jomart Toqaev bergen bolatyn.

25 qańtarda QR Úkimeti onyń tetikterin ázirleýdi Indýstrııa jáne ınfraqurylymdyq damý mınıstrligine júktep, Qaýly qabyldady.


Joǵary qaraı