Aýa raıy
Astana -17 °S
Almaty 3 °S
valıýta baǵamy
USD 421.58
EUR 496.83
RUB 5.53
CNY 62.20

Pandemııa balalardyń smartfonǵa qumarlyǵyn arttyryp, kóz aýrýyn kóbeıýine soqtyrýda – depýtat

2020 jyldyń 28 qazan 2020 16:40

NUR-SULTAN. QazAqparat – Májilis depýtaty Murat Temirjanov balalar oftalmologııasy salasyndaǵy kemshilikterdi keltirip, Úkimet basshysyna depýtattyq saýal joldady, dep habarlaıdy QazAqparat tilshisi.

«Ókinishke qaraı koronavırýs pandemııasy bizdiń balalarymyzǵa smartfondy, kompıýterler men basqa da gadjetterdi burynǵydan kóbirek qoldanýyna ıtermeledi. Munyń saldary kórý qabiletin nasharlatady. Kóptegen elde balalardyń kórý qabiletiniń azaıýýy – ulttyq qaýip retinde moıyndaldy. Balalardy qaraıtyn oftalmologtardyń joqtyǵy jaǵdaıdy tipti qıyndatyp tur. Al jetekshi oftalmologııalyq emhanalar adamdardy 18 jastan bastap qana qabyldaıdy», - deıdi ol.

Depýtat qazirgi qashyqtan oqytý kezinde dene shynyqtyrý sabaǵynyń ózi esse jazý kúıinde ótip jatqanyn mysalǵa keltirdi.

«Kózin qaratý úshin aqsha taba almaı jatqan adamdarǵa qalaı kómektesemiz? Densaýlyq saqtaý mınıstrliginen alǵan jaýaptan bul jaǵdaıda memleketten kómek bolmaıtynyn uqtyq. Al áleýmettik jelini aqtaryp otyryp, kúnde-kúnde kómek kútken naýqastardyń sýretin kóremiz», - dedi ol.

Osy máselelerdi aıta kele Murat Temirjanov birneshe usynys bildirdi.

«Osyǵan baılanysty Úkimetten balalar oftalmologııasy salasyndaǵy jaǵdaıǵa túzetý engizip, shuǵyl sharalardy qabyldaýdy suraımyz. Sonymen qatar azamattardyń densaýlyǵyna mán berip, áleýmettik jelilerge kúndelikti monıtorıng júrgizip, kómek berilýi tıis naqty adamdardyń sanatyn anyqtaý kerek», - dedi ol.


Avtor Aıan Bekenuly
Basty sózder: Karantın, Medıtsına, Parlament,
Joǵary qaraı