Aýa raıy
Astana -4 °S
Almaty 4 °S
valıýta baǵamy
USD 421.58
EUR 496.83
RUB 5.53
CNY 62.20

Ordabasy  aýdanynda jol apatynan kóz jumǵandar sany alty adamǵa jetti

2020 jyldyń 25 qyrkúıek 2020 09:27

ORDABASY. QazAqparat - Túrkistan oblysy, Ordabasy aýdanynda jol apatynan opat bolǵandar sany alty adamǵa jetti. Bul týraly oblystyq jedel járdem qyzmetiniń basshylyǵy málimet taratty, dep habarlaıdy QazAqparat tilshisi.

Túrkistan oblystyq jedel járdem stantsııasynyń bas dárigeri Dáýlet Musaevtyń aıtýynsha, bes adam oqıǵa ornynda kóz jumǵan. Al, altynshy adam jedel járdem qyzmetimen Ordabasy aýdandyq aýrýhanasyna barar jolda jan tapsyrǵan. Qaıtys bolǵandardyń arasynda bir otbasynyń músheleri bar. Kýágerlerdiń sózinshe, kóliktiń biri burylmaq bolyp turǵanda, ekinshisi kelip soqqan. Soqqynyń qatty bolǵany sonshalyq, kóliktiń biri jaramaı qalǵan. Ázirge belgilisi, «VAZ» avtokóligi Reseı Federatsııasynda tirkelgen.

«Qazirgi tańda jol-kólik oqıǵasyna baılanysty Túrkistan oblystyq PD anyqtaýshylarymen QR QK 345-baby 4-shi bóligine sáıkes (Jol erejelerin óreskel buzý saldarynan adam ólimine alyp kelgen) sotqa deıingi tergeý amaldary júrgizilýde. Saraptamalar taǵaıyndaldy. Tergeý barysynda bolǵan oqıǵanyń mán-jaıy anyqtalatyn bolady», deıdi oblystyq PD baspasóz qyzmetiniń jetekshisi Saltanat Qarakózova.

Ordabasy aýdandyq aýrýhanasyna jetkizilgen eki er adam jansaqtaý bólimine jatqyzylǵan. Dárigerler es-túzsiz kúıde túsken 34 jastaǵy jigittiń jaǵdaıyn óte aýyr deıdi. Oǵan ota jasalǵan. Ekinshi naýqas ta túrli dene jaraqattaryn alyp, gıpske tańylǵan.

Esterińizge sala keteıik, jol apaty 23 qyrkúıek kúni Badam aýylynyń janyndaǵy Arys-Shymkent avtojolynda oryn alǵan bolatyn. Onda «VAZ» jáne «Mazda» avtokólikteri soqtyǵysqan edi. Oblystyq PD alǵashynda oqıǵa ornynda úsh adamnyń qaıtys bolǵanyn habarlaǵan edi.


Joǵary qaraı