Parlamentke kelesi jyly 31 zań jobasy engiziledi - Úkimet

NUR-SULTAN. QazAqparat – QR Úkimeti 2022 jyly 31 zań jobasyn ázirleıdi. Bul týraly QR Ádilet mınıstri Marat Beketaev aıtty, dep habarlaıdy QazAqparat tilshisi.

«2022 jylǵa arnalǵan Úkimettiń zań jobalaý jumystary josparynyń jobasynda 31 zań jobasyn ázirleý kózdelgen. Onyń ishinde birinshi jartyjyldyqta Parlamentke – 11 zań jobasyn jáne ekinshi jartyjyldyqta 20 zań jobasyn engizý qajet. Jalpy, jospar jobasy Prezıdent pen memlekettiń strategııalyq qujattarynda aıqyndalǵan mindetter negizinde ázirlendi», - dedi mınıstr búgin Úkimet otyrysynda.

Máselen, onyń atap ótýinshe, «Qazaqstan Respýblıkasynyń Áleýmettik kodeksi», «Kásibı biliktilikter týraly» jáne «Aglomeratsııalardy damytý týraly» zań jobalaryn ázirleý Memleket basshysynyń osy jylǵy 1 qyrkúıektegi Joldaýyn iske asyrý jónindegi Jalpyulttyq is-sharalar josparynan týyndaıdy.

«Budan basqa, tutynýshylardyń quqyqtaryn qorǵaý, sáıkestikti baǵalaý jáne jylý energetıkasyna qatysty jańa zań jobalaryn ázirleý josparlanýda. «Quqyqtyq aktiler týraly» Zańǵa sáıkes jospardyń jobasy Memleket basshysymen kelisýge jatady. Jospar jobasyn Prezıdent Ákimshiligine jiberý usynylady», - dedi Marat Beketaev.