Aýa raıy
Astana 10 °S
Almaty 10 °S
valıýta baǵamy
USD 421.58
EUR 496.83
RUB 5.53
CNY 62.20

Naryqty monopolısterden tazalaý kerek - Qasym-Jomart Toqaev

2020 jyldyń 25 qyrkúıek 2020 18:15

ALMATY. QazAqparat - Memleket basshysy Qasym-Jomart Toqaev Almatyda jeńil avtomobılder shyǵaratyn qazaqstandyq «Hyundai Trans Kazakhstan» zaýytynyń iske qosylýǵa daıyndyǵyn tekserdi, dep habarlaıdy QazAqparat Aqordaǵa silteme jasap.

Prezıdent avtomashınalardy qurastyrý protsesimen tanysyp, 2020 jylǵy 15 qazanda ashylady dep josparlanyp otyrǵan usaqtorapty qurastyrý ádisimen avtomobılder shyǵarýǵa arnalǵan jańa tsehty aralap kórdi.

Memleket basshysyna jobanyń Almaty qalasynyń ındýstrııalyq aımaǵyndaǵy memlekettik qurylymdardyń qoldaýymen júzege asyrylyp jatqany týraly baıandaldy. Kásiporyn paıdalanýǵa berilgennen keıin onyń qýaty birinshi kezeńde jylyna 30 myń, ekinshi kezeńde 45 myńǵa deıin mashına jasaýǵa jetedi. Investıtsııanyń jalpy kólemi – 28 mıllıard teńgeden astam, onyń 30% – kompanııanyń óz qarajaty. Hyundai Trans Kazakhstan kásiporny 700-ge jýyq jumys ornyn ashyp, sabaqtas salalardyń damýyna serpin beredi.










Investorlar keleshekte avtobólshekter shyǵaratyn zaýyt salýdy josparlap otyr. Osylaısha kompanııa otandyq avtokólik ónerkásibin damytý jónindegi kózdegen maqsattaryna qol jetkizedi. Bul otandyq óndiristiń 51 % astamyn qamtamasyz etedi.

Memleket basshysy nysandy aralap kórgennen keıin ındýstrııalyq aımaq rezıdentterimen jeke kásipkerlikti qoldaý jáne kásiporynnyń basym salalaryn damytý máselelerin talqylady.

«Men óz Joldaýymda elimizdegi kásipkerlikti damytýǵa erekshe mán berdim. Ásirese, bıznestiń, kásipkerliktiń damýyna memlekettik organdar tarapynan keltiriletin kez kelgen kedergi elimizge qarsy jasalǵan qylmys retinde qaralatynyna arnaıy toqtaldym. ıAǵnı, basqasha aıtqanda, Úkimet, jergilikti atqarýshy organdar kásipkerlikti damytýǵa jan-jaqty qoldaý kórsetýge tıis. Bul – ekonomıkalyq saıasatymyzdaǵy negizgi baǵyt», – dedi Prezıdent.




Qasym-Jomart Toqaev elimizdiń ekonomıkasyndaǵy ahýal pandemııa saldarynan áli de kúrdeli ekenin jáne bul daǵdarystan memleket pen bıznestiń birlesken kúsh-jigeriniń arqasynda ǵana shyǵýǵa bolatynyn atap ótti. Básekelestikti qorǵaý úshin Strategııalyq josparlaý jáne reformalar agenttigi quryldy.

«Naryqty monopolısterden tazalaý kerek. Barlyq laıyqty kásipkerlerdiń bizdiń naryqqa enip, erkin jumys isteýine múmkindik berý qajet. Sonda ǵana ekonomıka erkin damı alady. Munyń bári jańa uıymdastyrý sharalaryn qabyldaýdy talap etetini sózsiz. Bul sharalardyń bári tıimdi bolady dep úmittenemin», – dedi Memleket basshysy.

Prezıdent ekonomıkalyq sharalarmen qatar memleket tarapynan Qazaqstan qoǵamyn odan ári demokratııalandyrý jóninde de sharalar qabyldanatynyn aıtty. Tuńǵysh Prezıdent – Elbasy Nursultan Nazarbaev memleketti qalyptastyrýǵa kóp eńbek sińirdi. Endigi mindet Qazaqstannyń damýyna tyń serpin berý bolyp tabylady.

«Partııalardyń qyzmetine, beıbit jıyndar men sherýler ótkizýge qatysty jańa zańdar qabyldandy. Jýyrda ǵana Qazaqstanda ólim jazasynan bas tartýdy qarastyratyn ekinshi fakýltatıvti hattamaǵa qosylý jóninde sheshim qabyldandy. Kezinde Tuńǵysh Prezıdentimiz tarapynan ólim jazasyna jarııalanǵan moratorıı kúshinde bolǵandyqtan, bul sheshim Konstıtýtsııaǵa tolyq saı keledi jáne Atazańǵa eshqandaı ózgeris engizý qajet emes. Shyn máninde, elimizde ólim jazasy joq. Tek Konstıtýtsııada qarastyrylǵan eki ǵana bolmashy erekshelik bar. Olar fakýltatıvti hattamanyń talabyna tolyq saı keledi. Sondyqtan eki birdeı mindet: elimizdiń ekonomıkasyn jańa jaǵdaıda damytý, Qazaqstan úshin tıimdi ıntegratsııalyq protsesterdi kúsheıtý jáne saıası reformalardy júzege asyrý. Bul mindetterdiń bári bir ýaqytta atqarylady jáne tabysty bolady dep úmittenemin», – dedi Qasym-Jomart Toqaev.

Bıznes ókilderi Joldaýda aıtylǵan sharalarǵa oń baǵa berip, kásipkerlikke qoldaý kórsetkeni úshin Prezıdentke alǵys bildirdi. Sonymen qatar olar tiri maldy eksportqa shyǵarýǵa jarııalanǵan moratorııdi sozý jóninde Memleket basshysyna ótinish jasady.
























Joǵary qaraı