Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Nur-Sultanda bir kúnde 3 myńǵa jýyq aǵash otyrǵyzyldy

2021 jyldyń 19 qyrkúıek 2021 09:48

NUR-SULTAN. QazAqparat - Keshe elordada World Cleanup day 2021 dúnıejúzilik tazalyq kúni jáne «Birge – taza Qazaqstan» respýblıkalyq ekobastamasy aıasynda sanıtarlyq normalar men karantın talaptaryn saqtaı otyryp, jalpyqalalyq senbilik ótti. Qalanyń túkpir-túkpirine 3 myńǵa jýyq aǵash otyrǵyzyldy, dep habarlaıdy QazAqparat qala ákimdiginiń resmı saıtyna silteme jasap.

Nur-Sultan qalasy ákiminiń ókimimen 15 qyrkúıek pen 15 qazan aralyǵynda elordada qysqy kezeńge daıyndyq jáne kúzgi kezeńde jasyl jelek otyrǵyzý boıynsha «Birge – taza Qazaqstan» ekologııalyq aktsııasy jarııalandy.




Sharaǵa 87 memlekettik organ, 17 elshilik ujymy, sondaı-aq 2,5 myńnan astam kásiporyn, uıymdar men mekemeler qatysty.

Barlyq aýdanda jalpy kólemi 3 mln sharshy metr bolatyn saıabaqtar men gúlzarlar tazartyldy, 3 myńǵa jýyq aǵash otyrǵyzyldy, onyń ishinde – qyzyl tal, tatar úıeńkisi, shyrsha, qaraǵaı, qaıyń, emen, pıramıdalyq terek, sheten jıdegi, sıren, bóriqaraqat, jóke jáne basqalar bar.

«Ótkenge kóz salyp óteıik. Eń alǵashqy senbilikke biz 1997 jyly, jańa astanaǵa kóshkende qatystyq. Búginge deıin bizdiń qyzmetkerler osyndaı is-sharalarǵa qatysyp, ózgelermen aralasýǵa, taza aýada ýaqyt ótkizýge atsalysyp keledi. Otbasylar aǵash otyrǵyzady. Senbilikter bizdi uıymshyl komanda etýge septigin tıgizedi. Elordamyzdyń damýyna óz úlesimizdi qosqanymyzǵa qýanyshtymyz», - dedi Prezıdent Ákimshiliginiń bólim meńgerýshisi, PA kásipodaq uıymynyń tóraǵasy Ǵanı Tileýbekov.

Sondaı-aq, aǵash otyrǵyzý bastamasyn Premer-Mınıstr keńsesiniń, Parlament, Nur Otan partııasy ortalyq apparaty, Joǵarǵy sot, Konstıtýtsııalyq keńestiń, elshilikterdiń jáne basqa mekeme ókilderi qoldady.

«Jasotandyqtar «Birge — taza Qazaqstan» respýblıkalyq aktsııasyn alǵashqylardyń biri bolyp qoldady. Basty maqsat – qalany kógaldandyrý. Jas Otan 100 myńnan astam jas qazaqstandyqty biriktiredi. Aılyq aıasynda olar óz úlesterin qosady. Bul biz úshin ekologııalyq aktsııa ǵana emes, oǵan tárbıelik mańyzdy da qosyp otyrmyz. Óskeleń urpaqty patrıotızm rýhynda tárbıeleımiz, týǵan elge degen súıispenshilikte tárbıeleımiz, Prezıdent Qasym-Jomart Toqaev árdaıym aıtyp otyratyn jańa qundylyqtardy qalyptastyramyz. Biz, jasotandyqtar, aldaǵy ýaqytta osyndaı aktsııalarǵa qatysatyn bolamyz», - dedi Jas Otan jastar qanatynyń tóraǵasy Nurjan Jetpisbaev.

Jalpyqalalyq senbilik kezinde 214 tonna qoqys jınalyp, polıgonǵa shyǵaryldy, 56 reıs jasaldy.

«Búgin – Dúnıejúzilik tazalyq kúni. Al elordada ekologııalyq aılyq ótip jatyr. Reseı Federatsııasynyń Qazaqstan Respýblıkasyndaǵy Elshiliginiń ókilderi elshilikke irgeles aýmaqty jaqsartý jónindegi keremetteı is-sharaǵa qýana qosyldy, biz osynda turamyz jáne jumys isteımiz. Árıne, óz eńbegimizdiń jemisin kóretinimizge qýanamyz. Aǵash otyrǵyzýǵa shamamen 12 adam qatysty. Aramyzda kásibı baǵbandar da bar», - dep atap ótti Qazaqstandaǵy RF elshiliginiń baspasóz hatshysy Aleksandr Ostanın.

Aıta ketý kerek, senbilik sanıtarlyq normalardy saqtaı otyryp ótkizildi: maska rejımi, áleýmettik qashyqtyq, qolǵap kııý arqyly qol gıgıenasy saqtaldy.














Basty sózder: Nur-Sultan, Ekologııa,
Joǵary qaraı