Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Oqytýdyń ozyq ádisi: ShQO-da muǵalim áleýmettik jelini qalaı paıdalanýda

2022 jyldyń 14 qańtar 2022 13:40

ÓSKEMEN. QazAqparat – Matematıka páninen sabaq beretin Evgenııa Leýnova qazirgi tehnologııa damyǵan zamanda balalardy bilim nárimen sýsyndatýdyń jańa ádisin meńgergenderdiń biri. Shákirtterin qyzyqtyra biletin ol Instagram jelisinde jeke blogyn, al YouTube-ta stýdentter men muǵalimderge arnalǵan oqytý arnasyn júrgizýde. Mine sonyń nátıjesinde, onyń tálimin kórgen oqýshylar 2021 jyly respýblıkalyq olımpıadalardyń jeńimpazdary atanǵan, dep habarlaıdy QazAqparat tilshisi.

Balalar sabaqqa zor yqylaspen barady

Evgenııa Leýnova ShQO matematıka, fızıka, ınformatıka salalarynda daryndy balalarǵa arnalǵan mamandandyrylǵan mektep-lıtseıinde jumys isteıdi. Matematıka páninen sabaq beretin ol oblystyq, respýblıkalyq semınarlarǵa turaqty túrde qatysyp keledi.

Ustaz jumysynyń jemisi – onyń oqýshylarynyń jetistigimen ólshenetini belgili. Al osy turǵyda pedagog qara jaıaý emes. 11-synyp oqýshysy Leonıd Gýskov jaratylystaný-matematıkalyq tsıkl pánderi boıynsha Prezıdenttik olımpıadanyń altyn júldegeri atansa, 5-synyp oqýshysy Zakır Djeksenev respýblıkalyq matematıkalyq olımpıadanyń qola júldesin ıelengen.




«Evgenııa Valerevna ulyma matematıka pánin oqytady. Balamnyń matematıka sabaǵyna zor yqylaspen baratyndyǵyn baıqadym. Muǵalimge oqý materıalyn barynsha túsinikti jáne qyzyqty jetkizip, ár sabaqta synyp ishinde jaımashýaq, qolaıly atmosfera qalyptastyra biletindigi úshin óte rızamyz. Onyń balalarǵa asa qıyn tapsyrmalardy túsinýge kómektesip, tipti sabaqtan tys ýaqytta suraqtaryna yjdahattylyqpen jaýap beretindigi qýantady. Ustaz ár balaǵa kómektesýge daıyn turady», - deıdi 11-synyp oqýshysynyń ata-anasy Irına Belıantseva.

Jeke blogyn jetildire túspek

Erinbeı etken eńbegi úshin Evgenııa Leýnova Shyǵys Qazaqstan oblystyq Bilim basqarmasynyń, «Órleý» BAUO» AQ-nyń, «Daryn» respýblıkalyq ǵylymı-ádistemelik ortalyǵynyń Alǵys hattaryna ıe boldy.

«Matematıkany oqytý – meniń súıikti isim. Mekteptegi jumys, balalarmen qarym-qatynas jasaý ózime qatty unaıdy. Bilim berý salasyndaǵy ózgerister men reformalar bizge kóptegen jańa múmkindikter syılaǵany ras. Naqty aıtqanda, oqýshylarmen jumys isteýdiń jańa formalary men ádisterin qoldanýǵa, zaman aǵymynan qalyspaı, ilesip otyrýǵa jol ashyldy», - dedi Evgenııa Leýnova.




Onyń aıtýynsha, matematıka pánin daryndy balalarǵa arnalǵan mektepte oqytý úshin adam árkez óz ózimen jumys istep, úzdiksiz izdeniste bolýy tıis.

«Qazir Instagram jelisinde jeke blogymdy, YouTube-ta stýdentter men muǵalimderge arnalǵan oqytý arnasyn júrgizip júrmin. Onda ózimniń bilgenimmen, oqyp-toqyǵanymmen bólisemin. Shákirtterimniń kózderindegi otty, bilimge degen qumarlyǵyn baıqaımyn. Olarǵa zor yntalaryna, maǵan da kásibı túrde ósýime múmkindik bergenine rızashylyǵymdy bildirgim keledi», - dedi ustaz.

Aldaǵy ýaqytta ol blogyn odan ári damytyp, osy saladaǵy áriptesterimen tyǵyz baılanys ornatýdy josparlap otyr.





Joǵary qaraı