Aýa raıy
Astana 10 °S
Almaty 2 °S
valıýta baǵamy
USD 421.58
EUR 496.83
RUB 5.53
CNY 62.20

Ómirzaq Shókeev Shornaq turǵyndarymen kezdesip, eldiń usynys-pikirin tyńdady

2020 jyldyń 24 shilde 2020 18:23

TÚRKІSTAN. QazAqparat – Túrkistan oblysynyń ákimi Ómirzaq Shókeev Shornaq aýylynda qurylǵan jedel shtab otyrysyna qatysty. Óńir basshysy oqıǵa bolǵan sátte shuǵyl áreket etip, el tynyshtyǵyn saqtaýda júıeli jumys jasaǵan shtab jumysyna alǵysyn aıtty, dep habarlaıdy QazAqparat tilshisi.

Jıynnan soń aýyl turǵyndarymen kezdesken oblys ákimi keleńsiz jaǵdaıǵa baılanysty pikir bildirdi.

«Shornaq - myńjyldyq tarıhy bar meken. Keshe oryn alǵan jaǵdaı búkil elge tarap, yńǵaısyz jaǵdaı boldy. Yntymaǵy men birligi jarasqan aýyl úshin bul - uıat nárse. Árıne, áleýmettik jeliniń damyǵan ýaqytynda bul jaǵdaıdy burmalaıtyn arandatýshylardyń bolary anyq. Tek solardyń sózine ermeý kerek. El arasyna daý, irtki salǵan adamdarǵa qatań jaza qoldanylady. Al, sizder jastar men aǵa býyndy sabyrǵa shaqyryp, birlikterińizdi nyǵaıta túsińizder» degen óńir basshysy mundaǵy áleýmettik-ekonomıkalyq qajettilikterge basa nazar aýdarylatynyn jetkizdi.

Oblys ákiminiń sózin quptaǵan aýyl aqsaqaldary da óz oılaryn ortaǵa salyp, usynys-pikirlerin jetkizdi.

«Shornaq aýyly osy ýaqytqa deıin daý shyǵarǵan aýyl emes edi. Keshegi oqıǵa barlyǵymyzdy eseńgiretti. Sebebi, áleýmettik jeli arqyly jalǵan aqparat kóp tarady. Osyndaı jaǵdaıdyń oryn alýyna sebep bolǵan jastar úshin barlyqtaryńyzdan keshirim suraımyz. Biz, qazaq, ózbek - aǵaıyn halyqpyz. Tilimiz, dinimiz bir elmiz»,- dedi aýyl aqsaqaldary.

Sondaı-aq, basqosýda oblystyq ózbek etnomádenı birlestiginiń tóraǵasy aýyl turǵyndaryn birlikke, yntymaqqa shaqyrdy.

Eske sala keteıik, buǵan deıin áleýmettik jelide bir top azamat ózderiniń narazylyǵyn bildirgen beınejazba taraǵan bolatyn. Atalǵan oqıǵa Kentaý qalasyna qarasty Shornaq aýylynda bolǵan. Turmystyq janjaldy jergilikti polıtsııa qyzmetkerleri toqtatqan edi.

Búgin QR Іshki ister mınıstri Erlan Turǵymbaev Shornaqtaǵy jaǵdaı turaqtalyp, 4 adam qamaýǵa alynǵanyn jarııa etti.

Keıinnen Memleket basshysy Qasym-Jomart Toqaev Shornaqtaǵy jaǵdaı boıynsha oblys basshylyǵy jáne quqyq qorǵaý organdarymen jıyn ótkizip, Ómirzaq Shókeevtiń buzaqylyqty der kezinde tyıǵan tyńǵylyqty jumysyna joǵary baǵa berdi.

20 shilde kúni oryn alǵan oqıǵanyń jaı-japsary anyqtalyp, turǵyndar qazirgi tańda úırenshikti ómirge qaıtyp oralǵan.


Joǵary qaraı