Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Prezıdent tarıhı ádildikti qalpyna keltirdi – Qarın maıdangerlerdiń nagradtalýyna qatysty

2022 jyldyń 6 mamyr 2022 17:36

NUR-SULTAN. QazAqparat – «Halyq qaharmany» ataǵyn alǵan úsh maıdangerdiń qaı-qaısysy da halyq jadynda naǵyz batyrlar retinde saqtalǵan. QR Memlekettik hatshysy Erlan Qarın Prezıdent Jarlyǵymen úsh otandasymyzdyń nagradtalýyna oraı osyndaı oıyn bildirdi, dep habarlaıdy QazAqparat tilshisi.

«Búgin adamzat tarıhyndaǵy eń alapat soǵysta óshpes erlik jasaǵan otandastarymyzǵa Memleket basshysynyń Jarlyǵymen «Halyq qaharmany» ataǵy berildi. Olar – Tóleýǵalı Ábdibekov, Aleksandr Nesmııanov jáne Ybyraıym Súleımenov. Kezinde batyr ataǵyna usynylǵanymen, túrli sebepterge baılanysty erlikteri eleýsiz qalǵan jaýyngerlerdiń qaı-qaısysy da eń joǵary marapatqa ábden laıyq azamattar edi», - dep jazdy Erlan Qarın Facebook-paraqshasynda.

Onyń atap ótýinshe, 302-shi gvardııalyq atqyshtar polkiniń aǵa serjanty Tóleýǵalı Ábdibekov sol kezdegi eń úzdik 20 snaıperdiń biri bolǵan. Bir ózi 397 dushpandy nysanaǵa iliktirgen mergenniń myltyǵy búginde Qazaqstannyń Ortalyq memlekettik mýzeıinde saqtaýly tur.

Al 690-shy atqyshtar polkiniń komandıri Aleksandr Nesmııanov soǵys kezinde úsh ret batyr ataǵyna usynylǵan. Sheshýshi sátterde erekshe qaısarlyqtyń úlgisin kórsetken ol asa kúrdeli tapsyrmalardy oryndap, jaýdyń betin qaıtarýǵa zor úles qosqan.

100-shi jeke atqyshtar brıgadasynyń starshınasy Ybyraıym Súleımenov te quralaıdy kózge atqan mergen boldy. Ol úsh júzge jýyq jaýdyń kózin joıdy. Nevel qalasynyń túbindegi keskilesken shaıqasta Mánshúk Mámetova ekeýi erlikpen qaza tapty. Alaıda snaıperdiń erligi laıyqty baǵalanbady.

«Úsh maıdangerdiń qaı-qaısysy da halyq jadynda naǵyz batyrlar retinde saqtalǵan. Búgin Memleket basshysy tarıhı ádildikti qalpyna keltirdi», - dep atap ótedi Memlekettik hatshy.


Joǵary qaraı