Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Pandemııa muǵalimderdiń jumysyna qalaı yqpal etti – Mınıstr qorytyndysy

2021 jyldyń 13 maýsym 2021 13:08

NUR-SULTAN. QazAqparat – Pandemııa jaǵdaıy muǵalimniń basty qyzmeti tek aqparat berý emes, balalarǵa qoldaý kórsetý, janashyrlyq tanytý, olardy yntalandyrý, kómek qolyn sozyp, tálimger bolý ekenin de aıqyndap berdi. Bul pikirdi QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat.

«Sizderdi 26 mamyr - 20 maýsym aralyǵynda jazǵy mektepterdiń jumysyna belsene qatysýǵa shaqyramyn. Bıylǵy sońǵy qońyraý merekesinde erekshe sezimge bólengenińizdi bilemin. Óıtkeni, bir jaǵynan oqý jyly aıaqtalyp jatsa, ekinshi jaǵynan – jazǵy mektepter jumys isteı bastady. Biz mundaı jaǵdaıdyń qaıtalanbaýy úshin qoldan kelgenniń bárin jasaımyz. Qashyqtan bilim berýde áriptesterim áleýmettik jelilerdi belsendi ári erkin meńgere bastap, óz sabaqtaryna oıyn elementterin engize bastaǵanyn erekshe atap ótkim keledi. Biz, árıne, osyndaı kásipqoı mamandarymyzdy únemi qoldap, olardy basqalar úshin úlgi etemiz. Bul úrdis umytylmaı, kerisinshe, odan da úlken áserge ıe bolady dep úmittenemin», - dep jazdy mınıstr Facebook jelisinde.

Mınıstr oqýshylarǵa tárbıe berý máselesi muǵalim jumysynda óte mańyzdy ekenin atap ótti.

«Bul baǵytta ata-analarmen birlese jumys istelýi tıis. Siz balamen onyń janynda otbasy men jaqyndary bolmaıtyn bóten ortada jumys istep, oqýshynyń boıynda bolýy múmkin problemalary týraly ata-analaryna der kezinde aıta alasyz. Bala otbasynda da, mektepte de oǵan basa nazar aýdarylatynyn sezinýi kerek. Buǵan tek ata-analarmen tyǵyz baılanysta, olarmen teń jáne seriktestik qarym-qatynas qurý arqyly qol jetkizýge bolady. Balalardyń qyzyǵýshylyǵyn oıatyp, olardy qatelikteri úshin aıyptamańyz. Kerisinshe, qateligin túzetýge kómektesińiz. Sáttilikke ulaspaǵan áreketinen keıin úmit pen senimdi joǵaltpaýǵa úıretińiz. Balalar ózgeshe oılap, óz pikirin bildirgenderi úshin olardyń upaılaryn tómendetpeńiz», - dep keńes berdi Bilim mınıstri.

Sonymen birge mınıstr qazir balalardyń barynsha túsinistikpen qaraýdy asa qajet etetinin, olarǵa mahabbat pen qamqorlyq kerek ekenin aıtty.

«Biz búldirshinderimizdiń mektepke baryp, bilim alǵandaryn qalaımyz. Sonymen qatar balalarymyzdy basqalarmen salystyrǵanymyzdy toqtatý kerek. Pandemııa jaǵdaıy muǵalimniń basty qyzmeti tek aqparat berý emes, balalarǵa qoldaý kórsetý, janashyrlyq tanytý, olardy yntalandyrý, kómek qolyn sozyp, tálimger bolý ekenin de aıqyndap berdi. Búginginiń balalary múldem ózgeshe, olar ózderin erkin ustaıdy. Endigi kezekte olardyń boılaryndaǵy jaqsy qasıetterdi saqtap, odan ári damytý – bizdiń basty mindetimiz», - deıdi A. Aımaǵambetov.

Sóz sońynda mınıstr áriptesterin vaktsınalaý naýqanyna belsendi qatysýǵa shaqyrdy.

«Qymbatty áriptes! Sizdi vaktsınalaý naýqanynda belsendi azamattyq ustanymyńyzdy tanytyp, vaktsınatsııa týraly ǵylymı derekterdi taratý barysynda kómek kórsetýińizdi suraımyn. Sondaı-aq atalǵan taqyryp aıasyndaǵy jalǵan aqparatpen kúresýge shaqyramyn. Men oqytýdyń dástúrli formatyn qoldaımyn jáne búldirshinderimiz úshin mektep esikteri aıqara ashylady dep úmittenemin. Halyq vaktsınalaý naýqanyna neǵurlym belsendi qatyssa, ádettegi ómir yrǵaǵyna soǵurlym tezirek oralatynymyz sózsiz.

El Prezıdenti Qasym-Jomart Toqaevtyń turaqty qoldaýynyń arqasynda pandemııa zardaptaryn azaıtý múmkindigine ıe boldyq. Qıyndyqtardy eńserip, oqý úrdisin qamtamasyz ete aldyq. Osy qıyn-qystaý kezeńde men Sizben birlese otyryp, jumys isteý qurmetine ıe boldym. Túsinistik tanytyp, qoldaý kórsetkenińiz úshin jáne adal qyzmetińiz úshin alǵys bildiremin! Baǵa jetpes ustazdyq eńbegińiz úshin, jankeshti jumysyńyz ben kez kelgen ýaqytta balalarymyzǵa tireý bolýǵa degen izgi nıetińiz úshin raqmet! Siz – naǵyz batyr, bıylǵy oqý jylynyń basty keıipkeri atandyńyz. Sizge sáttilik, myqty densaýlyq tileımin! Ózińiz ben jaqyndaryńyzǵa janashyr bolyńyz! Jazǵy demalys kezinde jaqsy demalyp, jańa oqý jylyna kúsh-qýatpen oralýyńyzdy tileımin. Jańa oqý jylynda jolyqqansha!», - dep atap ótti Bilim mınıstri.

Avtor Aıjan Serikjanqyzy
Basty sózder: Koronavırýs, Bilim,
Joǵary qaraı