Aýa raıy
Astana 11 °S
Almaty 12 °S
valıýta baǵamy
USD 421.58
EUR 496.83
RUB 5.53
CNY 62.20

Pavlodar oblysynda 750 provızorlyq oryn jabyldy

2020 jyldyń 4 tamyz 2020 17:48

PAVLODAR. QazAqparat – Pavlodar oblysynda jedel járdemge túsetin shaqyrýlar sany 50 paıyzǵa azaıdy. Bul týraly onlaın apparattyq jıynda oblys ákiminiń orynbasary Aızada Qurmanova málim etti dep habarlaıdy Pavlodarnews.kz.

- Ótken aptada Moıyldydaǵy provızorlyq 500 oryn, Aqsýdaǵy «Eýrazııa» medıtsınalyq ortalyǵyndaǵy 80 oryn, «Baıantaý» sport saraıyndaǵy 150 oryn jabyldy. Qazirgi ýaqytta provızorlyq oryndardyń 26,5 paıyzynda naýqastar jatyr, - dedi Aızada Qurmanova.

Sonymen qatar, shilde aıynyń basynda jedel járdemge kelip túsetin shaqyrý sany 1128 bolsa, bul kórsetkish 50 paıyzǵa qysqaryp, ótken táýlikte 565 shaqyrýǵa azaıǵan.
Oblys aýmaǵynda karantın talaptaryn 30 monıtorıng toby baqylaıdy. 27 shilde men 2 tamyz arasynda 30 tekserý júrgizilip, 27 ereje buzýshylyq anyqtalǵan. Atalǵan faktilerge qatysty 19 ákimshilik quqyqbuzýshylyq hattamasy toltyryldy.
Oblys ákimi Ábilqaıyr Sqaqov óńirde koronavırýsqa qatysty jaǵdaı turaqtalyp kele jatqanymen bosańsýǵa bolmaıtynyn atap ótti.
- Kúzge daıyndalýymyz kerek. Tájirıbemiz bar. Naqty sharalardyń josparyn quryp, kúz kelmeı turyp dál qazir ne isteıtinimizdi, medıtsına salasynyń tolyq daıyndyǵy úshin qandaı qosymsha amal qoldanatymyzdy bekitý qajet, - dedi oblys ákimi.

Aıta keteıik, qazirgi ýaqytta Pavlodar oblysynda koronavırýs juqtyrǵan 3359 adam anyqtalǵan. 2022 adam jazylyp shyqsa, 28 adam kóz jumdy.


Joǵary qaraı