Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Prezıdent Memlekettik tý kóterý rásimine qatysty

2021 jyldyń 3 shilde 2021 17:27

NUR-SULTAN. QazAqparat - Qazaqstan Prezıdenti Elorda kúnine arnalǵan merekelik is-sharany dástúrli túrde ashatyn Memlekettik tý kóterý saltanatty rásimine qatysty, dep habarlaıdy QazAqparat Aqordaǵa silteme jasap.

– Bıyl qasterli Táýelsizdigimizge – 30 jyl. Sondyqtan bul rásimniń tarıhı mán-mańyzy aıryqsha. Kók týymyz – Táýelsiz Qazaqstannyń eń basty rámizi. Halqymyz úshin azattyqtan asyl, baıraqtan bıik qundylyq joq. Qazaqtyń tarıhy «Týyń jyǵylmasyn!» degen bir aýyz tilekke syıyp tur. Babalarymyz qashanda týyn bıik ustaǵan. Eldigi synǵa túsken sátte baıraq astyna birigip, tutastyǵyn tanytqan. Erlik pen birliktiń dástúri urpaqtan urpaqqa jalǵasyp, Táýelsizdik dáýirine ulasty. Egemen eldiń kók baıraǵy – myzǵymas memlekettigimizdiń belgisi, – dedi Prezıdent.




Qasym-Jomart Toqaev joǵary áskerı oqý ornynyń túlekteriniń aldynda sóılegen sózinde Memlekettik týymyz ben elimizdiń bas qalasy ult birliginiń jarqyn sımvoly ekenin aıtty.

– Elordamyz – qazirgi Qazaqstannyń betke ustar bas qalasy. Elimizdiń ortalyq megapolısi bolashaqqa jol ashatyn ordaǵa, jalpy ult bolyp uıysýdyń jáne shynaı patrıotızmniń úlgisine aınaldy. Tuńǵysh Prezıdent – Elbasy men mıllıondaǵan otandasymyzdyń qajyrly eńbeginiń arqasynda boı kótergen qala – halqymyzdyń maqtanyshy. Otanymyzdyń júregi dál osy jerde soǵyp tur. Asa mańyzdy sheshimderdiń bári osy jerde qabyldanyp, salmaqty oı-pikirler ortaǵa salynyp, biregeı jobalar júzege asyrylyp jatyr, – dedi Memleket basshysy.




Qazaqstan Prezıdentiniń pikirinshe, elorda daryndy, jigerli otandastarymyzdyń, sondaı-aq, ózge memleketterdiń kóptegen azamattarynyń bas qosatyn ortalyǵyna aınaldy. Qasym-Jomart Toqaev Uly dala kindiginde qasıetti Týdy bıikte jelbirete otyryp, erkindik pen egemendik muratyna beıildi ekenimizdi atap ótti.


– Elorda kúni adamdardy qoldap, shabyttandyrý, birliktiń kúshin, ózara kómektiń mańyzdylyǵy men ár azamattyń ortaq iske qosqan úlesiniń qundylyǵyn dáripteý úshin asa mańyzdy. Elorda turǵyndary ekpe salý naýqany men shekteý sharalaryn saqtaý kezinde aldyńǵy qatarda bolýy qajet. Jappaı vaktsınalaý qalypty tynys-tirshilikke qaıta oralýdyń, adamdardyń densaýlyǵyn saqtaýdyń jalǵyz joly ekenin durys túsinýimiz kerek. «Biz birgemiz» urany asa qaterli indetke qarsy kúrestegi jeńisimizdiń boıtumary bolatynyna senimdimin, – dedi Qasym-Jomart Toqaev.




Rásim barysynda joǵary áskerı oqý ornynyń 12 úzdik túlegi Qazaqstan Prezıdenti – Qazaqstan Respýblıkasynyń Joǵarǵy Bas qolbasshysynyń qolynan ofıtser pogonyn aldy.

– Oqýlaryńyzdyń sátti aıaqtalǵany qutty bolsyn, jas ofıtserler! Ofıtserlik shen – bul, eń birinshi, Otan aldyndaǵy zor jaýapkershilik. Bolashaqta komandır atanyp, jas sarbazdarǵa tálim beresizder. Sondyqtan otanshyl, batyl jáne aıbyndy bolyp, úlgi kórsetý asa mańyzdy. Múltiksiz qyzmet etý – bárińizge ortaq mindet. Antqa adal bolý, Táýelsiz elimizdi qorǵaý – qasterli paryz, – dedi Memleket basshysy.

Jıyn sońynda Qasym-Jomart Toqaev barlyq qatysýshylardy kele jatqan Elorda kúnimen quttyqtap, Otanymyzdyń ósip-órkendeı berýine tilektestik bildirdi.


























Joǵary qaraı