Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Munaı-gaz salasynda taýarlardy satyp alý negizgi 3 operatorǵa tıesili

2022 jyldyń 13 mamyr 2022 14:56

NUR-SULTAN. QazAqparat – Elimizde munaı-gaz salasynda taýarlardy satyp alýdyń basym bóligin úsh operator iske asyryp keledi. Bul týraly QR Energetıka mınıstri Bolat Aqsholaqov málim etti, dep habarlaıdy QazAqparat tilshisi.

«Elimizdiń munaı-gaz salasyndaǵy atqarylatyn jumystar men qyzmetterge qarajat bólýdiń, sondaı-aq taýarlardy satyp alýdyń 75 paıyz kólemi úsh iri operatorǵa, ıaǵnı Teńizshevroıl, Qarashyǵanaq Petrolıým Opereıtıng B.V jáne «Nort Kaspıan Opereıtıng Kompanı N.V-ǵa tıesili. Atalǵan operatorlardyń qazaqstandyq jobalardy iske asyrýy munaı-gaz jabdyqtaryna joǵary suranysty kórsetip otyr. Osyǵan baılanysty Energetıka mınıstrligi atalǵan úsh iri operatorda jergilikti qamtý úlesin, onyń ishinde mashına jasaý ónimderi segmentin ulǵaıtý máselelerine erekshe nazar aýdarady», - dedi B. Aqsholaqov elordada munaı-gaz mashına jasaý salasyn damytýǵa arnalǵan forýmda.

Osy oraıda ol sońǵy eki jylda pandemııa men jahandyq ekonomıkadaǵy máseleler aıasynda otandyq mashına jasaýshylar kúrdeli jaǵdaıǵa tap bolǵanyn aıtty.

«2021 jyly TShO, NKOK jáne QPO operatorlary atqarylǵan jumystar men qyzmetterge qarajat bólý baǵytynda, sondaı-aq taýarlardy satyp alý boıynsha 3,5 trln teńge ıgerdi. Onyń ishinde jergilikti qamtý úlesi 2 trln teńgege jýyq qarjyny nemese 54 paıyzdy qurady. Ótken jyly úsh iri operatordyń taýar satyp alýynyń jalpy kólemi 310 mlrd teńgege jetti. Bul turǵyda qazaqstandyq qamtý úlesi tek 9 paıyz shamasynda boldy», - mınıstr.

Onyń paıymynsha, osy ahýaldy ózgertý úshin barlyq múddeli tarap, sonyń arasynda ken oryndarynyń operatorlary men otandyq mashına jasaýshylar jáne bıznes-qoǵamdastyq tıisti qadamdardy jasaýy kerek.


Joǵary qaraı