Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Memlekettik qaryz boıynsha qarajatty ıgermegeni úshin jaýapkershilik engiziledi - mınıstr

2021 jyldyń 21 sáýir 2021 10:12

NUR-SULTAN. QazAqparat – Qaryzǵa alǵan qarajatty belgilengen merzimde ıgermegeni úshin jaýapkershilik engiziledi. Bul týraly Parlament Májilisiniń jalpy otyrysynda bıýdjet zańnamasyn jetildirý týraly qujatty qaraý kezinde Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

«Memlekettik qaryz alýdy jetildirý aıasynda qaryzǵa alǵan qarajatty belgilengen merzimde ıgermegeni úshin jaýapkershilik engiziledi. Sonymen qatar, jergilikti atqarýshy organdarǵa úshinshi tulǵalar úshin boryshtyq mindettemelerdi qabyldaýǵa tyıym salynady», - dedi mınıstr.

Onyń aıtýynsha, zań jobasynda naqtylaý sıpatyndaǵy túzetýler de kózdelgen.

«Respýblıkalyq bıýdjetti naqtylaý jaǵdaılary aıqyndalatyn bolady. Áleýmettik-ekonomıkalyq damý boljamynyń mazmunyn naqtylaý kózdeledi. Zań jobasyn qabyldaý, bıýdjettik rásimderdi jetildirýge jáne bıýdjetti atqarý sapasyn arttyrýǵa múmkindik beredi», - dedi Áset Erǵalıev.

Budan buryn habarlanǵandaı, Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.

Qujatta bıýdjettik táýekelder men memlekettik qarjynyń turaqtylyǵy týraly esepti jyl saıyn Parlamentke respýblıkalyq bıýdjettiń jobasymen engizý usynyldy.


Avtor Rýslan Ǵabbasov
Basty sózder: Parlament, Qarjy, Ekonomıka,
Joǵary qaraı