Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Petropavlda oıyn-saýyq oryndarynda túnde júrgen 15 jasóspirim anyqtaldy

2021 jyldyń 16 sáýir 2021 22:20

PETROPAVL. QazAqparat – Petropavlda polıtseıler 14 sáýirden «Túngi qaladaǵy balalar» jedel-profılaktıkalyq is-sharasyn bastady. Nátıjesinde oıyn-saýyq oryndarynda túnde júrgen 15 jasóspirim anyqtaldy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, operatsııa barysynda tártip saqshylary jastar kóp jınalatyn oryndardy, oıyn-saýyq mekemelerin, qala kóshelerin nazarǵa alady. Jasóspirimderge saǵat 23.00-den keıin zańdy ókilderiniń ertip júrýinsiz turǵynjaıdan tys júrýge zańmen tyıym salynǵan. Alaıda, adamdar zańnama talaptaryn bile bermeıdi.

Máselen, Jambyl kóshesindegi dámhanalardyń birinde polıtseıler túngi ýaqytta ápkesi jáne tanystarymen birge bolǵan 17 jasar jasóspirimdi anyqtaǵan. Jastar quqyq buzýshylyq jasap jatqanyn bilgende, tań qalǵandaryn jasyrmady, olardyń aıtýynsha, jasóspirim «eresekterdiń baqylaýynda bolǵan».




«Balalardyń zańdy ókilderi retinde tek ata-anasy nemese olardy almastyratyn tulǵalar bolýy múmkin. Bul jaǵdaıda jasóspirimniń ata-anasyn jáne dámhana ıesin jaýapqa tartýǵa týra keldi. Іs-sharanyń eki kúninde jasóspirimderdiń saǵat 22.00-den keıin oıyn-saýyq oryndarynda jáne saǵat 23.00-den keıin turǵynjaıdan tys júrýleriniń 15 faktisi anyqtaldy. Balalaryn tárbıeleý jáne asyraý boıynsha mindetterin atqarmaǵany úshin 7 zańdy ókil jaýapqa tartyldy», - deıdi Petropavl qalalyq polıtsııa basqarmasy bastyǵynyń birinshi orynbasary Álibek Ǵabdýllın.

Budan bólek, polıtseıler «Túngi qaladaǵy balalar» jedel-profılaktıkalyq is-sharasy aıasynda turǵylyqty jeri boıynsha turmysy qolaısyz 56 otbasyny, eseptegi turǵan 40 jasóspirimdi tekserdi. Oqý oryndarynda polıtseıler oqýshylarmen 50-den astam kezdesý ótkizgen.

Jasóspirimder quqyqtyq saýatsyzdyqtan, keıbir áreketterine qatysty jaýapkershilik kózdelgenin túsinbegendikten, quqyq buzýshylyqqa jol berip jatady. Tártip saqshylary bul máselelerdi sheshý úshin qylmystyq áreketterden saqtaný joldary týraly keńester berdi.





Joǵary qaraı