Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Prezıdent tapsyrmalarynyń oryndalýy qatań baqylaýda bolady – Berdibek Saparbaev

2022 jyldyń 11 qańtar 2022 15:26

TARAZ. QazAqparat - Jambyl oblysynyń ákimi Berdibek Saparbaev apparattyq keńes ótkizip, jaýapty tulǵalarǵa naqty tapsyrmalar júktedi, dep habarlaıdy QazAqparat.

Jıynda qalyptasyp otyrǵan ahýalǵa baılanysty eldegi jaǵdaıdy turaqtandyrýǵa qatysty Memleket basshysy júktegen tapsyrmalardyń oryndalýyn baqylaýǵa alý, máselelerdi júıeli túrde sheshý barysy qaraldy.

- Zardap shekken nysandardy qalpyna keltirý, kólikter shyǵynyn esepteý boıynsha tapsyrma berildi. Kerek qujattardy tótenshe jaǵdaı rejımine sáıkes tezirek daıyndap, ótkizý qajet.

Jóndeý jumystaryna tartylǵan jumysshylardyń komendanttyq saǵat kezinde júrip-turýyn eskerińizder. Belsendilerdi ustaý boıynsha sharalardy jalǵastyrý qajet. Arandatýshylar men kúdiktilerdi anyqtaý boıynsha aýdan, aýyldyq ákimdikter men polıtsııa ınspektorlary belsendi áreket etýi tıis. Kúndelikti málimetterdi shtab otyrysynda saralap otyrmyz.




Halyqty jylý, sý, gaz, jaryqpen qamtýda eshqandaı másele bolmaýy kerek.

Prezıdenttiń tarıfterdiń, janar-jaǵarmaıdyń, gazdyń jáne azyq-túliktiń baǵasyn kótermeý, qajetti qoryn qalyptastyrý boıynsha tapsyrmalary oryndalýy tıis. Ásirese, áleýmettik mańyzdy taýarlardyń jetkilikti bolýyn, baǵasynyń óspeýin baqylaýda ustańyzdar.

«Qazaq halqyna» atty qordyń qurylýy boıynsha Respýblıkamen jumys isteńizder, - dep oblys ákimi óziniń orynbasarlary men jaýapty tulǵalarǵa naqty tapsyrmalar berdi.




Búginde oblys aýmaǵynda 264 janar-jaǵarmaı quıý beketi bar. Onyń 169-ynda avtogaz quıý qondyrǵylary ornalasqan. Qazir óńirde suıytylǵan gaz 60 teńgeden satylýda. Oblys ortalyǵynan 200 shaqyrymnan asa qashyqtyqta ornalasqan alys aýdandardaǵy beketterde 65 teńgeden ótkerilýde.

Kommýnaldyq nysandar shtattyq rejımde jumys isteýde. Qoǵamdyq kólikterdiń qozǵalysy 70 paıyzǵa qamtylǵan.




Aımaq basshysy koronavırýs ınfektsııasynyń qaıta órship kele jatqanyn, el tynyshtyǵy men halyq densaýlyǵy qashan da basty nazardan túspeý kerektigin eske saldy. Sanıtarlyq talaptardyń saqtalýyn qadaǵalaý, revaktsınatsııa boıynsha jumystardy kúsheıtýdi tapsyrdy.

- El ıgiligi negizdelgen kez kelgen bastamada memlekettik qyzmetkerler aldyńǵy shepten kórinip, ózgelerge úlgi bolýy kerek. Qazirgideı jaǵdaıda memlekettik qyzmetkerler ózderiniń aǵaıyn-týystaryna, jaqyndaryna úgit-nasıhat, túsindirý sharalaryn júrgizý qajet. Memlekettiń bolashaǵy úshin el birligi, qoǵamdyq yntymastyq asa mańyzdy. «Birlik bolmaı – tirlik bolmaıdy»,-dep beker aıtylmaǵan. Ata-babamyzdyń arman-ańsary bolǵan Táýelsizdigimizge syzat túsirip almaýymyz kerek.

Eldegi ahýaldy turaqtandyrý boıynsha Memleket basshysy mańyzdy birneshe Úndeý jarııalap, sharalar qabyldap, naqty mindetter júktedi. Olar nátıjeli oryndalýy tıis,- dep túıindedi B.Saparbaev.


Joǵary qaraı