Oralda zańsyz oıyn bıznesin uıymdastyrǵan eki turǵyn sottaldy

ORAL. QazAqparat – Oralda zańsyz oıyn bıznesin uıymdastyrǵan eki turǵyn sottaldy, dep habarlaıdy QazAqparat tilshisi.

BQO ekonomıkalyq tergeý departamenti zańsyz oıyn bıznesin uıymdastyrý boıynsha qozǵalǵan eki qylmystyq isti aıaǵyna deıin jetkizdi.

Departamentten túsken málimetke qaraǵanda, M.Tımofeev 2019 jyldyń mamyr aıynda zańsyz materıaldyq tabys tabý maqsatynda QR «Oıyn bıznesi týraly» Zańynda belgilengen oryndardan tys jerlerde tıisti lıtsenzııasyz qumar oıyndaryn ashqan.

Óziniń qylmystyq josparyn júzege asyrý úshin ol «OLX» ınternet kózindegi jarnamany qoldaný arqyly qumar oıyndaryn oınaýǵa qajetti qural-jabdyqtardy, atap aıtqanda, kompıýterler, teledıdarlar, túbirtikterdi basyp shyǵarýǵa arnalǵan termoprınter, skanerler satyp alǵan. Sodan keıin qalanyń turǵyndar kóp keletin jerinde eki ǵımaratty jalǵa alyp, B. jáne D. esimdi eki azamatty kassır-operator retinde jumysqa qabyldaǵan.

M.Tımofeev qajetti jabdyqty ornatqannan keıin «X Keno», «Fortuna» baǵdarlamalyq oıyndary negizinde sandardyń nátıjesi boıynsha tólemder qabyldap, zańsyz áreketterge barǵan. Ol salyq tóleýshi retinde memlekettik kirister organdarynda tirkelmegen, sondyqtan býkmekerlik keńseniń qyzmetin júzege asyrýǵa lıtsenzııasy joq.

Oral qalalyq sotynyń úkimimen QR QK 307-baby 1-bóligine sáıkes M.Tımofeev aıypty dep tanylyp, oǵan probatsııalyq baqylaý ornatylyp, bas bostandyǵy 1 jylǵa shekteldi.

Zańsyz oıyn bıznesin uıymdastyrǵan D.Berqalıevaǵa da osyndaı úkim shyǵaryldy.

Eske sala keteıik, budan buryn Batys Qazaqstanda 11 mln teńgeniń dári-dármegi tárkilengenin jazǵan bolatynbyz.