Aýa raıy
Astana -20 °S
Almaty -6 °S
valıýta baǵamy
USD 421.58
EUR 496.83
RUB 5.53
CNY 62.20

Nurly kósh: Qandastarǵa salynǵan sapasyz úı máselesi qalaı sheshiledi

2020 jyldyń 27 qazan 2020 18:24

NUR-SULTAN. QazAqparat – Elordada «Otandastar qory» KEAQ janyndaǵy qoǵamdyq komıssııanyń otyrysynda Aqmola oblysyndaǵy qandastarǵa salynǵan «Nurly kósh» (Krasnyı ıAr) úılerin zańdastyrý máselesi qaraldy, dep habarlaıdy QazAqparat.

«Nurly kóshke» qansha qarajat jumsaldy

«Nurly kósh» baǵdarlamasy boıynsha Aqmola oblysynyń Krasnyı ıAr aýylynda 2009 jyly respýblıkalyq transfert esebinen shamamen 1,5 mlrd teńge somaǵa 138 ekipáterli turǵyn úıler salynǵan bolatyn. «Saryarqa» áleýmettik kásipkerlik korporatsııasy AQ ulttyq kompanııasy «Nurly kósh» baǵdarlamasy jobasynyń ákimshisi boldy. Qurylystyń tapsyrys berýshisi – Saryarqa JShS enshiles kásiporny. Úılerdiń qurylysyn memlekettik saraptamadan ótkizilip, bekitilgen jobalyq-smetalyq qujattamaǵa sáıkes merdiger uıym – «Kókshetaý óndiris» qurylys kompanııasy júzege asyrdy», - dep atap ótti Aqmola oblysy ákiminiń orynbasary Malǵajdar Tátkeev óz baıandamasynda.

Onyń aıtýynsha, oblystyq qarajat esebinen 20 mln teńgege somaǵa elektrlik jabdyqtar men syrtqy ınjenerlik jeliler tartylǵan.

«2012 jyly oblystyq bıýdjet esebinen 193 mln teńge somaǵa 138 ekipáterli turǵyn úılerge aǵymdaǵy jóndeý júrgizildi. Eń aldymen apattyq jaǵdaıdaǵy úıler boıynsha qajetti jumystar atqaryldy. 2016 jyly bıýdjetten 40 ekipáterli turǵynúıdi jylytýǵa 38 mln teńge bólindi. Sondaı-aq 2018 jyly – 10 mln teńge sporttyq alań ornatýǵa, 2019 jyly – «Nurly kósh» shaǵynaýdanynda uzyndyǵy 1,8 shaqyrym avtobýs marshrýty boıynsha 24 mln teńgege asfalt-beton jabyndysymen jolǵa jóndeý júrgizildi. Oblys bıýdjetinen barlyǵy 281 mln teńge jumsaldy. Qazirgi ýaqytta 137 turǵyn úı ishinde 35 úıge kúrdeli jóndeý jáne 102 úıge ortasha jóndeý qajet. Biraq úılerge áli tehnıkalyq tekserý júrgizilgen joq», - deıdi M. Tátkeev.

Turǵyndar shart talabyn oryndamaı otyr – oblys ákimdigi

«Turǵyn úı úsh jaqty («Esil» ÁKK, «Turǵyn úı qurylys jınaq banki» AQ jáne oblys ákimdigi) kelisim negizinde jáne «Esil» ÁKK men baǵdarlamaǵa qatysýshylar arasyndaǵy shartqa sáıkes «Turǵyn úı qurylys jınaq banki» AQ depozıttik kredıtteý baǵdarlamasy arqyly tıimdi jaǵdaılarda berilgen. Turǵyn úı qurylys jınaq boıynsha shart baǵdarlamanyń 215 qatysýshysymen jasalǵan, olar páter qunynan 50% depozıtte jınaýy qajet boldy. Odan keıin olarǵa páterdi 4,5% stavka boıynsha satyp alý múmkindigi berildi», - deıdi M. Tátkeev.

Alaıda, kóptegen salymshylar shart talaptaryn oryndamaǵan. Shart boıynsha mindetteme merzimi 2015 jyly aıaqtalǵan bolatyn (bar-joǵy 2 páter satyp alyndy).

«2011 jyly turǵyn úıler «Esil» ÁKK balansynan Kókshetaý qalasynyń ákimdigi balansyna berildi. Berilgen páterler jalǵa beretin turǵyn úıler bolyp sanaldy. Jalǵa alý quny 2013 jyly bekitildi jáne áli kúnge deıin bir sharshy metri 88 teńge deńgeıinde saqtalýda. ıAǵnı, páter úshin tólemniń ortasha somasy – aıyna 6 866 teńge. Biraq qatysýshylar arendasyn tólegen joq. Úılerdi jalǵa berýge baılanysty, olarda menshik quqyǵy joq, sondyqtan turǵyndar jyljymaıtyn múlikti kútip ustaýǵa qarjylyq júkteme alǵysy kelmeıdi», - deıdi ákimdik ókili.

Máseleni qalaı sheshýge bolady?

Búgingi tańda osy baǵdarlamanyń barlyq qatysýshylary – QR azamattary. «Nurly kósh» shaǵynaýdanynda 1057 adam turyp jatyr. Onyń ishinde jumys isteıtinder – 475, jumyssyzdar – 12, sábı kútimi boıynsha demalysta – 64, zeınetkerler – 39, mektep jasynda deıingi balalar – 191, mektep jasyndaǵy balalar – 220, stýdentter – 50, múgedekter – 6.

«Oryn alǵan jaǵdaıdy sheshý úshin turǵyn úılerdi sol turyp jatqan azamattardyń menshigine berý barynsha utymdy ári ekonomıkalyq turǵyda tıimdi bolady. Alaıda qazirgi ýaqytta baǵdarlama qatysýshysyna turǵyn úıdi berý zańnamamen qarastyrylmaǵan. Ol úshin «Turǵyn úı qatynastary týraly» zańǵa ózgeris engizý kerek nemese jalǵa berýshige ótetin turǵyn úıdi «Nurly kósh» qatysýshylarynyń menshigine berý jóninde qaǵıdany ózgertý qajet», - deıdi Malǵajdar Tátkeev.

Mal qamaýǵa da bolmaıdy – Depýtat úı sapasy týraly

Komıssııa otyrysynyń moderatory, QR Parlamenti Senatynyń depýtaty Murat Baqtııaruly «Nurly kósh» úıleriniń sapasyn synǵa aldy.

«Byltyr bir senatorlarmen Kókshetaýdaǵy Krasnyı ıAr shaǵynaýdanyna baryp kórdik. Shynynda da jol salynǵan, elektr energııasy berilgen. Endigi áńgime sol úıdiń sapasyna baılanysty. Sondaǵy bir úıge 56 myń dollar bólingen. Mundaı aqshaǵa keremet úı salýǵa bolar edi. Kózben kórgenimdi aıtaıyn, bes úıdi kórip shyqqanymda, qabyrǵalary gıpsokartonnan salynǵan, tóbesi óte juqa, irgetas joq. Qandastarymyz aıtady, qys aıynda munda turmaıdy, týystardy jaǵalap ketedi eken. Aıyna arendaǵa 6 myń teńgeden astam aqsha tóleý kerek eken, arenda qunyn tóleý úshin jaǵdaı jasalýy kerek qoı. Men bolsam, bir tıyn da tólemes edim. 7-8 aı qys bolsa, ishinde turmasa, tóbeden sý aqsa, ishi azynaǵan sýyq bolsa ne úshin aqy tóleýi kerek. Ondaı úılerge mal da qamaýǵa bolmaıdy. Onda mal emes, adam turyp jatyr ǵoı, bizdiń baýyrlarymyz. Bul másele boıynsha byltyr Premer-Mınıstrge kirip shyqtym. Bıyl taǵy bardym. Sheshiledi, oblys ákimimen sóılesemiz dedi. Menińshe, bul máseleni sheshýdiń bir-aq joly bar – jerdi óz menshigine berse, ózderi-aq úı salyp alýǵa daıyn. Bul – sheshiletin másele», - dedi Murat Baqtııaruly.

Aıta keteıik, «Nurly kósh» shaǵynaýdanyndaǵy apatty úıler jaǵdaıy birneshe jyldan beri kóterilip keledi.


Joǵary qaraı