Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

PIK-ti almastyratyn múlik ıeleriniń birlestigi qandaı qyzmet atqarady

2021 jyldyń 22 sáýir 2021 17:09

ALMATY. QazAqparat - Almaty qalasy turǵyn úı saıasaty basqarmasynyń basshysy Erjan Seıtenov onlaın brıfıng barysynda Múlik ıeleriniń birlestiginiń páter ıeleri kooperatıvinen basty ereksheligin aıtty, dep habarlaıdy QazAqparat tilshisi.

Onyń aıtýynsha,turǵyndar óz úılerin derbes basqarýǵa múmkindik alady. Qazir PIK barlyq úılerden ortaq shotqa aqsha jınasa, onyń qalaı jumsalatynyn baqylaý qıyn. Eger MIB qurylsa turǵyndar qarajattyń maqsatty jumsalýyn qadaǵalaı alady.

Sonymen qatar, PIK bir ýaqytta kóppáterli turǵyn úıdiń ortaq múlkin kútip ustaý boıynsha qyzmetterdiń tapsyrys berýshisi, ári oryndaýshysy bolyp keldi.

«Endi MIB tapsyrys berýshi bolady. Bul turǵyndardyń ózderi basqarýshylarmen jáne servıstik uıymdarmen, kommýnaldyq qyzmettermen sharttardy tańdap, jasasatynyn, olardyń jumysyn tekserip, oryndalǵan jumystarǵa óz nysany boıynsha aqy tóleıtinin bildiredi», - dedi turǵyn úı saıasaty basqarmasynyń basshysy.

Erjan Seıtenov búgingi tańda Almatyda 359 MIB (menshik ıeleriniń birlestikteri) tirkelgenin jáne basqarýdyń jańa nysany retinde 367 qarapaıym seriktestik tańdalǵanyn, qala boıynsha barlyǵy basqarýdyń 726 jańa formasy bar ekenin aıtty.

Spıker megapolıs turǵyndaryn bul máselege bastamashylyq tanytýǵa shaqyrdy, sebebi basqarýdyń jańa júıesinde artyqshylyqtar jeterlik.

«Basqarýdyń jańa nysandary «bir úı – bir birlestik – bir shot» qaǵıdaty boıynsha jumys isteıdi jáne árbir úıdi basqarý boıynsha jeke tásildi qarastyrady, úıdi kútip ustaýdy qarjylandyrady, ortaq múliktiń saqtalýyn qamtamasyz etedi, sondaı-aq turǵyndarǵa aqshanyń túsýi men onyń jumsalýyn baqylaý múmkindigimen óz úıin ǵana kútip-ustaýǵa qarajat jınaqtaýǵa múmkindik beredi», - deıdi ol.


Avtor Alma Muqanova
Basty sózder: Turǵyn úı, Almaty,
Joǵary qaraı