Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Oqý jyly bastalǵannan beri oqýshylardyń shamamen 1 paıyzy koronavırýs juqtyrdy - BǴM

2021 jyldyń 17 qyrkúıek 2021 19:20

NUR-SULTAN. QazAqparat – Oqý jylynyń alǵashqy eki aptasynda qazaqstandyq oqýshylardyń shamamen 1 paıyzy koronavırýs juqtyrdy. Bul týraly QazAqparat BǴM silteme jasap habarlaıdy.

Qazaqstandyq oqýshylardyń jalpy sanynyń 0,07%-y oqý jylynyń alǵashqy eki aptasynda koronavırýs juqtyrdy.

«1 qyrkúıekte mektepterde oqý dástúrli formatta bastaldy. Balalardyń densaýlyǵyn qorǵaý maqsatynda bilim berý uıymdarynda qajetti sanıtarlyq sharalar qabyldandy. Sabaq kestesi, úzilister men býfetke barý ýaqyttary dálizde balalardyń kóp jınalmaýy úshin rettelgen. Sonymen qatar, balalardyń bir kabınetten ekinshisine aýysýy shekteldi. ıAǵnı oqý protsesi «bir synyp – bir kabınet» qaǵıdaty boıynsha uıymdastyrylyp, aýysym sany artty. Bir oqýshy aýyryp qalatyn bolsa, barlyq synyp karantınge jiberiledi. Osy eki apta ishinde qazaqstandyq oqýshylardyń jalpy sanynyń 0,07%-y koronavırýs juqtyrǵan. Qyrkúıek aıynyń basynda karantınge jiberilgen synyptar osy aptadan bastap dástúrli oqýǵa qaıta oraldy», – dedi QR BǴM Mektepke deıingi jáne orta bilim komıtetiniń tóraǵasy Gúlmıra Kárimova.

Sondaı-aq, vaktsınatsııanyń arqasynda pedagogter arasynda koronavırýsty juqtyrý sany azaıdy. Jańa oqý jyly bastalǵaly elimizdegi muǵalimderdiń jalpy sanynyń 0,09%-y aýyrǵan.

Álemniń kóptegen memleketterinde sııaqty jańa oqý jyly elimizde dástúrli formatta ótip jatyr.

Sondaı-aq, Almaty qalasyndaǵy epıdemıologııalyq jaǵdaıǵa baılanysty jańa oqý jylynyń aldynda ata-analarǵa oqytý formatyn tańdaý múmkindigi berilgenin eske salamyz.

Sol kezde onlaın-formatty óte az bóligi – almatylyq oqýshylardyń jalpy sanynyń 5,6%-y ǵana tańdaǵan bolatyn. Búgingi tańda eki myńnan astam bala onlaın-formattan dástúrli oqýǵa oraldy. Epıdemıologııalyq jaǵdaıdyń qalypqa kelýine baılanysty ata-analar qashyqtan oqytýdan bas tartyp, balalaryn mektepterge jiberip jatyr.

«Meniń nemerem bıyl birinshi synypqa bardy. Basynda biz de ýaıymdap, onlaın-oqytýdy tańdadyq. Biraq ol úıde otyrǵysy kelmeıdi, synyptastarymen birge otyryp oqyǵysy keledi. Báribir bala kóshege shyǵyp oınaıdy, dúkenge, qonaqqa jáne úıirmelerge barady. Sondyqtan biz dástúrli oqytý formatyn tańdaýdy uıǵardyq. Úıde otyrǵan balanyń bar yntasyn sabaqqa bólýi ekitalaı. Ár nársege alańdap, oqytý baǵdarlamasyn tolyq meńgere almaıdy. Pandemııa qashan aıaqtalatyny belgisiz. Sondyqtan pandemııanyń aıaqtalýyn kútip, bilim sapasyn túsirip almaý mańyzdy»,dep atap ótti Almaty qalasynyń turǵyny Gúlbahar Ýálıeva.


Joǵary qaraı