Mysyrdan ushyp kelgen qazaqstandyqtan koronavırýs anyqtaldy
NUR-SULTAN. QazAqparat – 30 qarashada Qazaqstan Respýblıkasynyń aýmaǵyna Mysyr, BAÁ, Túrkııa, RF jáne Belarýs Respýblıkasynan 9 halyqaralyq áýe reısi keldi. Bul týraly QazAqparat QR Densaýlyq saqtaý mınıstrliginiń Sanıtarlyq-epıdemıologııalyq baqylaý komıtetine silteme jasap habarlaıdy.
Áýejaıǵa kelgen 1 169 jolaýshynyń 960-ynda PTR-testileýdiń teris nátıjesi bar anyqtamalar bolǵan. Anyqtamasy joq 209 adam keldi, olardyń barlyǵy – QR azamattary.
Onyń ishinde:
- Almaty qalasynyń áýejaıyna – 4 reıs, 762 jolaýshy keldi (anyqtamasy bar - 616, anyqtamasy joq – 146).
- Nur-Sultan áýejaıyna – 4 reıs, 285 jolaýshy (anyqtamamen – 234, anyqtamasyz – 51), - Aqtaý qalasynyń áýejaıyna – 1 reıs, 122 jolaýshy (anyqtamamen - 110, anyqtamasyz – 12) kelgen.
«Anyqtamasy joq Qazaqstan azamattary kelgen jeri boıynsha karantındik statsıonarlarǵa jiberildi jáne PTR-taldaý ádisimen COVID-19-ǵa test júrgizildi. PTR-taldaý nátıjesi boıynsha Mysyrdan ushyp kelgen bir qazaqstandyqtan koronavırýs ınfektsııasy tabyldy.
Odan basqa, Mınskiden áýe reısimen kelgen Moldova men Qyrǵyzstan azamattary merzimi ótken PTR-anyqtamalardy usynǵany úshin Nur-Sultan qalasynyń áýejaıynan keri qaıtaryldy», - delingen aqparatta.
