Aýa raıy
Astana -25 °S
Almaty -2 °S
valıýta baǵamy
USD 421.58
EUR 496.83
RUB 5.53
CNY 62.20

Petropavlda áıel ınternet arqyly kóılek satamyn dep 265 myń teńgesinen aıyryldy

2020 jyldyń 28 qarasha 2020 04:00

PETROPAVL. QazAqparat – Soltústik Qazaqstan oblysynda bir kúnde ınternet alaıaqtarynan zardap shekken úsh adam polıtsııaǵa aryzdandy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, 48 jastaǵy petropavldyq áıel ınternette toı kóılegin satpaq bolady. Kóp uzamaı «satyp alýshy» habarlasyp, aqsha aýdarý úshin bank kartasyn eki jaqtan fotosýretke túsirip jiberýdi suraıdy. Áıel kelisken, al kóp uzamaı onyń shotynan 265 myń teńge aqshasy joǵalǵan.

Bank nesıe berýden bas tartqan 1981 jyly týǵan taǵy bir Petropavl turǵyny ınternette osyndaı jaǵdaıda «kómek» týraly jarnamaǵa tap bolady. Alaıaq kórsetetin qyzmeti úshin alatyn somanyń 10%, ıaǵnı 111 myń teńgeni aldyn ala aýdarýdy talap etken. Er adam qajetti somany jiberisimen-aq «kómekshi» baılanysqa shyqpaı qoıǵan.

Al Shalaqyn aýdanynyń 19 jastaǵy turǵyny jıǵan-tergeni jáne anasynyń aqshasy bar, barlyǵy - 450 myń teńgesinen aıyryldy. Telegram messendjeri arqyly habarlasyp júrgen tanysy qyzǵa paıdaly bızneske aqsha salyp paıda tabýdy usynǵan. Qashyqtan bilim alyp júrgen stýdent shákirtaqysyn jumsamaı jınaǵan eken. Ol kelisip, beıtanys adamǵa 50 myń teńgeni aýdarady. Keıin jábirlenýshi óziniń barlyq aqshasyn jáne anasynyń aqshasynyń bir bóligin, ıaǵnı 400 myń teńgeden astam somany aýdaryp jibergen. Birneshe kún ol ýáde etilgen kiristi kútip, túspegennen keıin polıtsııaǵa júgindi.

«Qylmyskerler kóbinese psıhologııalyq qysym jasaıdy, tez baıý múmkindigin jiberip almaý úshin jedel sheshim qabyldaý kerek dep sendiredi. Beıtanys adamdardyń kúmándi usynystaryna senbeńiz. Sonymen qatar, biz taǵy da bank kartasynyń artynda jazylǵan CVV kodty eshkimge aıtpaý kerektigin eske salamyz. Bul - qupııa aqparat. Qylmysker kartanyń nómirin jáne osy kodty bile otyryp, basqa bireýdiń esebinen onlaın-tólem jasaýy múmkin. Mundaı derekterdi eshkimge senip berýge bolmaıdy», - deıdi SQO Polıtsııa departamenti Krımınaldyq polıtsııa basqarmasynyń erekshe tapsyrmalar jónindegi aǵa jedel ýákili Vıtalıı Podchernın.


Joǵary qaraı