Aýa raıy
Astana -19 °S
Almaty -7 °S
valıýta baǵamy
USD 421.58
EUR 496.83
RUB 5.53
CNY 62.20

Prezıdenttiń Qazaqstan halqyna Joldaýy. Mátindik translıatsııa

2020 jyldyń 1 qyrkúıek 2020 10:58

NUR-SULTAN. QazAqparat - Búgin Memleket basshysy Qasym-Jomart Toqaev Parlament palatalarynyń birlesken otyrysynda Qazaqstan halqyna jyl saıynǵy dástúrli Joldaýyn jarııalady. «QazAqparat» halyqaralyq aqparat agenttigi mátindik translıatsııa arqyly habar taratady.

***

12:32 Joldaý aıaqtaldy

***

12:32 - «Biz halqymyzdyń táýelsizdik jolyndaǵy san ǵasyrlyq arman-tilegine qol jetkizgen urpaqpyz. Keler jyly Táýelsizdigimizge 30 jyl tolady. Bul mereıli data – egemen elimiz úshin asa mańyzdy meje. Bul – jańa tarıhı kezeńniń basy. Bizge memlekettiń bolashaǵy úshin zor jaýapkershilik júktelip otyr. Birligimiz ben yntymaǵymyz myǵym bolsa, barlyq qıyndyqty jeńip, maqsatymyzǵa jetemiz. Bul bizdiń qolymyzdan keledi, men oǵan kámil senemin. Elimiz árqashan aman bolsyn. Barshańyzǵa rahmet!», - dep qorytyndylady Qasym-Jomart Toqaev.

12:31 - «Zamana synaǵy bizden úzdiksiz qozǵalysty, myqty kúsh-jigerdi jáne tabandy eńbekti talap etip otyr. Sondyqtan elimizdiń baqytty ári jarqyn keleshegi ár azamattyń qajyrly qyzmetine baılanysty bolmaq. Ár býynnyń mańdaıyna túrli synaq jazylǵan. Biz tól tarıhymyzda taǵdyrdyń túrli synynan árdaıym súrinbeı óttik. Elimiz eń kúrdeli degen mindetterdi sheshe alady. Biz buǵan daıynbyz», - dedi Prezıdent.

12:30 - Qurmetti otandastar! Aldymyzda kúrdeli ári aýqymdy mindetter tur. Solardy tabysty júzege asyrý úshin tyń tásil, jańasha oılaý, jalpyulttyq yntymaq jáne ózara qoldaý qajet. Bizdiń strategııalyq baǵytymyz aıqyn, túıtkildi tustarymyz ben kemshilikterimizdi jaqsy bilemiz. Búgin men búkil qoǵam aldynda daǵdarys jaǵdaıynda atqarylatyn is-sharalar josparyn baıandadym. Onyń jemisti júzege asýy árqaısysymyzǵa baılanysty. Barshamyz óz-ózimizdi damytýǵa kúsh salýymyz kerek.

***

12.26 – «Jergilikti ózin-ózi basqarýdy damytýdyń jańa tujyrymdamasyn ázirleıtin kez keldi. Parlament sol boıynsha sáıkes zańdar jıyntyǵyn qabyldaıdy», - dedi Prezıdent.

***

12:24 – Aýyl ákimderin tikeleı saılaýdy ótkizýge bolady dep oılaımyn – Qasym-Jomart Toqaev.

12:20 - «Infraqurylymdyq ári áleýmettik bastamalarǵa aýdandardyń jáne eldi mekenderdiń bıýdjetinen qarajat bólý úshin qoǵamdyq saraptama júrgizilýge tıis. Bul rette onlaın saýalnamany da qoldanǵan jón», - dedi Prezıdent.

12:20 - «Báıterek» jáne «QazAgro» holdıngileriniń róline arnaıy toqtalǵym keledi. Bul kompanııalar ındýstrııalandyrý jáne agroónerkásiptik keshendi damytý isine eleýli úles qosyp, buryn bir-birimen baılanyssyz bolǵan qarjy ınstıtýttarynyń qyzmetin retke keltirdi. Al qazir biz múldem jańa jaǵdaıda turmyz. Instıtýtsıonaldyq qurylymdy ózgertý – ýaqyt talaby. Sondyqtan osy eki uıymdy biriktirip , qarjylyq múmkindikteri anaǵurlym zor damý ınstıtýtyn qurǵan jón», - dedi Prezıdent.

12.19 – «Úkimet ónerkásip pen aqparattyq tehnologııa salasy arasyndaǵy ózara tıimdi yntymaqtastyqty retteýi tıis. Bul árbir salanyń tsıfrly ekojúıesiniń qozǵaýshysy tsıfrly tehnologııa platformalaryn qalyptastyrýǵa múmkindik beredi», - dep atap ótti Qasym-Jomart Toqaev.

***

12:16 – «Memlekettik qyzmetshiniń nemese kvazımemlekettik mekeme basshysynyń qos azamattyǵy anyqtalǵan jaǵdaıda olar qyzmetinen bosatylady», - dedi Prezıdent.

***

12:15 – Memleket basshysy: 2021 jyldan bastap memlekettik qyzmetshilerdiń, depýtattardyń, sýdıalardyń shetel bankterinde esepshotqa ıe bolýy, qolma-qol aqsha jáne baǵaly zattar saqtaýyna qatysty jemqorlyqpen kúres aıasynda jańa shekteýler engizý kerek.

***

12:15 - «Adam quqyqtaryn qorǵaý boıynsha jańa sharalar qabyldaý óte mańyzdy. Men úshin bul - basym baǵyttaǵy sheshilýi tıis problema. Búkil álem sııaqty, Qazaqstan da azamattardyń ınternette qýdalanýdan qorǵalmaý jaǵdaıyna tap boldy. Budan birinshi kezekte balalar zardap shegedi, ókinishke qaraı, olar ınternettegi qýdalaýdy erekshe jaqyn qabyldaıdy, onyń saldary qaıǵyly jaǵdaıǵa ákelip soǵady», - dep málimdedi Prezıdent.

***

12:14 - Prezıdent: Qoǵamdyq keńesterdiń rólin arttyra túsý kerek. Olardy satyp alýdy uıymdastyratyn komıssııalardyń jumysyna tartý qajet. Sondaı-aq, kvazımemlekettik sektorda qoǵamdyq keńester qurý múmkindigin qarastyrý kerek.

***

12:09 - «ІІM qurylymyn beıindi emes fýnktsııalardan bosatyp, qaıta qarastyrý qajet. Bul osy mańyzdy vedomstvo jumysynyń tıimdiligin arttyrady. Tabıǵı jáne tehnogendik apattar dáýirine engenimizdi eskere otyryp, Tótenshe jaǵdaılar mınıstrligin qaıta qurý qajet dep sanaımyn», - dedi Prezıdent.

12.08 – «Ýchaskelik ınspektordyń mártebesin zańnamalyq turǵyda kóterip, oǵan nátıjeli jumys isteý úshin múmkindik berý kerek. Ol azamattarǵa tanys, qoljetimdi jáne bedeldi bolýy kerek», - dedi Memleket basshysy .

***

12.07 – Prezıdent: Qylmystyq jáne qylmystyq-protsesýaldyq zańnamanyń turaqtylyǵyn qamtamasyz etý mańyzdy. Ony jıi túzetýler men ózgerister engizý quqyqty qoldanýǵa keri yqpal etedi jáne birkelki tergeý jáne sot praktıkasyn jasaýǵa múmkindik bermeıdi.

***

12:00 - «Pandemııa sırek mamandyqtardyń dárigerlerin, epıdemıologtardy, ınfektsıonısterdi, reanımatologtardy jáne kardıologtardy ázirleý máselesin tótesinen qoıdy. Úkimetke shamamen 10 jylǵa medıtsınalyq mekemelerdi kadrlarmen qamtamasyz etý boıynsha uzaq merzimdi boljam jasaýdy tapsyramyn», - dedi Memleket basshysy.

***

12.00 – «Úkimet bastapqy medıtsınalyq kómekti uıymdastyrý tásilderin qaıta qaraýy qajet. Ol barynsha mobıldi ári halyqtyń barlyq tobyna, onyń ishinde aýyl turǵyndaryna qoljetimdi bolýy kerek. Shalǵaı óńirlerdegi kólik medıtsınasyn jańǵyrtý jóninde sharalar qabyldaý qajet», - dedi Prezıdent.

***

11:59 - Qasym-Jomart Toqaev: Taǵy bir másele – medıtsınalyq ınfraqurylymdy damytý. Jyl sońyna deıin el aýmaǵynda 13 jańa juqpaly aýrýlar aýrýhanasy salynady. Al 2025 jylǵa qaraı Densaýlyq saqtaý salasyna arnalǵan 20 zamanaýı kópsalaly nysan paıdalanýǵa beriledi. Bul osy maqsatqa oraı 1,5 trln teńgege jýyq ınvestıtsııa tartylady degen sóz. Elbasynyń bastamasymen Nur-Sultan jáne Almaty qalalarynda eki kópsalaly medıtsınalyq ortalyq salynady. Bul ortalyq - elimizdiń betkeustar salalyq mekemelerine aınalyp, ınnovatsııalyq ósimge jáne qoldanbaly medıtsınanyń damýyna tyń serpin beredi.

***

11:59 - Prezıdent: 2023 jylǵa qaraı dárigerlerdiń jalaqysy ekonomıkadaǵy ortasha jalaqydan eki ese joǵary bolady.

***

11: 59 - «Otandyq farmatsevtıka salasyn aıaǵynan tik turǵyzý kerek. Barlyq dári-dármek pen medıtsınalyq buıymdar Qazaqstanda óndirilýi tıis. Bul – ulttyq qaýipsizdik máselesi. Kelesi jyldan bastap osy baǵytta naqty nátıje kútemin», - dedi Memleket basshysy.

***

11.54 – Qasym-Jomart Toqaev Úkimetke úzdiksiz bilim berý tujyrymdamasyn ázirleýdi tapsyrdy. «Bul qujatta beıresmı bilimniń balamaly nusqalaryn belsendi engizýdi, ózindik oqýdyń nátıjesin moıyndaýdy, kásibı daǵdylardy sertıfıkattaýdy qarastyrý kerek», - dedi Memleket basshysy.

***

11:51 - Prezıdent Úkimetke eldiń Áleýmettik kodeksin ázirleýge kirisýdi tapsyrdy. «Áleýmettik tólemderdi tsıfrlandyrý boıynsha sharalar qabyldanýy kerek. Ol úshin azamattyń tsıfrly áleýmettik ámııanyn engizip, sondaı-aq tıisti taýar ótkizýshi júıeni qurý qajet», - dep málim etti QR Prezıdenti.

11:51 – «Bilim salasyndaǵy basty máseleniń biri – ustazdar jalaqysynyń azdyǵy. Men 2021 jyldyń qańtar aıynan bastap muǵalimderdiń eńbekaqysyn 25 paıyzǵa kóbeıtý jóninde sheshim qabyldadym. Jalaqy mólsheri aldaǵy ýaqytta arta beredi. Bul maqsatqa aldaǵy úsh jylda qosymsha 1,2 trln teńge bólinedi», -dedi Prezıdent.

***

11:50 - «Qashyqtan oqytý isin uıymdastyrýda Úkimettiń jibergen qatelikterin jaqsy bilemiz. Ashyǵyn aıtqanda, áli kúnge deıin naqty bir onlaın platforma joq», - dedi Memleket basshysy.

***

11:47 - «2021 jyldan «Ańsaǵan sábı» jobasyn iske qosýǵa tapsyramyn», - dedi Qasym-Jomart Toqaev.

***

11:47 - «Biryńǵaı zeınetaqy jınaqtaýshy qorynyń 700 myń salymshysy baspana satyp alýǵa, emdelýge nemese qarjy kompanııalarynyń basqarýyna óz jınaqtarynyń bir bóligin paıdalana alatyn bolady», - dedi Memleket basshysy.

***

11:42 - «Túıindeı aıtarym, ishki jalpy ónimniń abstraktili ósimimen jurtty qýanta almaımyz. Halyqqa turaqty jumys oryndary, qolaıly jol, aýrýhanalar men mektepter, sapaly azyq-túlik kerek. Ekonomıkalyq reformalar azamattardyń tabysyn arttyryp, turmys sapasynyń joǵary standartyn qamtamasyz etkende ǵana, ózin-ózi aqtap, qoldaýǵa ıe bolady. Osyny árdaıym este saqtaýymyz qajet», - dedi QR Prezıdenti.

***

11:42 - «Álemde qalyptasqan jańa ahýalda elge ınvestıtsııa tartyp, otandyq taýarlar men qyzmetterdi eksportqa shyǵarý Úkimet úshin basymdyqqa ıe bolyp otyr. «Astana» halyqaralyq qarjy ortalyǵynyń áleýetin tıimdi paıdalanǵan jón. Qarjy ortalyǵy tikeleı jáne portfeldi ınvestıtsııalar tartýda negizgi quralyna aınalýy tıis», - dedi Qasym-Jomart Toqaev.

***

11:42 - Prezıdent: Elimizdiń halyqaralyq arenadaǵy ekonomıkalyq múddesin belsendi túrde ilgeriletip, ulttyq múddeni qorǵaýda syndarly ustanym men kásibı biliktilik tanytý kerek. Qazaqstannyń ıgiligi úshin Eýrazııa ekonomıkalyq odaǵynyń jáne «Bir beldeý – bir jol» jobasynyń zor múmkindikterin barynsha paıdalanǵan jón.

11.40 – «Prezıdentke tikeleı qarasty Básekelestikti qorǵaý jáne damytý jónindegi agenttik qurýdy tapsyramyn. Teń básekelestikti damytýda ekonomıkany memleket ıeliginen shyǵarý mańyzdy ról atqarady», - Prezıdent.

***

11:40 - «Úkimet jańa jekeshelendirý josparyn qabyldaýy tıis. Memleket menshiginde tek áleýmettik nysandar jáne memlekettiń qaýipsizdigi men qalypty jumysyn qamtamasyz etetin nysandar ǵana qalýy kerek. Kvazımemlekettik sektorda ákimshilik basqarý jumysymen aınalysatyn qyzmetkerler sanyn, paıdasyz shyǵyndardy jáne basy artyq enshiles kompanııalardy qysqartý jumystary jalǵasyn tabýy tıis», dedi Memleket basshysy.

***

11:39 - Qasym-Jomart Toqaev: Básekelestik saıasaty asa mańyzǵa ıe. Básekelestik saıasatyn túrlendirip, ár kásipkerge teń múmkindik berý qajet.

***

11:38 - Prezıdent: Memlekettik organdarǵa bıýdjettik derbestik berý qajet. Bul máselelerdi jedel sheshýge, ujymdyq jaýapsyzdyq pen qaǵazbastylyqtan arylýǵa múmkindik beredi. Alaıda onyń qatań suraýy bolýy tıis.

***

11.35 – «Ulttyq bank qurylymynda Aqsha-nesıe saıasaty jónindegi komıtet qurý jóninde sheshim qabyldandy. Onyń quramyna táýelsiz músheler kiredi. Biz ulttyq tabysty qaıta bólý mańyzdylyǵyn aıtyp otyrǵandyqtan, búkil el azamattary úshin túsinikti salyq saıasatyn damytýymyz kerek», - dep málimdedi Prezıdent.

***

11.32 – «Kelesi jyly ShOB qyzmetiniń jańa normatıvtik-quqyqtyq bazasyn jetildirýdi tapsyramyn. Memlekettik qurylymdardyń kásipkerlik qyzmetke kez kelgen zańsyz aralasýy, bıznesmender jumysyna kedergi keltirýi memleketke qarsy asa aýyr qylmys dep qabyldanýy tıis», - dedi Q.Toqaev.

***

11:32 - «Kelesi – bıznes klımat. Retteýshi sala áli de ebedeısiz, tipti jazalaýshy bolǵandyqtan, bul sala reformalarǵa muqtaj. Retteýshi saıasattyń negizgi prıntsıpteri ózgertilýi tıis», - dep atap ótti Memleket basshysy.

***

11:31 - Prezıdent: 2025 jylǵa deıin respýblıkalyq mańyzy bar 24 myń shaqyrym jol jańartylady.

***

11:29 - QR Prezıdenti shaǵyn jáne orta bızneske qosymsha qoldaý sharalaryn jarııalady. Memleket basshysynyń atap ótýinshe, Ulttyq bank ekonomıkanyń barynsha zardap shekken salalaryndaǵy shaǵyn jáne orta bıznes úshin aınalym qarajatyn tolyqtyrý jónindegi arnaýly baǵdarlamany iske asyratyn bolady.

«Buǵan deıin ol óz áreketin osy jyly toqtady dep boljanǵan edi. Qazirgi daǵdarys jaǵdaıynda bul baǵdarlamanyń áreket etý merzimin 2021 jyldyń sońyna deıin uzartýdy jáne onyń qamtý aıasyn keńeıtýdi tapsyramyn. Buǵan qosa, baǵdarlamanyń jalpy kólemin 800 mlrd teńgege jetkize otyryp, oǵan qosymsha 200 mlrd teńge qarastyrǵan jón», - dedi Memleket basshysy.

11:26 - Prezıdent: Elektr energetıkasy, kásip saıasaty týraly birizdi zań jyl sońyna deıin ázirlenýge tıis.

***

11.26 - «Úkimetke bıznespen birlesip AÓK-tiń besjyldyq damýy jónindegi sapaly jańa ulttyq jobany ázirleýdi bastaýdy tapsyramyn. Bizdiń negizgi mindetimiz – áleýmettik mańyzy bar azyq-túlik taýarlaryn ózindik qamtamasyz etý», - dedi QR Prezıdenti.

***

11:25 - Prezıdent: Jerimiz sheteldikterge satylmaıdy.

***

11:19 «Qazaqstannyń aldynda turǵan asa mańyzdy mindet – ónerkásiptik áleýetimizdi tolyq paıdalaný. Osy saladaǵy tabystarymyzǵa qaramastan ishki naryqtarymyzdyń zor múmkindikterin áli de tolyqqandy júzege asyra almaı kelemiz», - dedi Prezıdent.

***

11:18 - 2021 jyldyń 1 shildesinen bastap faktorly-baldyq shkalany engizý kerek – Prezıdent.

***

11:17 - Uzaqqa sozylǵan munaı sýpertsıkli aıaqtalǵan tárizdi. Endi álemdik naryqtyń túbegeıli jańa konıýktýrasyna daıyn bolý kerek - Memleket basshysy.

***

11:17 - «Elimizdiń jańa ekonomıkalyq baǵyty 7 negizgi ustanymǵa negizdelýi qajet», - dedi Prezıdent.

Birinshi – ıgilikter men mindettemelerdi ádil bólý.

Ekinshi – jeke kásipkerliktiń jetekshi róli.

Úshinshi – adal básekelestik, kásipkerlerdiń jańa býyny úshin naryqty ashý.

Tórtinshi – ónimdilikti arttyrý, ekonomıkanyń kúrdeliligi men tehnologııalylyǵyn arttyrý.

Besinshi – adamı kapıtaldy damytý,bilim berýdiń jańa túrin ınvestıtsııalaý.

Altynshy – ekonomıkany «jasyldandyrý», qorshaǵan ortany qorǵaý.

Jetinshi – memlekettiń dáıekti, qısyndy sheshimder qabyldaýy jáne olar úshin qoǵam aldyndaǵy jaýapkershiligi.

***

11:17 - Prezıdent: Qazirgi ózgermeli álemde sheshim qabyldaýdyń baıaýlyǵy ulttyq qaýipsizdikke qater tóndiredi. Sondyqtan, quqyqtyq saıasat tujyrymdamasy aıasynda zańnamany ózgertý arqyly quqyqtyq reglamentteý deńgeıleri arasynda balansty qamtamasyz etý kerek. Muny keshiktirýge bolmaıdy!

***

11:16 - Sheneýnikterdi 25 paıyzǵa qysqartý maqsatyn 2021 jyly sheshemiz – Prezıdent.

***

11:15 - Memlekettik apparat pen kvazımemlekettik sektor qyzmetkerlerin qysqartý merzimin jeteldetýdi tapsyramyn – Memleket basshysy.

***

11:10 - Strategııalyq josparlaý jáne reformalar jónindegi agenttik qurý jóninde sheshim qabyldadym - Prezıdent.

***

11:10 - Prezıdent: Áleýmettik tólemderdy ındeksatsııalaý jumysy jalǵasyn tabady. Osy baǵytta 2023 jylǵa deıin shamamen 1 trln teńgeden astam qarjy bólý josparlanyp otyr.

***

11:09 - Qasym-Jomart Toqaev: Pandemııamen kúres jóninde keshendi baǵdarlama ázirlenedi. Memleket tarapynan áleýmettik saladaǵy jáne ekonomıkany qoldaýǵa baǵyttalǵan barlyq mindettemeler oryndalatyn bolady. Bul maqsatqa Ulttyq qordan 1 trln teńge bólinýde.

***

11:09 - Úkimet jiberilgen qatelikterden sabaq alyp, jumysty jedel jolǵa qoıa bildi - QR Prezıdenti.

***

11:07 - Prezıdent: Koronavırýspen kúreste dárigerlerge, quqyq qorǵaý organdarynyń qyzmetkerlerine, áskerı qyzmetshilerge, eriktilerge, kásipkerlerge jáne osyndaı jaǵdaıǵa beı-jaı qalmaǵan barlyq azamatqa shyn júrekten alǵys aıtamyn.

***

11.03 - Memlekettik Ánuran oınaldy.

***

11.02 - Memleket basshysy Qasym-Jomart Toqaev Parlamenttiń jańa sessııasyn ashty. «QR Konstıtýtsııasynyń 59-babyna sáıkes, 6-shy shaqyrylymdaǵy Parlamenttiń 6-shy sessııasyn ashyq dep jarııalaımyn», - dedi QR Prezıdenti.

11:00 - Parlament palatalarynyń birlesken otyrysy bastaldy. Májilis tóraǵasy Nurlan Nyǵmatýlın Memleket basshysyna sóz berdi.

***

Eske sala ketsek, QR Prezıdenti Qasym-Jomart Toqaev 2019 jyly 2 qyrkúıekte «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýyn jarııalaǵan bolatyn.


Joǵary qaraı