Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Ózbekstanda Prezıdent saılaýyna qatysty úmitkerlerdiń úgit-nasıhaty ótýde

2021 jyldyń 21 qyrkúıek 2021 09:47

TAShKENT. QazAqparat – Ózbekstanda 20 qyrkúıekte Ózbekstan Respýblıkasy Prezıdenttigine úmitkerlerdiń saılaýaldy úgit-nasıhat jumystary bastaldy. Bul týraly QazAqparat tilshisi Ózbekstan Respýblıkasy Ortalyq saılaý komıssııasynyń baspasóz qyzmetine silteme jasap habarlaıdy.

Ózbekstan Respýblıkasy Ortalyq saılaý komıssııasynyń qaýlysyna oraı bastalǵan saılaýaldy úgit-nasıhat jumystary kezinde prezıdenttikke úmitkerlerdiń buqaralyq aqparat quraldaryna shyǵý reti tómendegideı etip kórsetilgen:

Birinshi – Ózbekstan Ekologııalyq partııasynan Ózbekstan Prezıdenttigine úmitker – Narzýllo Oblomýradov;

ekinshi – Ózbekstan Halyq demokratııalyq partııasynan Ózbekstan Prezıdenttigine úmitker – Maksýda Varısova;

úshinshi – Kásipkerler men iskerler qozǵalysy – Ózbekstan Lıberaldy-demokratııalyq partııasynan Ózbekstan Prezıdenttigine úmitker – Shavkat Mırzıeev;

tórtinshi – Ózbekstan «Mıllıı Tıklanısh» demokratııalyq partııasynan Ózbekstan Prezıdenttigine úmitker – Alısher Qodırov;

besinshi – Ózbekstan «Adolat» sotsıal-demokratııalyq partııasynan Ózbekstan Prezıdenttigine úmitker – Bahrom Abdýhalımov.

Saılaýaldy úgit-nasıhat kezeńinde Prezıdenttikke úmitkerler úshin Ózbekstan Ulttyq teleradıokompanııasynyń respýblıkalyq jáne jergilikti teleradıoarnalarynda bólingen tegin efır kólemi men ýaqyty, negizgi respýblıkalyq basylymdar men jergilikti gazetterde aqysyz bólinetin baspa beti de bekitildi. Prezıdenttikke úmitkerler jáne olardyń senimdi ókilderi saılaýshylarmen kezdesýler ótkizý arqyly da saılaýaldy úgit-nasıhat jumystaryn ótkizý múmkindigine ıe.

Ózbekstan Respýblıkasy Ortalyq saılaý komıssııasy pandemııa jaǵdaıynda saıası partııalardyń saılaýaldy sharalaryn, úmitkerlerdiń kezdesýleri jáne basqa da is-sharalardy beınekonferentsbaılanys túrinde, al qajet bolǵan jaǵdaıda ashyq keńistikte nemese jabyq ǵımarat syıymdylyǵynyń 50 paıyzynan aspaıtyndaı mólsherdegi qatysýshylarmen uıymdastyrýdy usynýda.

Eske sala keteıik, Ózbekstan prezıdentin saılaý 24 qazanda ótedi. Ózbekstan saılaý zańdylyǵyna oraı saılaý kúni jáne oǵan bir kún qalǵanda saılaýaldy úgit-nasıhat jumystaryna jol berilmeıdi.



Avtor Tursynáli Ahmedov
Basty sózder: Ózbekstan, Saılaý, Qoǵam,
Joǵary qaraı