Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Prezıdent UQShU men ShYU-ǵa múshe memleketter basshylarynyń birlesken otyrysyna qatysty

2021 jyldyń 17 qyrkúıek 2021 16:32

NUR-SULTAN. QazAqparat - Qazaqstan Prezıdenti Qasym-Jomart ToqaevUQShU men ShYU-ǵa múshe memleketter basshylarynyń birlesken otyrysyna qatysty, dep habarlaıdy Aqorda.

Memleket basshysy óz sózinde sońǵy aılarda Aýǵanstandaǵy áskerı-saıası jaǵdaıdyń tez ózgerip, ahýaldyń turaqsyzdaný qaýpi týyndaǵanyn atap ótti.

«Ujymdyq qaýipsizdik týraly shart uıymy men Shanhaı yntymaqtastyq uıymynyń mandatyna mundaı syn-qaterlerdiń aldyn alý jáne oǵan der kezinde mán berý máseleleri kiredi. Bul bizdiń bedeldi eki aımaqtyq qurylym arasyndaǵy is-áreketterdi úılestirýdiń mańyzdy ekenin kórsetedi. Aýǵanstannyń ýaqytsha úkimeti aldynda asa kúrdeli mindetter kesheni tur. Jańa memlekettik qurylymdy qalyptastyrý jáne jalpy ulttyq tutastyqqa qol jetkizý sııaqty strategııalyq maqsattardan bólek kúnkóristiń kókeıtesti máselelerin de sheshý qajet. Ekonomıkanyń qordalanǵan máseleleriniń sheshilýi, túptep kelgende, Aýǵanstan memlekettiliginiń shama-sharqyn aıqyndaıdy. Shyndyǵy osy», – dedi Qasym-Jomart Toqaev.

Prezıdenttiń aıtýynsha, daǵdarystan shyǵý úshin bul eldegi ishki resýrstar múlde jetkiliksiz. BUU-nyń baǵalaýy boıynsha Aýǵanstan gýmanıtarlyq apat jaǵdaıynda tur.

«Bul asyra aıtqandyq emes. Jýyq arada Aýǵanstan asa aýyr azyq-túlik daǵdarysyna ushyraýy múmkin. Osy qıynshylyq Ortalyq Azııa aımaǵynyń da shekarasyn aınalyp ótpeıdi. Onyń saldary jahandyq sıpat alady. Atalǵan jaǵdaı, eń aldymen, turǵyndardyń kóshýge májbúr bolýynan týyndaıdy. Alaıda, qazir jaı boljam jasaýdyń emes, naqty iske kóshýdiń mańyzy zor. Elderimiz ben uıymdarymyz deńgeıinde Aýǵanstan halqyna kómektesý úshin «gýmanıtarlyq kópirdi» jedel túrde salǵan jón. Qazaqstannyń ınfraqurylymy men logıstıkalyq múmkindikterin eskere otyryp, mundaı «kópirdi» uıymdastyrýdyń mańyzdy bóligi retinde Almaty qalasynda aımaqtyq hab qurý usynylady», – dedi Memleket basshysy.

Qasym-Jomart Toqaevtyń pikirinshe, atalǵan jumysty Almaty qalasyna BUU basshylyǵynyń ótinishi boıynsha qonys aýdarǵan Aýǵanstanǵa kómek kórsetý jónindegi BUU Mıssııasynyń (UNAMA) mandaty aıasynda júrgizýge bolady. Qasym-Jomart Toqaev bul usynysty ShYU memleketteri basshylarynyń búgingi otyrysynda aıtty.

« Gýmanıtarlyq daǵdarystyń aýyr kezeńin eńsergennen keıin aldaǵy ýaqytta Aýǵanstanǵa túrli baǵyttar boıynsha BUU ınstıtýttarynyń tarapynan júıeli qoldaý qajet bolady. Almatyda BUU-nyń Aımaqtyq habynyń qurylýy bul jumystardy úılestirý úshin ońtaıly múmkindikterge jol ashady», – dedi Qazaqstan Prezıdenti.





Memleket basshysy aýǵan máselesi boıynsha ózara is-qımyldar júrgizgende UQShU men ShYU-ǵa múshe memleketterdiń kezek kúttirmeıtin mindetterin sheshýden bólek, keleshekti de nazardan tys qaldyrýǵa bolmaıtynyn atap ótti.


– Saıası jáne gýmanıtarlyq ahýal qalaı qalyptassa da, adamı kapıtalǵa tartylǵan ınvestıtsııa ǵana uzaqmerzimdegi ornyqty bolashaqty qamtamasyz ete alady. Osyǵan baılanysty atalǵan eldiń azamattary úshin bilim berý baǵdarlamalaryn júzege asyrý isin jalǵastyrý mańyzdy. Búginde Qazaqstanda Aýǵanstannyń 200-ge jýyq stýdenti bilim alýda. Aýǵanstannyń jańa bıligi bul jastardyń joǵary bilim alýyna esh kedergi jasamaıdy dep úmittenemin, – dedi Qasym-Jomart Toqaev.


Qazaqstan Prezıdentiniń pikirinshe, UQShU men ShYU-ǵa múshe memleketter Aýǵanstannyń jańa bıligimen beıresmı dıalog qurýǵa bastama jasaǵany jón.


– Mundaı baılanystar tálipterdiń shynaıy nıetin baǵalaýǵa, aımaqtyq turaqtylyqtyń syn-qaterlerine qatysty pikirlerdi qalyptastyrýǵa, osy elmen saýda-ekonomıkalyq baılanystardy qalpyna keltirýge múmkindik beredi. Osy rette, resmı túrde moıyndaý týraly sóz bolyp otyrǵan joq. Kóp nárse jańa ákimshiliktiń aldaǵy naqty is-áreketterine jáne BUU Qaýipsizdik Keńesiniń tıisti sheshimderine baılanysty bolatynyn taǵy da qaıtalap aıtamyn, – dedi Memleket basshysy.


Qasym-Jomart Toqaev sózin qorytyndylaı kele, ShYU men UQShU-ǵa múshe memleketter múddeleriniń sáıkes kelýi jáne olardyń birlesken kúsh-jigeri aımaqtyń qaýipsizdigi men ornyqty damýynyń ózekti máselelerin sheshý jónindegi ortaq is-qımyldardyń tıimdiligin arttyrýǵa múmkindik beretinine senim bildirdi.



Joǵary qaraı