Nur-Sultan men Tarazdaǵy sport mekemelerine Jaqsylyq Úshkempirovtiń esimi berildi: Qaýly jarııalandy

NUR-SULTAN. QazAqparat – QR Úkimetiniń basshysy Asqar Mamın Nur-Sultan qalasy men Jambyl oblysyndaǵy sport nysandaryna Jaqsylyq Úshkempirovtiń esimin berý týraly Qaýlylarǵa qol qoıdy, dep habarlaıdy QazAqparat primeminister.kz-ke silteme jasap.

«Nur-Sultan qalasyndaǵy «Jekpe-jek» jekpe-jek saraıynyń ataýy Jaqsylyq Úshkempirov atyndaǵy jekpe-jek saraıy bolyp ózgertilsin. Osy qaýly alǵashqy resmı jarııalanǵan kúninen bastap qoldanysqa engiziledi», - delingen qujat mátininde.

Sondaı-aq Premer-Mınıstrdiń taǵy bir Qaýlysymen Jambyl oblysy ákimdiginiń dene shynyqtyrý jáne sport basqarmasyna qarasty «Taraz-Arena» sharýashylyq júrgizý quqyǵyndaǵy kommýnaldyq memlekettik kásipornyna Jaqsylyq Úshkempirovtiń esimi berildi. Qaýly alǵashqy resmı jarııalanǵan kúninen bastap qoldanysqa engiziledi.

Eske salaıyq, elordadaǵy Jekpe-jek saraıyna dańqty balýan, Olımpıada chempıony Jaqsylyq Úshkempirovtiń esimin berý sheshimi qalaı qabyldanǵanyn Prezıdenttiń baspasóz hatshysy Berik Ýálı aıtyp bergen bolatyn.

Grek-rım kúresinen tuńǵysh Olımpıada chempıony, Álem chempıony, Qazaqstannyń eńbek eri, «Barys», «Qurmet» «Parasat» ordenderiniń ıegeri Úshkempirov Jaqsylyq Ámiráliuly 1951 jyly 6 mamyrda Qazaq KSR, Jambyl oblysy, Sverdlovsk aýdany, Chapaev keńsharynda dúnıege kelgen. Bıylǵy 2 tamyzda mezgilsiz ómirden ótti.