Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Prezıdent tapsyrmasy: «Jeke qosalqy sharýashylyqtar týraly» zań jobasy ázirlenedi

2021 jyldyń 2 qyrkúıek 2021 10:02

NUR-SULTAN. QazAqparat – Úkimet otyrysynda Aýyl sharýashylyǵy mınıstri Erbol Qarashókeev «Jeke qosalqy sharýashylyqtar týraly» zań jobasynda qandaı múmkinder eskeriletinin aıtty, dep habarlaıdy QazAqparat tilshisi.

Onyń aıtýynsha, qazirgi kezde elimizde shamamen 1,6 mln jeke qosalqy sharýashylyq bar. Olar 2020 jyldyń qorytyndysy boıynsha 2,6 trln teńgege ónim nemese búkil aýyl sharýashylyǵy ónimderiniń 41,5%-yn óndirdi.

«Qolda bar áleýetti eskere otyryp, Memleket basshysynyń tapsyrmasy boıynsha «Jeke qosalqy sharýashylyqtar týraly» zań jobasy ázirlenetin bolady.

Atalǵan zań jobasyn qabyldaý jeke qosalqy sharýashylyqtardy júrgizý kezinde týyndaıtyn qatynastardy retteýge, aýyl sharýashylyǵy maqsatyndaǵy jerlerdiń utymdy paıdalanylýyna, sondaı-aq jeke qosalqy sharýashylyqtardyń memlekettik qoldaý sharalaryna keńinen qol jetkizýine múmkindik beredi. Tutastaı alǵanda, jeke qosalqy sharýashylyqtardyń áleýetin aýyl sharýashylyǵy kooperatsııasyn damytý arqyly iske qosý josparlanýda. Ol jeke qosalqy sharýashylyqtar men shaǵyn fermerlerdi azyq-túlik jáne jeńil ónerkásip kásiporyndarynyń qajettilikterimen tik jáne kóldeneń kooperatsııa tizbekteri arqyly baılanystyrýǵa múmkindik beredi», - dedi mınıstr.

Onyń sózine qaraǵanda, buǵan Jambyl oblysy halqynyń tabysyn kooperatsııa arqyly aýqymdy jáne tıimdi arttyrý jónindegi pılottyq jobanyń oń nátıjesi dálel. Qazirgi ýaqytta mınıstrlik ázirlenip jatqan Agroónerkásiptik keshendi damytý jónindegi 2021 – 2025 jyldarǵa arnalǵan ulttyq jobaǵa Jambyl oblysynyń pılottyq jobasyn Qazaqstannyń barlyq óńirlerinde qoldanýdy engizip otyr. Ony iske asyrý úshin Ulttyq jobada 2023 – 2025 jyldarǵa 90 mlrd teńge kózdelgen.

Eske salsaq, 1 qyrkúıek kúni QR Prezıdenti Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty halyqqa Joldaýyn jarııalady. Joldaýdyń tolyq mátini myna jerde.


Joǵary qaraı