Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Memlekettik basqarý deńgeıleri arasynda quzyretter qaıta bólinedi

2021 jyldyń 28 qazan 2021 10:23

NUR-SULTAN. QazAqparat – Senattyń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik basqarý deńgeıleri arasynda ókilettikterdi qaıta bólý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasynyń qabyldaý maqsaty – ol memlekettik basqarý deńgeıleri arasynda quzyretterdi odan ári qaıta bólip, onyń ázirleýi aldyńǵy ákimshilik reformalardyń jalǵasy bolady. Joba, Memleket basshysynyń tapsyrmalaryn, strategııalyq qujattarda jáne sarapshylardyń usynymdarynda aıqyndalǵan basymdyqtardy eskere otyryp daıyndaldy.

«Ony ázirleý kezinde ortalyq jáne jergilikti deńgeılerdegi memlekettik fýnktsııalardy taldaý boıynsha aýqymdy jumys júrgizildi. Zań jobasynda 46 zańnamalyq aktige, onyń ishinde 2 kodeks pen 44 zańǵa túzetýler kózdelip otyr. Zań jobasy sheńberinde 68 fýnktsııa qaıta bólinedi, onyń ishinde Úkimetten mınıstrlikterge 63 fýnktsııa beriledi, jergilikti atqarýshy organdarǵa 5 fýnktsııa beriledi. Sonymen qatar, 4 memlekettik organǵa (EGTRM, ІІM, TsDIAÓM, Qorǵanysmıni) qosymsha ókilettikter beriledi», - dedi QR Ulttyq ekonomıka mınıstri Áset Erǵalıev.

Onyń aıtıýynsha, jalpy, zań jobasyn qabyldaý memlekettik basqarýdyń tıimdi júıesin qalyptastyrýda kezekti qadam bolady jáne onyń derbestigin odan ári arttyrýǵa yqpal etedi.

«Zań jobasy basqarý deńgeıleri arasyndaǵy naqty quzyretterin ajyratý boıynsha júrgizilip jatqan saıasattyń sabaqtastyǵyn qamtamasyz etýge baǵyttalǵan. Jobany iske asyrý memlekettik bıýdjetten qosymsha qarjy shyǵyndaryn talap etpeıdi jáne teris áleýmettik-ekonomıkalyq jáne quqyqtyq saldarǵa ákep soqpaıdy», - dedi mınıstr.

Óz kezeginde Senattyń Ekonomıkalyq saıasat, ınnovatsııalyq damý jáne kásipkerlik komıtetiniń múshesi, depýtat Lázzát Rysbekova zań jobasymen Qazaqstan Respýblıkasynyń 46 zańnamalyq aktige, sonyń ishinde Bıýdjettik jáne Qylmystyq atqarý kodeksterine ózgerister men tolyqtyrýlar engizý kózdelgenin aıtty.

Budan bólek, zań jobasymen Jergilikti atqarýshy organdardyń deńgeıine Bilim jáne ǵylym, Indýstrııa jáne ınfraqurylymdyq damý, Aýyl sharýashylyǵy mınıstrlikteriniń keıbir fýnktsııalaryn berý qarastyrylǵan.

«Sondaı-aq, Ekologııa, geologııa jáne tabıǵı resýrstar, Qorǵanys, Іshki ister, Tsıfrlyq damý, ınnovatsııalar jáne aeroǵarysh ónerkásibi mınıstrlikteriniń keıibir máselelerde ókilettikterin kúsheıtý maqsatynda birqatar qosymsha fýntsııalar beriledi», - dedi L. Rysbekova.


Joǵary qaraı