Aýa raıy
Astana 15 °S
Almaty 23 °S
valıýta baǵamy
USD 412.55
EUR 468.66
RUB 5.79
CNY 58.80

Naýaıdaǵy qazaqı kórinis - Sheteldegi qazaq tildi BAQ-qa sholý

2020 jyldyń 12 shilde 2020 12:41

NUR-SULTAN. QazAqparat- Ádettegideı, «QazAqparat» HAA sheteldegi qazaq tilinde taraıtyn aqparat kózderine aptalyq sholýyn usynady.

Jaılaýdaǵy qazaq balalarynyń atpen jarysy - Qytaıdyń «Ortalyq halyq radıosy» (CNR)




Ótken aptada Qytaıdyń CNR aqparattyq portaly «Jaılaýdaǵy qazaq balalarynyń atpen jarysyp oınaýy» degen taqyryptaǵy fotoreportajyn jarııalady. Atalǵan BAQ-tyń dereginshe, malshylardyń balalary jazǵy demalysyn jaılaýda ótkizýdi jaqsy kóredi.




«Іle qazaq avtonomııaly oblysyna qarasty Tekes aýdanynyń qazaq malshylarynyń balalary taý tabıǵatymen etene bolady. Olar jaılaýda atpen qydyryp, jazǵy demalysyn kóńildi ótkizedi. Bul balalardyń sondaı baqytty sátinen tilshimizdiń túsirgen sýretteri», dep jazady qytaılyq BAQ.







1 500 jyldyq tarıhy bar Aııa-Sofııa mýzeıden meshitke aınaldy - TRT





Prezıdent Rejep Taıyp Erdoǵan Memleket keńesiniń sheshimimen Aııa-Sofııanyń ǵıbadatqa ashylýyna oraı atalǵan tarıhı ǵımarat jergilikti din isteri basqarmasyna ótkizip berildi jáne ǵıbadatqa ashylýyna sheshim qabyldanǵanyn jarııalady, dep habarlady Túrkııa Radıo Teledıdar mekemesiniń resmı saıty.

Atalǵan aqparat kóziniń deregine súıensek, memleket keńesiniń 10-shy departamenti Aııa-Sofııanyń meshitten murajaıǵa ózgertilýine baılanysty 1934 jyly 24 qarashadaǵy mınıstrler kabıneti sheshiminiń kúshin joıdy. Memleket keńesiniń sheshimimen san ǵasyrlyq tarıhy bar Aııa-Sofııa endi dinı qulshylyq jasaý orny bolmaq.

Aııa-Sofııanyń ǵıbadatqa ashylýyna baılanysty prezıdenttiń sheshimi resmı gazette jarııalandy.

Aıta ketý kerek, Aııa-Sofııa ǵımaraty VI ǵasyrdyń 30-shy jyldarynda Vızantııa ımperatory ıÝstınıannyń zamanynda salynǵan. Ol myńdaǵan jyl boıy hrıstıan álemindegi eń iri shirkeý bolǵan. 1453 jyly Konstantınopoldy Osman ımperııasy basyp alǵannan keıin, shirkeý aınalasyna tórt munara salyp, meshitke aınaldyrǵan. Aııa-Sofııa 1934 jyly murajaıǵa aınaldy. 1985 jyly UNESCO-nyń Búkilálemdik mura tizimine endi.





Ózbekstan mektepterinde 4 pán ornyna bir ǵana pán engizilmek - «ÓzA» aqparat agenttigi





Ózbekstandaǵy «Jalpy orta bilim berý mekemelerinde» jańadan gýmanıtar pán engiziledi, dep habarlaıdy «ÓzA».

Ózbekstandyq BAQ-tyń deregine súıensek, ókimettiń bilim salasy boıynsha qabyldaǵan qaýlysyna oraı jalpy orta bilim berý mekemelerinde «Ádep», «Otan sezimi», «Ulttyq táýelsizdik ıdeıasy jáne rýhanııat negizderi» men «Álemdik dinder tarıhy» pánderin biriktiretin jalpy orta bilim berýdegi biryńǵaı «Tárbıe» páni 1-9 synyptarda 2020/2021 oqý jylynan bastap engiziledi. Al, 10–11 synyptarda bul oqý ádistemesi 2021/2022 oqý jylynan bastap pánderge bólingen jalpy saǵattar sheginde kezeńimen engiziletin bolady.

Ózgege syılaǵan jaqsylyqtan ózińizde kúsh-qýat alasyz - Kaznews





Osy aptada mońǵolııalyq Kaznews aqparattyq portalynda baıan-ólgeılik qandasymyz, ekonomıst, kásipker Baýyrjan Baqytkereıulynyń suhbaty jarııalandy. Bul suhbatta B. Baqytkereıuly óz kásibine sáıkes, eginshilik jaıynda kóptegen suraqtarǵa jaýap bergen eken. Onyń oıynsha, shynaıy nıetińmen tek ǵana jaqsylyq oılasań, nıetińe saı bári de jaqsy bolady. Ol bul ıdeıany óziniń ómirlik ustanymy retinde qaraıdy eken.

Baýyrjan Baqytkereıuly 1981 jyly Ólgeı qalasynda dúnıege kelgen. 1999 jyly №II mektepti támamdap, 2003 jyly «Zasagt han» ýnıversıtetinen ekonomıst mamandyǵymen bitirgen. 2004 jyly Haan bank ortalyǵynda ishki aýdıt baqylaýshysy, 2010-2017 jyldary Ulanbatyr qalasyndaǵy «Ógóómór» bazary jáne «Dragon» avtobeketindegi, Baıan-Ólgeı aımaǵyndaǵy «Haan bank» bólimshelerinde dırektor qyzmetin atqarǵan. Mońǵolııanyń Baıan-Ólgeı aımaǵynda turady. Qazirgi qyzmeti jylyjaı sharýashylyǵymen aınalysatyn «Altyn sapa» kompanııasynyń dırektory.

Ol tabıǵaty qońyr-salqyn Baıan-Ólgeıde alǵash qysqy jylyjaı salǵan azamattardyń biri eken.

«...Eginshilik únemi aınalymda bolmaıtyndyqtan basqa kásipterge qaraǵanda paıdasy azdaý. Biraq adamǵa beretin kúsh qýaty orasan. Paıdadan góri qaıtsem jaqsy ónim alamyn, kimge qalaı kómegim tıedi deýdi oılaýmen bolasyz. Shynaıy nıetińmen tek ǵana jaqsylyq oılasań, nıetińe saı bári de jaqsy bolady. Unatyp istegen sharýada sharshaý joq, tek jaqsy energııa jınaısyz. Qalaı paıda tabamyn dep ózińe unamasa da bir ispen aınalysý adamdy kúızeliske ushyratady. Sondyqtan adamdarǵa paıdasy tıetin, qyzyqtap isteıtin isti qolǵa alsańyz, jaqsy kóńil-kúı, kúsh-qýatty ózgelermen birge ózińizde alatyn bolasyz» deıdi kásipker Baýyrjan Baqytkereıuly.








Naýaıdaǵy qazaqı kórinis - «ÓzA» aqparat agenttigi





Osy aptada ózbekstandyq «ÓzA» aqparat agenttiginde «Naýaıdaǵy «Úshtóbe» aýylyndaǵy kórinis» degen taqyryppen fotoreportaj jaryq kórdi. Atalǵan aqparattaǵy sýretterde, qoıdyń tólin qolyna ustaǵan er adamdarmen qosa, ultymyzdyń bógenaıy sanalatyn kıiz úıde ulttyq aspaptarymyzdy ustaǵan ónerpazdardy, asyq oınaǵan balalardy kórýge bolady.

«Naýaı oblysy ortalyǵynan 250 shaqyrym jerde oryn tepken, Kenımeh aýdanyndaǵy Úshtóbe aýylyndaǵy búgingi kórinis» dep jazǵan ózbekstandyq BAQ.







Irannyń Qazaqstanǵa eksporty 13 paıyzǵa artty - «Fars» aqparat agenttigi

Iranda Qazaqstan – Iran birlesken palatasynyń, Irannyń saýda, ónerkásip, taý-ken jáne aýyl sharýashylyǵy palatalary men jeke sektor ókilderiniń qatysýymen eksport joldaryn damytý taqyryptardy talqylaýǵa arnalǵan otyrys ótti, dep habarlady parstoday .

Irandyq BAQ-tyń dereginshe, Irannyń Qazaqstanǵa jasaǵan eksporty bıylǵy eki aıda ótken jyldyń uqsas merzimimen salystyrǵanda 13 paıyzǵa artqan. Irannyń saýdany damytý uıymynyń keltirgen málimetine sáıkes, eki eldiń saýda qarym-qatynasyna ártúrli salalar enedi. Atap aıtar bolsaq, kólik jaǵdaıy, ásirese tranzıttik tasymaldaýdy arttyrý, tońazytqysh kanteınerlerdi daıyndaýmen qatar Aqtaýda logıstıkalyq ortalyq qurý jáne bankilik máselelerdi sheshý, vıza berýdi jeńildetý. Sondaı-aq, saýda ortalyq qurý, eksporttyq múmkindikterdi arttyrý, ónerkásiptik jáne ken, ásirese trans shekaralyq aýylsharýshylyq salalardaǵy yntymaqtastyq máseleleri qarastyrylǵan.





Avtor Beısen Sultan
Basty sózder: Qandastar, BAQ,
Joǵary qaraı