Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Prezıdent balalarǵa bólingen bıýdjet qarjysy olardyń qajettiligine jumsalýy tıis ekenin jetkizdi

2021 jyldyń 5 mamyr 2021 19:21

NUR-SULTAN. QazAqparat – QR Prezıdenti Qasym-Jomart Toqaev Bala quqyqtary jónindegi ýákil Arýjan Saındy qabyldady, dep habarlaıdy QazAqparat Aqordanyń baspasóz qyzmetine silteme jasap.

Kezdesý barysynda Memleket basshysyna balalardyń quqyqtary men zańdy múddelerin qorǵaýǵa qatysty buǵan deıin bergen tapsyrmalarynyń nátıjesinde qabyldanǵan sheshimder jaıynda egjeı-tegjeıli baıandaldy.

Arýjan Saın Qasym-Jomart Toqaevqa balalar arasyndaǵy múgedektik deńgeıin tómendetýge baǵyttalǵan Múmkindigi shekteýli balalardyń turmys sapasyn arttyrý jónindegi jol kartasynyń oryndalýy jaıynda málimet berdi. Onyń aıtýynsha, talma, orfan jáne basqa da aýrýlarǵa shaldyqqan balalardy dári-dármekpen qamtamasyz etýge baılanysty birqatar sheshilmegen problemalar bar.

Balalar ombýdsmeni 2020 jylǵy 30 jeltoqsanda Prezıdent qol qoıǵan zańnyń kúshine enýine baılanysty qalyptasqan ahýal jaıynda aıtty. Atalǵan zań memlekettik shyǵarmashylyq jáne sporttyq tapsyrystar týraly túsinikti zańnamalyq turǵydan bekitip, shyǵarmashylyq úıirmeler men sport sektsııalaryna qatysatyn balalardy barynsha qamtý úshin jan basyna shaqqandaǵy qarjylandyrýdy kózdeıdi. Bul rette Arýjan Saın memlekettik tapsyrysty oryndaý úshin ákimdikter bólgen bıýdjet qarjysynyń az ekenine alańdaýshylyq bildirdi.

Bala quqyqtary jónindegi ýákil Prezıdentke densaýlyq saqtaý, áleýmettik qorǵaý jáne bilim berý júıelerindegi mekemelerde, onyń ishinde, ınternatta, balalar úıinde jáne mamandandyrylǵan ınternattarda bilim alatyn balalardyń quqyqtaryn qorǵaýǵa baǵyttalǵan birqatar usynys aıtty. Sondaı-aq balalar quqyǵyn qorǵaýǵa baılanysty zań buzýshylyqtar anyqtalǵanyn atap ótti.

Sonymen qatar Ýákil ınstıtýtyn «Ombýdsmen týraly» Zań qabyldaý jáne memlekettegi quqyq qorǵaý tetikteriniń tıimdiligin arttyrý turǵysynan qoldaý máselesi talqylandy.

Qasym-Jomart Toqaev balalardyń quqyqtaryn qorǵaýdyń asa mańyzdy ekenin aıta kele, kóterilgen másele boıynsha birqatar tapsyrma berip, muny árqashan jiti baqylaýynda ustaıtynyn aıtty. Prezıdent barlyq balanyń quqyǵyn qamtamasyz etý jónindegi memleket mindettemeleriniń sózsiz oryndalýy, balalardyń muqtajdyǵy úshin bólingen bıýdjet qarjysy olardyń naqty qajettiligine jumsalýy tıis ekenin jetkizdi. Memleket basshysy balalardyń quqyǵyna qatysty zań buzýshylyqtarǵa alyp keletin kez kelgen qııanatty is-áreketterdiń joly kesilip, kináliler jazalanýy kerek dep sanaıdy.


Basty sózder: Adam quqyǵy, Qazaqstan Prezıdenti,
Joǵary qaraı