Memlekettik rámizderdiń 30 jyldyǵyna oraı qandaı sharalar ótetini pysyqtaldy
NUR-SULTAN. QazAqparat - Qazaqstan Respýblıkasynyń Memlekettik hatshysy Erlan Karınniń tóraǵalyǵymen Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııanyń otyrysy ótti, dep habarlaıdy Aqorda.
Jıynda Mádenıet jáne sport mınıstri Dáýren Abaev Qazaqstan Respýblıkasy Memlekettik rámizderiniń 30 jyldyǵyna oraı ótetin negizgi is-sharalar jaıynda baıandap, uıymdastyrý-daıyndyq jumysy jáne josparǵa saı ótetin mádenı-kópshilik sharalar týraly aıtty.
Sonymen qatar otyrysta Nur-Sultan qalasy, Qyzylorda jáne Aqtóbe oblystarynyń ákimderi memlekettik rámizderdi paıdalaný, qoldaný jáne nasıhattaý jóninde baıandama jasady.
Óz kezeginde Memlekettik hatshy Prezıdent Qasym-Jomart Toqaevtyń tapsyrmasy boıynsha 2020 jyly Memlekettik rámizdi paıdalanýǵa qatysty quqyqtyq aktiler lıberalızatsııa baǵytyna ózgergenin atap ótti.
Osy oraıda Erlan Qarın Memlekettik rámizderdi, atap aıtqanda, Memlekettik Týdy keńinen qoldanýǵa qatysty máseleni pysyqtaýdy tapsyrdy.
Komıssııa tóraǵasy Memlekettik rámizderdiń qoǵamdy biriktiretinin aıtyp, elimizdiń ajyramas bóligi jáne Táýelsizdigimizdiń bet-beınesi ekenine toqtaldy.
Komıssııa otyrysynyń qorytyndysy boıynsha memlekettik organdarǵa Memlekettik rámizderdiń 30 jyldyǵyna oraı ótetin jalpy respýblıkalyq is-sharalardy sapaly ótkizýge qatysty birqatar tapsyrma berildi.
