Aýa raıy
Astana -9 °S
Almaty -12 °S
valıýta baǵamy
USD 421.58
EUR 496.83
RUB 5.53
CNY 62.20

Petropavl mańynda zańsyz aǵash kesýshi áleýmettik jeliniń kómegimen ustaldy

2020 jyldyń 27 qarasha 2020 13:42

PETROPAVL. QazAqparat – Petropavl mańyndaǵy ormannyń birinde jumys istegen zańsyz aǵash kesýshini ormanshylar áleýmettik jelide jarııalanǵan foto kómegimen qolǵa túsirdi, dep habarlaıdy QazAqparat tilshisi.

Áleýmettik jeli qoldanýshylarynyń biri Petropavl mańyndaǵy áýejaıǵa baratyn ormanda bireýlerdiń aǵash kesip jatqanyn túsirip, saý aǵashtardyń otalyp jatqanyna narazylyǵyn bildirdi. Onyń bul jazbasy kópshilik tarapynan qoldaý taýyp, talqyǵa tústi.

Jazbany áleýmettik jelige monıtorıng júrgizgen «Qyzyljar orman sharýashylyǵy» KMM qyzmetkerleri de kórgen.

«24 qarasha kúni áýejaıǵa barar joldaǵy ormannan aǵashty artyp jatqan traktordyń sýretin kórdik. Birden oqıǵa ornyna bardyq. Orman sharýashylyǵy aýmaqtyq ınspektsııasymen birge aǵash kesilgen aýmaqty tekserdik.

Biz jyl saıyn ormandardyń jaǵdaıyn anyqtaý boıynsha tekseris júrgizemiz. Bul jerde qurt jegen, qýraı bastaǵan 55 tekshe metr aǵash kesilýi tıis bolatyn. Biraq Ignatenko degen azamatqa bul kólem az bolyp, ol ári qaraı aǵashty zańsyz kesken. Osylaısha belgilengen shekaradan shyǵyp, 9 tekshe metr aǵashty ruqsatsyz kesip alǵan. Qazirgi tańda keltirilgen shyǵyn mólsheri esepteldi. Іs quqyq qorǵaý oryndaryna berilip, tergeý júrip jatyr. Al qylmys quraldary: balta, ara jáne traktor tárkilenip, polıtsııaǵa berildi», - deıdi «Qyzyljar orman sharýashylyǵy» KMM jetekshisi Qaırat Qalyqov.

Mamannyń aıtýynsha, kelgen shyǵyn mólsheri – 254 myń teńge.

Aǵash kesken adam sharýashylyqtyń jumysshysy. Jalpy mundaı zańbuzýshylyqtar jıi bolyp turady. Bıyl Qyzyljar aýdany, Petropavl qalasy boıynsha 5 jaǵdaı tirkeldi. Bul – byltyrǵydan 3-4 ese az.

«Bir apta buryn ǵana 20 tekshe metr aǵashty zańsyz keskenderdi ustadyq. Іsti sońyna jetkizý úshin aptaǵa jýyq ýaqyt ketti. Kóp jaǵdaıda ruqsatsyz aǵash keskenderdi qolǵa túsirý qıyn, ornyn sıpap qalamyz. Óıtkeni tehnıka az, mamandar jetkiliksiz, úlken aýmaqty únemi nazarda ustaý qıyn», - deıdi Qaırat Qalyqov.


Joǵary qaraı