Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Prezıdent Úkimetke QazVac-ty eksporttaý máselesin pysyqtaýdy tapsyrdy

2021 jyldyń 19 shilde 2021 16:38

NUR-SULTAN. QazAqparat – Reseılik «Spýtnık laıt» vaktsınasyn Qazaqstanǵa jetkizý jáne shyǵarý máselesin pysyqtaý qajet. Memleket basshysy Qasym-Jomart Toqaev eldegi sanıtarlyq-epıdemıologııalyq ahýal jónindegi jumys keńesinde osyndaı tapsyrma berdi, dep habarlaıdy QazAqparat tilshisi Aqordanyń Twitter-degi paraqshasyna silteme jasap.

«Taǵy bir másele osy saladaǵy jetekshi óndirýshilerdiń vaktsınalar jelisin keńeıtý qajettiligimen baılanysty. Otandyq farmatsevtıkalyq alańdarda reseılik jańa «Spýtnık laıt» vaktsınasyn jetkizý jáne shyǵarý máselesin pysyqtaý qajet», - dedi Qasym-Jomart Toqaev.

Prezıdent, sondaı-aq, qyrkúıekte otandyq QazVac vaktsınasyn ónerkásiptik kólemde shyǵarý josparlanǵanyn eske salyp, ony Dúnıejúzilik densaýlyq saqtaý uıymynda tirkeýdi jedeldetý qajettigin aıty. Bul mindet Densaýlyq saqtaý mınıstrligi men Syrtqy ister mınıstrligine júktelip otyr.

«Eki jaqty ýaǵdalastyqtar sheńberinde QazVac-ty úshinshi elder naryǵyna ilgeriletý jónindegi jumysty uıymdastyrýdyń mańyzy zor. Úkimetten osy máseleni erekshe baqylaýǵa alyp, nátıjeleri týraly bir aı merzimde baıandaýdy suraımyn», - degen Prezıdent vaktsınatsııa máselesinde otandyq bıznestiń qoldaýy óte mańyzdy ekenin atady.

«Óıtkeni, ujymdyq ımmýnıtetke qol jetkizbesek, bıznes úshin mańyzdy sanıtarlyq shekteýlerdi tolyǵymen alyp tastaý múmkin emes», - dedi memleket basshysy.

Eske salsaq, Prezıdent Qasym-Jomart Toqaev elimizdegi sanıtarlyq-epıdemıologııalyq ahýal jóninde jumys keńesin ótkizip jatyr.


Joǵary qaraı