Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Óskemende polıtsııa qyzmetkerine dóreki minez kórsetken mas turǵynnyń vıdeosy jelige tarady

2022 jyldyń 24 qańtar 2022 16:43

ÓSKEMEN. QazAqparat – Áleýmettik jelide arandatýshynyń áreketterine salqynqandylyq tanytqan polıtsııa qyzmetkerleri týraly vıdeo tarady, dep habarlaıdy QazAqparat tilshisi.

Áleýmettik jelide taraǵan vıdeoda shaqyrtýǵa kelgen polıtsııa qyzmetkerine er adam balaǵat sózder aıtyp, ony arandatýǵa tyrysady. Jeli qoldanýshylary ýchaskelik polıtsııa ınspektorynyń sabyrlyǵyna súısinýde.

Óskemen qalalyq Polıtsııa basqarmasy baspasóz qyzmetiniń málimetinshe, atalǵan vıdeodaǵy tártip saqshysy – Ertis bóliminiń ýchaskelik ınspektory, polıtsııa kapıtany Alekseı Balandın. Alekseı memlekettik tildi jetik meńgergen.

«20 qańtarǵa qaraǵan túni kezekshilikte bolǵan edim. Negizinen, adamdar túnde tynyshtyqtyń buzylǵandyǵy týraly shaǵymdarmen jıi júginedi. Osy jerge sondaı qońyraýlardyń biri boıynsha keldim. Esikti ashqan azamat mas boldy. Bizdi kameraǵa túsire bastady. Kún saıyn osy syndy jaǵdaılarǵa tap bolyp jatamyz. Basty mindetimiz – azamattardyń tynyshtyǵyn qamtamasyz etý jáne quqyq buzýshylyqtyń aldyn alý», - deıdi A.Balandın.

Aıta keteıik, quqyq buzýshyǵa qatysty QR ÁQBtK-niń 437-babyna (tynyshtyqty buzý) sáıkes ákimshilik hattama toltyrylǵan.






Joǵary qaraı