Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Prezıdent kadr rezervine engen jastar qandaı laýazymdarǵa taǵaıyndalǵan

2021 jyldyń 23 maýsym 2021 10:30

NUR-SULTAN. QazAqparat – Memleket basshysy Qasym-Jomart Toqaev óziniń saılaýaldy baǵdarlamasynda Prezıdenttik jastar kadr rezervin qurý qajettigin atap ótken bolatyn. Prezıdent bul rezervtiń jastar úshin tıimdi áleýmettik lıftige aınalýy tıis ekenin aıtty. Sodan beri osy baǵytta birshama jumys atqaryldy, Prezıdent jastar kadr rezervi shyn máninde memlekettik qyzmet júıesiniń mańyzdy reformalarynyń birine aınaldy. Búgin, Memlekettik qyzmetshiler kúnine oraı kadr rezervinde qatań irikteýden ótken daryndy jastardyń qol jetkizgen jetistikteri jaıynda az-kem áńgime órbitýdi jón sanaǵan edik.

Aıta keteıik, 2019 jyly ulyqtaý rásiminde Memleket basshysy Prezıdenttik kadr rezervi qurylatynyn málimdedi.

Al sol jyldyń tamyz aıynda Q.Toqaevtyń Jarlyǵymen QR Prezıdentiniń janyndaǵy Jastar kadr rezervi jónindegi ulttyq komıssııa quryldy.

Qyrkúıek aıynda Prezıdenttiń jastar kadr rezervine ótinim qabyldaý bastaldy.

«Prezıdent kadr rezervinde bolý – talapty jastar úshin taptyrmas múmkindik ekeni anyq. Alaıda ony bılikke jetýdiń emes, halyqqa qyzmet etýdiń tóte joly dep bilý kerek. Shyn máninde eń úlken mártebe de, abyroı da osynda. Bıyl qasterli Táýelsizdigimizge 30 jyl tolady. Sizder – erkin elde týyp-ósken rýhy azat, sanasy ashyq azamatsyzdar. Qazaqstandy odan ári órkendetý – ózderińizge júkteletin úlken jaýapkershilik. Osy oraıda óskeleń urpaq el úmitin aqtaıdy dep senemin», - dedi Qasym-Jomart Toqaev bıyl maýsym aıyndaǵy Prezıdent jastar kadr rezervi forýmyna aralǵan quttyqtaý hatynda.

QR Memlekettik qyzmet isteri agenttigi málimetinshe, qazirgi kezde rezervke engen 300 adamnyń arasynda 181-i qyzmetke ornalasqan.

Ortalyq memorgandarǵa 92-si, jergilikti atqarýshy organǵa – 40, ulttyq kompanııalarǵa – 30, basqa da jeke uıymdarǵa 19-y taǵaıyndalǵan.

Bul turǵyda saıası laýazymdarda 17 adam qyzmet etip júrse, «A» korpýsy laýazymynda – 5, Parlament Májilisi depýtaty – 2, oblystyq máslıhat depýtaty qyzmetin 1 rezervshi atqaryp júr.

Aıta keteıik, Prezıdent jastar kadr rezerviniń ókilderi birinshi basshylardyń shtattan tys keńesshileri laýazymyna da taǵaıyndalady.

Qazirgi kezde atalǵan qyzmetke kadrlyq rezervke iriktelgen 3 azamat Aqparat jáne qoǵamdyq damý mınıstrliginde, sondaı-aq bir adam Esep komıtetinde qyzmette.

Saıası laýazymdaǵy 17 azamat:

1. Azamat Beıisbekov – Prezıdent Ákimshiligi Áskerı qaýipsizdik jáne qorǵanys bólimi meńgerýshisiniń orynbasary;

2. Darhan Sapanov - Prezıdent Ákimshiliginiń memlekettik ınspektory;

3. Baýyrjan Omarbekov - Prezıdent Ákimshiliginiń memlekettik ınspektory;

4. Nurlan Jaqsymbetov – Prezıdent Ákimshiligi Memlekettik basqarý bóliminiń meńgerýshisiniń orynbasary;

5. Maksım Spotkaı - Senat apparat basshysynyń orynbasary;

6. Árken Ótenov - Strategııalyq josparlaý jáne reformalar agenttigi tóraǵasynyń orynbasary;

7. Ashat Oralov - Aqparat jáne qoǵamdyq damý vıtse-mınıstri;

8. Álibek Qýantyrov - QR Ulttyq ekonomıka vıtse-mınıstri;

9. Rýslan Hambarov - Aqtóbe oblysy ákiminiń birinshi orynbasary;

10. Ermek Kenjehanuly - Aqtóbe oblysy ákiminiń orynbasary;

11. Aıdar Nuralıev – Batys Qazaqstan oblysy ákiminiń orynbasary;

12. Sáken Shaıahmetov - Pavlodar oblysy ákiminiń orynbasary;

13. Aıbek Sattybaev - Shymkent qalasy ákiminiń orynbasary;

14. Azamat Qaldybekov - Almaty qalasy Alataý aýdanynyń ákimi;

15. Baqytjan Aqjarov - Almaty qalasy Túrksib aýdanynyń ákimi;

16. Dáýlet Káribek – Jambyl oblysy ákiminiń orynbasary;

17. Erjan Abylhanov – Atyraý oblysy ákiminiń orynbasary (qyzmetinen bosatyldy).

«A» korpýsy ókilderi 5 qyzmette:

1. Ernat Muhamadıev - QR Mádenıet jáne sport mınıstrliginiń apparat basshysy;

2. Dastan Ryspekov - QR Mádenıet jáne sport mınıstrligi Týrızm ındýstrııasy komıtetiniń tóraǵasy;

3. Qaırat Raıymqulov - Aqtóbe oblysy ákimi apparatynyń basshysy;

4. Abzal Beısenbekuly - QR Qarjy mınıstrliginiń apparat basshysy;

5. Rasýl Medetov - Jambyl oblysy ákimi apparatynyń basshysy.

Aıta keteıik, kóp jaǵdaıda shamadan tys júktemeniń saldarynan memlekettik organdarǵa tyń ıdeıalar men mindetterdi sheshýde utymdy qadamdar jetispeı jatady.

Bul turǵyda kadr rezervindegi jastardyń bilimi nazardan tys qalmady.

Osy oraıda memlekettik organdar janyndaǵy konsýltatıvtik-keńes organdarynyń quramyna rezervtiń 35 múshesi endi. Onyń ishinde:

- 18-i dırektorlar keńesiniń múshesi (Bilim jáne ǵylym mınıstrligi);

- 4-i jumys toptarynyń múshesi (Aqparat jáne qoǵamdyq damý mınıstrligi);

- 2 rezervıst QR Prezıdenti janyndaǵy Ulttyq qoǵamdyq kelisim keńesiniń múshesi;

- 9 rezervıst qoǵamdyq keńes músheleri (vedomstvolar men oblys ákimdikteri)

- 1 rezervıst Qazaqstan halqy Assambleıasynyń múshesi (ShQO ákimdigi)

- 1 rezervıst koordınatsııalyq shtab keńesiniń múshesi (Qostanaı oblysy ákimdi).

Prezıdent kadr rezervi quramyndaǵy Bekjan Álimkulov qazirgi kezde QR Energetıka mınıstrligi Atomdyq jáne energetıkalyq qadaǵalaý men baqylaý komıtetiniń Túrkistan oblysy boıynsha aýmaqtyq departamentine jetekshilik etip otyr.

Ol kadr rezervi jaıynda óz pikirin bólisken edi.

«Meniń oıymsha, rezerv eldiń taǵdyryna aralasýǵa nıetti belsendi jastar úshin óte paıdaly áleýmettik lıft boly tur. Men úshin Prezıdenttik jastar kadr rezervi jeke ómirimdi ózgeriske ushyratty. Sebebi buǵan deıin bıznes salasynda qyzmet etip, elordada turyp jattym. Al kadr rezervine iriktelgennen keıin, maǵan Túrkistan oblysyna barýǵa jáne sonda Energetıka mınıstrligi komıtetiniń aýmaqtyq departamentin basqarý usynyldy. ıAǵnı bıznesten birden óńirdegi basshylyq qyzmetti alý men úshin óte jaqsy áleýmettik lıft boldy», - deıdi ol.

Osylaısha, keıingi ýaqytta jastar men qoǵam ókilderi arasynan Prezıdent jańa kadrlardy belsendi túrde tartyp jatyr.

Onyń arqasynda basqarýshy býyn josparly túrde jańaryp keledi.


Joǵary qaraı