Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Oqıǵa kýágeri Almatydaǵy tártipsizdikterge qatysty jarııalaǵan vıdeosyna túsinik berdi

2022 jyldyń 18 qańtar 2022 14:25

ALMATY. QazAqparat- Almatyda jappaı tártipsizdikter kezinde narazy toptyń áskerıler men quqyq qorǵaý organdarynyń qyzmetkerlerin uryp jatqan vıdeony áleýmettik jelide jarııalaǵan avtor Jandos Qurmanbaev oqıǵanyń jaı-japsaryn aıtyp berdi, dep habarlaıdy QazAqparat tilshisi.

«Sol kúnderi men Almatydaǵy oqıǵalardyń kýási boldym. Dál terezemniń astynan 5 qańtar kúni shamamen túski saǵat 14:40-ta Ulttyq ulannyń myńnan asa jaýyngeri men 500-ge tarta arnaıy jasaq áskeri ótti. Olardyń artynan taıaq, armatýra, áskerılerden tartyp alynǵan qalqan jáne kaskamen qarýlanǵan top júrdi. Shamamen 15 myńǵa jýyq adam. Olar - 17 men 25 jas arasyndaǵy jastar. Keıin olar dúken sórelerin sol taıaqtarmen syndyryp, tonaǵan bolatyn. Telefonymda Ulttyq ulan jaýyngerleri men arnaıy jasaq áskerlerin aıaýsyz uryp-soǵyp, tepkilep jatqan vıdeo bar. Olardyń bári kúrteleriniń kapıýshonyn túsirip kıip alǵan. Betinde maska, qoldarynda taıaq boldy. Alǵan soqqysynan jerde es-tússiz jatqan sarbazdardy artynsha taǵy bir top jigit kelip, bastan teýip ketti. Basynan soqqy alǵan tártip saqshysy qatygez toptan qutylamyn degen úmitpen jolǵa júgirip shyǵady, biraq joldan jańadan qosylyp jatqan buzaqylar jábirlenýshini odan ári ólimshi etip uryp-soǵýdy jalǵastyrdy.

Bular da bizdiń qazaq, onyń da anasy bar, úıde balalary kútip otyr! Qyzmet babynda bireýdiń ómirin qııýǵa kim quqyq berdi? Bul - onyń jumysy, ol tek bastyǵynyń buıryǵyn oryndaıdy. Ony nege qyryp jatyrsyń? Qasym-Jomart Toqaevtyń atý týraly buıryǵyn tolyq qoldaımyn. Ol bizdiń Konstıtýtsııa bergen kepildikti oryndady. Meniń aıtqanymnyń bári vıdeoǵa jaqynnan túsirildi, Facebook-te jarııalanady. Osy kisi óltirýshiler men tonaýshylardyń tabylyp, jaýapqa tartylǵanyn qalaımyn. Men barlyq materıaldardy Almaty polıtsııa departamentine berýge daıynmyn» dep jazdy Jandos Qurmanbaev Facebook paraqshasynda.

Onyń aıtýynsha, bazbuzarlar - halyq emes. Bular - narazylyq bildirýshiler emes. Bular - jaqsy ómirdi talap etip shyqqandar emes. Beıbit sherýge shyqqandardyń arasyna jasyryn qosylǵan aram pıǵyldy adamdar.

Eki kúnnen keıin olarǵa bankomat tonaýshylar, atys qarýy jáne lommen qarýlanǵan basbuzarlar qosyldy.

«Aıta keteıin, meniń úıim ornalasqan kósheniń qıylysyna memlekettik nómiri joq alty kólik bir mezette toqtady. Meniń oıymsha, qalanyń basqa aýdandarynda da solaı boldy. Muny arnaıy baılanys quralynsyz, josparsyz, motıvatsııasyz uıymdastyrý múmkin emes. Sonymen qatar, kóshede mas jastar da boldy. Olar tún ortasynda aıqaılap, dúkenderdi tonap, talqandap, kólikterdi toqtatyp jatty. Osy kórinistiń bári beıbit mıtıng degenge kelmes. Men barlyǵyn ustap, jazalaýdy talap etemin, bulardy qamaý kerek. Qalaı bolǵanda da, bári jan-jaqty tekserilip, kináliler jazasyn alýy tıis», - dep qosty ol.


Avtor Alma Muqanova
Basty sózder: Almaty tragedııasy, Almaty, Oqıǵa,
Joǵary qaraı