Aýa raıy
Astana 0 °S
Almaty 7 °S
valıýta baǵamy
USD 388.70
EUR 428.70
RUB 6.08
CNY 55.46

Orbulaq shaıqasy: Tarıhı qoıylym tamashalaǵandarǵa urys alańynda qalǵandaı áser berdi

2019 jyldyń 20 qazan 2019 17:52

TALDYQORǴAN. QazAqparat- Elbasynyń «Rýhanı jańǵyrý» jáne «Uly dalanyń jeti qyry» atty baǵdarlamalyq maqalasy men Altyn ordanyń 750 jyldyǵy aıasynda Taldyqorǵan atshabarynda Orbulaq shaıqasynyń tarıhı qoıylymy sahnalandy. Ashyq alańda shaıqasty jańǵyrtýǵa 1 500 adam tartyldy, dep habarlaıdy QazAqparat tilshisi.

Jońǵar shapqynshylyǵyndaǵy Orbulaq shaıqasy qazaq batyrlarynyń erligimen tarıhta qaldy. Oqıǵa 1643 jyly Jońǵar Alataýy bókterinde Orbulaq saıynda bolǵan. Jońǵarlardyń 50 myń qolyna qarsy Jáńgir han bastaǵan qazaqty nebári 600 sarbazy toıtarys berip, Samarqannan Jalańtós batyry qalyń qolymen jetkenshe jaýdy ustap turǵan. Bul shaıqas qazaq batyrlarynyń alǵash myltyq atyp, túrli ádis-aılalar qoldanýymen erekshelendi.







Jaýyngerler tereń or qazyp, betin jaýyp, jońǵarlardy sol jerge qulatqan. Sadaqshylar jasaǵy biraz jońǵardy ýly jebelerimen jer jastandyrady. Odan qalǵan jaýdy «sasyqteke» shóbinen daıyndalǵan ýly tútinmen ýlaıdy. Qazaq sarbazdary ózderi ýlanyp qalmaýy úshin betterin eshkiniń maıy jaǵylǵan shúberekpen tumshalap alady. Bul shaıqasta jaýyngerler urys taktıkalaryn durys qoldanyp, birlesken áreketteriniń arqasynda jaýdyń saǵyn syndyryp, keri sheginýine májbúrledi. Al Samarqannan jetken Jalańtós batyrdyń 20 myń qoly bul soǵysta jońǵarlardyń jeńilisine ákep soǵady.













Taldyqorǵan atshabarynda tarıhı oqıǵa barynsha shynaıy sýretteldi. Kórermender týra bir HVII ǵasyrǵa tap bolyp, urys alańynda qalǵandaı áser aldy. Kaskaderlar men kásibı akterlar urystyń shytyrmandylyǵyn eseleı tústi.

Shaıqasty qaıta jańǵyrtýǵa Qazaqstan Respýblıkasynyń eńbek sińirgen qaıratkeri, teatr jáne kıno akteri Bolat Ábdilmanov, «Myń bala» kınotýyndysymen áıgili bolǵan jas akterlar Asylhan Tólepov pen Aıan Ótepbergen qatysty.

Túrli tarıhı tulǵalardy somdap júrgen kásibı akter Bolat Ábdilmanovtyń aıtýynsha búgingi táýelsizdiktiń aq tańy batyr babalardyń erligi.

«El úshin, jer úshin, halqy úshin janyn pıda etip, ómirden ótse de osyndaı keń baıtaq jerdi qaldyryp ketti. Búkil álemde toǵyzynshy oryn alatyn jerdi qaldyryp ketkeni babalarymyzdyń erliginiń arqasy» - dep kórsetilimnen ózi de erekshe bir tebirenip, tolqyǵanyn, rýhtanǵanyn atap ótti.










Mamandar Orbulaq shaıqasyndaǵy qazaq batyrlarynyń erligi «300 spartandyqtardyń» erliginen esh kem emes ekenin, tarıhı oqıǵanyń «Borodıno», «Kýlıkovo» urystarynan qalys qalmaıtynyn aıtýda. Álemde bolǵan keıbir tarıhı shaıqastardy beıneleý sol eldiń namysy men batyldyǵyn, qaısarlyq rýhyn pash etýmen birdeı.

Mundaı qoıylymdar týrısterdiń ádeıi izdep kelip tamashalaıtyn nysanyna aınalǵan. Talydqorǵandaǵy kórsetilimge Nur-Sultan men Almatydan jáne basqa qalalardan halyq arnaıy keldi. Qonaqtar arasynda sheteldikter de boldy.

Shaıqasty tamashalaǵan jurt óz áserlerin áleýmettik jelilerde qaldyryp, buqaralyq aqparat quraldarynyń ókilderimen de bólisip jatty. Áıgili dızaıner, sán úıiniń dırektory Gaýhar Ótelbaeva pikir bildirdi.

«Men kóptegen tarıhı kitaptardy oqyǵan adam retinde Orbulaq shaıqasynan erekshe áser aldym. Tipti otyrǵan jerimnen qulap qala jazdadym. Urys alańynda júrgen árbir jaýyngerge, qoıylymnyń árbir sıýjetine qyzyǵa da, qyzǵana qaraı berdim. Akterlar men kaskaderlardyń oıyndarynyń shynaıylyǵyn uıaly telefonnyń kamerasy jetkize almaıdy. Sondyqtan mundaı qoıylymdy kelip tamashalaý qajet. Uıymdastyrýshylar jobany jalǵastyrýǵa mindetti. Al bilim salasyndaǵy basshylar Taldyqorǵanǵa oqýshylar men stýdentterdi elimizdiń barlyq aımaǵynan ákelip, olardyń kórýine múmkindik berý kerek. Orbulaq shaıqasynda patrıotızm de, rýhanı jańǵyrý da bar», - dedi Gaýhar Ótelbaeva.

Sharanyń joǵary deńgeıde ótýine uıytqy bolǵan Almaty oblysynyń ákimi Amandyq Batalov Orbulaq shaıqasyn dáripteý «Rýhanı jańǵyrý» baǵdarlamalyq maqalasy aıasynda áli de jalǵasady dep atap ótti. Bolashaqta derekti fılmder túsirip, shaıqasty kórkem fılm retinde usyný jaǵyn qarastyrý kerek ekenin aıtqan óńir basshysy oıyn bul urpaq tárbıesinde mańyzy zor joba dep qortyndylady.

Taldyqorǵan ıppodromyndaǵy aýqymdy shara tek shaıqas kórsetilimimen shektelgen joq. 2 tonna baýyrsaq pisirilip qonaqtarǵa tegin taratyldy. Osylaısha uıymdastyrýshylar Qazaqstan rekordtar kitabynyń sertıfıkatyna ıe boldy.

Sondaı-aq ulttyq qolóner sheberleri, ustalar men zergerler sheberlik sabaqtaryn ótkizdi. Ulttyq kıim úlgileriniń kórsetilimi bolyp, qazaq kúresi, jamby atý, sadaq atýdan, asyq oınaýdan saıystar uıymdastyryldy. Shara sońynda Balpyq bıdiń 325 jyldyǵyna oraı at sporty oıyndary ótti.



















Joǵary qaraı