Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Nur Otan: Dári-dármekterge salyqtyq jeńildikterdi alyp tastaý baǵany kúrt ósiredi

2021 jyldyń 19 qazan 2021 12:07

NUR-SULTAN. QazAqparat - Ulttyq ekonomıka mınıstrligi usynǵan «Nur Otan»-nyń saılaýaldy baǵdarlamasyn oryndaý sharalary partııa janyndaǵy Ekonomıkany damytý jáne kásipkerlikti qoldaý jónindegi respýblıkalyq qoǵamdyq keńestiń otyrysynda synǵa ushyrady, dep habarlaıdy QazAqparat.

Atap aıtqanda, mınıstrlik respýblıkalyq bıýdjetke túsimdi molaıtý úshin birqatar salyqtyq jeńildikterdi alyp tastaýdy usyndy. Alaıda keńes tóraǵasy, Májilis depýtaty Amanjan Jamalovtyń aıtýynsha, salyqtyq jeńildikterdi alyp tastaý baǵanyń kúrt ósýine jáne ınvestıtsııalyq ahýaldyń nasharlaýyna ákelýi múmkin. Mundaı sharalardyń respýblıkalyq bıýdjet úshin paıdasy mardymsyz.

«Mınıstrliktiń baıandamalaryn tyńdasań, kóp is atqarylyp jatqan sekildi, biraq aýyz toltyryp aıtarlyqtaı dúnıe joq. Bul jeńildikterdi ne úshin alyp tastaý kerek ekeni túsiniksiz. Dárilik zattar úshin qosymsha qun salyǵy boıynsha bul jeńildiktiń ekonomıkalyq áseri joq dep jatady. Biraq qosymsha qun salyǵy taýardyń baǵasyna kirmeı me? Jeńildikterdi alyp tastaý dári-dármek baǵasynyń ósýine ákeletini anyq», - dedi Amanjan Jamalov.

Partııanyń saılaýaldy ýádeleri aıasynda QQS mólsherlemesin saralaý qarastyrylǵan. Ulttyq ekonomıka vıtse-mınıstri Azamat Ámrın habarlaǵandaı, áleýmettik mańyzy bar taýarlarǵa QQS-nyń tómendetilgen mólsherlemesin engizý, osy salyq túriniń jalpy mólsherlemesiniń ósýine alyp keledi. Alaıda, Amanjan Jamalov bul máselelerdi bir-birimen baılanystyrýǵa bolmaıtynyn atap ótti.

«Ótken jyly Qazaqstanda áleýmettik mańyzy bar taýarlarǵa QQS 8%-ǵa tómendetilgen mólsherleme qoldanyldy. Osylaısha, baǵanyń ósýine jol berilmedi. Qazir ınflıatsııanyń ósýin eskersek, bul másele asa ózekti. Nátıjesine kelsek, salyq jınalymy tipti artty. Al naqty QQS tómendetilgen mólsherlemesinen bolǵan shyǵyndar, Mınıstrliktiń baǵalaýy boıynsha, bar bolǵany 9 mlrd. teńgeni qurady. Sondyqtan jalpy mólsherlemeni kóterý boıynsha talap qoıýdyń qajeti joq, sizderge ondaı tapsyrma berilmegen», – dedi Keńes tóraǵasy Azamat Ámrınge qaratyp.

Óz kezeginde Qarjy vıtse-mınıstri Baqtııar Qojahmetov salyqtyq jáne kedendik ákimshilendirýdi tsıfrlandyrý boıynsha júrgizilip jatqan jumystar týraly baıandady.

«Ótken jyldan bastap onlaın baqylaý-kassa mashınalaryn (BKM) paıdalanýǵa kóshý júrgizildi. Bıyl «E-salyq-Business» mobıldi qosymshasy arqyly pılottyq joba júzege asyrylýda. Barlyq jerde taýar aınalymyn baqylaý úshin taýarǵa ilespe júkqujat (TІJ) engizilýde», – dedi Bahtııar Qojahmetov.

Bul rette, Keńes tóraǵasy 2015 jyldan beri elimizde 660 myńnan astam qatysýshy tirkelgen elektrondyq shot-faktýralar júıesi (EShF) qarqyndy jumys isteıtinin eske saldy.

«Siz onlaın baqylaý-kassalyq mashına, elektrondyq shot-faktýra, taýarǵa ilespe júkqujat, vırtýaldy qoıma júıeleri týraly aýyz toltyra aıttyńyz. Biraq kásipkerlerden bul júıelerdiń jumysyna qatysty únemi shaǵym túsedi. Óıtkeni olar bir-birinen kóshiredi. Eger elektrondyq shot-faktýralar taýarlardy baqylaýdyń negizi bolsa, onda sonyń negizinde jumys júrgizilýi kerek. Jańa júıeler men pılottyq jobalar oılap tabýdyń qajeti joq. Bızneske olardy paıdalaný yńǵaıly bolýy úshin júıelerdi ońaılatý qajet. Al qazir sizder tek kásipkerlerdiń úreıin alyp júrsizder», - dedi Amanjan Jamalov.

Otyrys qorytyndysy boıynsha Ulttyq ekonomıka mınıstrligine usynylǵan salyq jeńildikteriniń tizbesin qaıta qaraý, sondaı-aq óndiristik jáne áleýmettik mańyzy bar taýarlarǵa QQS mólsherlemelerin saralaý boıynsha naqty usynystar engizý usynyldy.

Qarjy mınıstrligine qoldanystaǵy júıeler men pılottyq jobalardy jeńildetýge nazar aýdarý jáne basqa júıelermen qaıtalanýdy boldyrmaý maqsatynda «Elektrondyq shot-faktýralar» aqparattyq júıesi negizinde taýarlardyń qadaǵalanýyn qamtamasyz etý usynylady.


Basty sózder: Partııalar, Ekonomıka,
Joǵary qaraı