Aýa raıy
Astana 9 °S
Almaty 11 °S
valıýta baǵamy
USD 412.55
EUR 468.66
RUB 5.79
CNY 58.80

Petropavlda maskasyz reıdke shyqqan sheneýnik endi ózi aıyppul tólemek

2020 jyldyń 7 tamyz 2020 17:42

PETROPAVL. QazAqparat – Petropavlda karantın talaptarynyń oryndalýyna jedel áreket etý toby brıfıng ótkizip, esep berdi, dep habarlaıdy QazAqparat tilshisi.

Soltústik Qazaqstan oblysynda shilde aıynyń sońynda qurylǵan jedel áreket etý tobyna prokýrorlar, oblystyq, qalalyq ákimdik qyzmetkerleri, polıtseıler, sanıtarııalyq dárigerler, densaýlyq saqtaý mamandary, sybaılas jemqorlyqqa qarsy jáne ekonomıkalyq tergeý qyzmetiniń ókilderi kirgen.

«Jedel áreket etý toby Ahýal ortalyǵyna túsken shaǵymdardy tekserýden bólek reıdterge jıi shyǵady. Kólik, qoǵamdyq tamaqtaný oryndary, meıramhanalar men azyq-túlik dúkenderi, bazarlar, demalys oryndary, monsha-saýnalar men basqa nysandar únemi bizdiń nazarymyzda. 184 nysan tekserilip, sonyń 46-synda zańbuzýshylyqtar anyqtaldy», - deıdi SQO prokýrorynyń orynbasary, jedel áreket etý tobynyń jetekshisi Murat Qojamqulov.

Máselen Ahýal ortalyǵyna «Grın park» demalys ornynda toıdyń ótip jatqandyǵy týraly habar túsken. Aqparat rastaldy. Petropavl turǵyndary úılený toıyna 40 shaqty qonaq shaqyrǵan. Іs-sharany uıymdastyrýshylardyń biri – qalalyq aýrýhanalardyń birindegi provızorlyq statsıonardyń ákimgeri bolyp shyqty. Mobıldi top toıdy taratyp jiberdi. Materıal jınalyp, shara qoldaný úshin Petropavl qalasynyń taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberildi.

Al «Berezovaıa roa» demalys ornynda mobıldi top 30 adamnyń qatysýymen bolyp jatqan toıdyń ústinen tústi. Karantın talabyn buzǵandar zań boıynsha jaýap berdi.

«Jolaýshyny shamadan tys alǵan qoǵamdyq kólikke qatysty 6 is qozǵaldy. Maska-qolǵapsyz bolǵan 4 taksı júrgizýshisi, ruqsatsyz jumys istegen 3 gúl dúkeni, lotereıa klýby jáne karantındik shekteý kúsheıtilgen ýaqytta beıbereket júrgen 4 adam, sonyń ishinde ulttyq gvardııanyń bir áskerı qyzmetshisi anyqtaldy», - deıdi Murat Qojamqulov.

Karantın talabyn buzatyndardyń arasynda memlekettik qyzmetshiler de bar.

«Petropavldaǵy turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń sektor meńgerýshisi mindetin atqarǵan Qazıev qoǵamdyq kólikterde sanıtarlyq-epıdemıologııalyq normalardyń saqtalýyn tekserý úshin maskasyz shyqqan. Bul áleýmettik jeli qoldanýshylarynyń nazarynan tys qalmaı, olar memlekettik qyzmetshiniń isine shaǵymdandy. Qoǵamda jaǵymsyz pikir qalyptasty. Qazirgi ýaqytta bul qyzmetkerge qatysty ákimshilik materıal jınaldy. Ol jeke tulǵa emes, laýazymdy tulǵa retinde jaýap beretin bolady», - deıdi jedel áreket etý tobynyń jetekshisi.

Jalpy oblys boıynsha karantın talabyn buzýǵa qatysty 570 derek anyqtalyp, 10 mln teńgeden astam aıyppul salyndy.


Joǵary qaraı