Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Pavlodar oblysynyń Aqsý qalasyna jańa ákim taǵaıyndaldy

2021 jyldyń 22 qańtar 2021 16:00

AQSÝ. QazAqparat - Osyǵan deıin ákim qyzmetin atqaryp kelgen Balǵabaı Ybyraev qala basshysy qyzmetinen óz erkimen ketti. Oblys ákimi Ábilqaıyr Sqaqov Aqsý ákimi qyzmetinde eki jyldan astam ýaqyt boıy atqarǵan jumysy úshin Balǵabaı Ybyraevqa alǵysyn bildirdi, dep habarlaıdy QazAqparat.

- Turǵyn úı qurylysy belsendi júrgizildi, kóptegen iri áleýmettik jobalar iske asyryldy, Sizdiń tájirıbeńiz ben bilimińiz bizdiń óńir turǵyndary úshin paıdaly bolady dep senemin. Sizge aldaǵy jumystaryńyzǵa tabys, otbasyńyzǵa amandyq jáne zor densaýlyq tileımin, - dedi óńir basshysy Balǵabaı Ybyraevqa.

Aqsý qalasynyń ákimi laýazymyna usynylǵan Nurjan Áshimbetovtiń kandıdatýrasyn qalalyq máslıhat depýtattary biraýyzdan qoldady.

Jańa qala basshysyn tanystyra otyryp, oblys ákimi Nurjan Áshimbetovtiń bıliktiń atqarýshy jáne ókiletti organdarynda mol tájirıbesi bar ekenin atap ótip, onyń aldyna birinshi kezektegi mindetter qoıdy.

- Ónerkásip óndirisiniń, elektr energııasynyń ósýin, óńdeý ónerkásibin damytýdy qamtamasyz etý qajet. Sondaı-aq ekonomıkany ártaraptandyrý, shaǵyn jáne orta bıznesti, shaǵyn ındýstrııalyq aımaqtardy damytý jáne jeke ınvestıtsııalardy tartý boıynsha belsendi jumys júrgizý qajet. Aqsý aýyldyq aımaǵynyń áleýeti zor – buǵan nazar aýdarý kerek,- dedi óńir basshysy.

Budan basqa, Aqsý qalasynda memlekettik baǵdarlamalardy iske asyrý jáne turǵyn úı qurylysyn aıaqtaý oblys basshylyǵynyń erekshe baqylaýynda bolady.

Nurjan Áshimbetov 1969 jyly Pavlodar oblysy Lebıaji aýdany Chernoe aýylynda dúnıege kelgen.

1993 jyly Almaty zooveterınarlyq ınstıtýtyn «Zooınjener» mamandyǵy boıynsha, 2002 jyly Almaty Ekonomıka jáne statıstıka ınstıtýtyn «býhgalter-ekonomıst» mamandyǵy boıynsha, al 2014 jyly Reseı halyq sharýashylyǵy jáne memlekettik qyzmet akademııasyn «memlekettik jáne mýnıtsıpaldyq basqarý» mamandyǵy boıynsha támamdaǵan.

Eńbek jolyn 1993 jyly Pavlodarda «Sáýle» kontserniniń qyzmetkeri bolyp bastaǵan. Sol jyly Pavlodar memlekettik múlik jónindegi aýmaqtyq komıtetinde istedi.

1994-1995 jyldary – «Maqsat» jastar turǵyn úı kooperatıviniń mamany. 1995 jyldan Pavlodar aýmaqtyq memlekettik múlik komıtetiniń mamany, bas mamany.

1996 jyly USAID jobasynyń Pavlodar oblysyndaǵy «Karana» korporatsııasynyń keńesshisi boldy.

1996 jylǵy jeltoqsannan 1997 jylǵa deıin «Remek» konsaltıngtik fırmasynyń dırektory, 1997-1998 jyldary Lebıaji aýdanyndaǵy óndiristik kooperatıvtiń tóraǵasy, 1998-1999 jyldary sol aýdandaǵy agrofırmanyń dırektory.

1999 jyly Aqtoǵaı aýdany ákiminiń orynbasary bolyp taǵaıyndaldy. 2001 jyldan 2006 jylǵa deıin Lebıaji aýdanynyń ákimi qyzmetin atqardy.

2006-2008 jyldary Pavlodar oblysy aýyl sharýashylyǵy basqarmasynyń basshysy.

2008-2009 jyldary Qazaqstan Respýblıkasy Prezıdenti Ákimshiliginiń memlekettik ınspektory.

2009 jyly Petropavl qalasynyń ákimi bolyp taǵaıyndaldy. 2012-2016 jyldary - Pavlodar oblysy ákiminiń orynbasary.

2016 jyly Pavlodar qalasynyń ákimi laýazymyna taǵaıyndaldy, al 2018 jyldan 2019 jylǵa deıin Ekibastuz qalasynyń ákimi boldy.

2019 jylǵy qyrkúıekte Qazaqstan Respýblıkasy Parlamenti Májilisi VI shaqyrylymyndaǵy depýtaty boldy.



Sýretti túsirgen Valerıı Býgaev


Joǵary qaraı