Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Prezıdent bızneske jer telimin berýdi jeńildetýdi tapsyrdy

2022 jyldyń 19 mamyr 2022 18:52

NUR-SULTAN. QazAqparat – Qazaqstannyń strategııalyq maqsaty – myqty jáne jaýapty jeke bıznesti qurý. Bul týraly QR Prezıdenti Qasym-Jomart Toqaev otandyq bıznes ókilderimen kezdesýinde aıtty, dep habarlaıdy QazAqparat tilshisi.

«Bıznesti qorǵaý tetikterin kúsheıtý jónindegi qadamdardan basqa, tartymdy ınvestıtsııalyq ahýal qalyptastyrýǵa da erekshe nazar aýdarý qajet. Jahandyq týrbýlenttik pen belgisizdik, syrtqy jáne ishki syn-qaterlerdiń kúsheıýi kezinde, ádette memlekettiń róli kúsheıe túsedi. Alaıda, bizdiń strategııalyq maqsatymyz - árqashan myqty jáne jaýapty jeke bıznesti qurý bolyp qala beredi», - dedi Prezıdent.

Memleket basshysynyń aıtýynsha, qýatty jáne turaqty naryqtyq ekonomıka qurý úshin árkelki básekelestik faktorlaryn anyqtaý jáne joıý boıynsha júıeli jumys qajet. Onyń týyndaý táýekelderi memlekettik qoldaý sharalarynyń tıimsiz rásimderinde jatyr. Bul salyq jeńildikterine, jer telimderin bólýge, memlekettik satyp alýlarǵa jáne jalpy ákimshilik retteýge qatysty.

«Mysaly, qazir shaǵyn jáne orta bıznes úshin jerge qol jetkizýdiń birden-bir tásili - áleýmettik-kásipkerlik korporatsııalardyń mindetti qatysýymen ınvestıtsııalyq jobalardy iske asyrý bolyp otyr. Basqasha aıtqanda, óndiristiń negizgi faktorymen birge, kásipkerge memlekettiń qatysýy májbúrli túrde tańylady. Bıznes jer telimin jalpy negizde alý múmkindiginiń joqtyǵyna shaǵymdanady. Bul máseleniń júıeli sheshimi – jer resýrstarynyń ashyq kartasyn jasaý dep te boljandy. Biraq, bul baǵyttaǵy jumys óte baıaý júrip jatyr. Qoldanystaǵy elektrondy resýrs paıdalanýshylar úshin yńǵaısyz, derekterdiń ózektiligi máselesi basy ashyq kúıinde qalyp otyr, basqa júıelermen ıntegratsııa joq. Úkimet bul máseleni aıryqsha baqylaýǵa alýy kerek», - dedi Q. Toqaev.

Bul jobany tıimdi iske asyrý - kelesi qadamǵa ótýge, ıaǵnı jer alýǵa ótinim berý men qaraýdyń avtomattandyrylǵan tetigin engizýge jedel kóshýge múmkindik beredi. Prezıdent mundaı júıeni jyl sońyna deıin iske qosý qajettigin aıtty.

«Básekeli naryqtarda baǵa shekteýlerin qoldaný máselesi erekshe nazar aýdarýdy talap etedi. Baǵa shekteýleri azyq-túlik, dári-dármek jáne basqa da bólshek saýda naryqtarynda belsendi qoldanyla bastady. Múmkin dál qazir, bizdiń damýymyzdyń kúrdeli kezeńinde bul qajet te shyǵar. Biraq, Úkimet baǵany retteýdiń naryqtyq tetikterin qoldaný jóninde oılanýy kerek. Qoryta aıtqanda, barlyq salalarda básekelestikti jedel qarqynmen kúsheıtý kerek. Jalǵan qadaǵalaý joly jalpy tapshylyqqa jáne taýarlar sapasynyń tómendeýine ákelýi múmkin. Tepe-teńdik qajet. Básekege qabiletti taýar naryqtarynyń shamadan tys baǵalyq rettelýi eldi jeke ınvestıtsııalardan aıyrady», - dedi Qasym-Jomart Toqaev.


Joǵary qaraı