Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Nur-Sultanda genderlik zorlyq-zombylyqqa qarsy 16 kúndik naýqan bastaldy

2021 jyldyń 25 qarasha 2021 20:58

NUR-SULTAN. QazAqparat - Búgin elordada «Genderlik zorlyq-zombylyqqa qarsy belsendi is-qımyldyń 16 kúni» naýqany bastaldy. Іs-sharalar zorlyq-zombylyqty boldyrmaý jáne aldyn alý sharalary týraly halyqtyń habardar bolýyn arttyrýǵa baǵyttalǵan, dep habarlaıdy qala ákimdiginiń resmı saıty.

Naýqan sheńberindegi is-sharalarǵa memlekettik organdardyń, úkimettik emes uıymdardyń ókilderi, sarapshylar, volonterler belsendi qatysady.

Halyq arasynda aýqymdy aqparattyq-túsindirý jumystaryn júrgizý josparlanǵan.

Eńbek ujymdarynda, bilim berý uıymdarynda (mektepter, kolledjder, JOO) psıhologtarmen, medıatorlarmen, áıelderdi zorlyq-zombylyqtan qorǵaý jónindegi ınspektorlarmen kezdesýler ótedi.

Tájirıbeli sarapshylar daǵdarys ortalyqtarynyń otbasymen, mektep psıhologtarymen, ata-analar qaýymdastyǵymen jumys jasaıtyn mamandar úshin oqytý trenıngterin ótkizedi.

25 qarashada «Januıa» otbasy ınstıtýtyn qoldaý ortalyǵynyń bazasynda «Zorlyq-zombylyq psıhologııasy» taqyrybynda joǵary sanatty psıholog, «Keleshek» psıhologııalyq ortalyǵynyń dırektory Natalıa Semenenko trenıng ótkizedi.

«Úmit» daǵdarys ortalyǵy bazasynda ýákiletti memlekettik organdar, ákimdik janyndaǵy Áıelder isteri jáne otbasylyq-demografııalyq saıasat jónindegi komıssııa músheleri qyzmet alýshylar qatarynan azamattardy qabyldaıdy.

Densaýlyq saqtaý uıymdarynda «Sanaly ata-ana» taqyrybynda Ashyq esik kúnderi ótedi.

Nur-Sultan qalasy polıtsııa departamentiniń málimetinshe, 2021 jyldyń 10 aıynda 3168 azamat ákimshilik jaýapkershilikke tartyldy, otbasy-turmystyq qatynastar salasynda quqyq buzýshylyq jasaýǵa beıim 6600 adamǵa qatysty polıtsııa qyzmetkerleri qorǵaý nusqamalaryn shyǵardy.

Daǵdarys ortalyqtaryna 245 adam jiberildi.

Esterińizge sala keteıik, jyl saıynǵy «Genderlik zorlyq-zombylyqqa qarsy belsendi is-qımyldyń 16 kúni» halyqaralyq naýqany dástúrli túrde 25 qarashada Áıelderge qatysty zorlyq-zombylyqty joıý úshin halyqaralyq kúres kúni bastalyp, 10 jeltoqsanda Halyqaralyq adam quqyqtary kúni aıaqtalady.


Basty sózder: Qoǵam, Nur-Sultan, Genderlik saıasat,
Joǵary qaraı