Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Reanımatsııaǵa túsip, qaıtys bolǵandardyń deni - der kezinde dárigerge qaralmaı, ózin-ózi emdegender

2021 jyldyń 22 shilde 2021 02:03

NUR-SULTAN. QazAqparat - Reanımatsııaǵa túsip, qaıtys bolǵan patsıentterdiń basym bóligi der kezinde dárigerge habar bermeı, ózin-ózi emdeýmen aınalysqan. 30 jyldyq tájirıbesi bar ınfektsıonıst dáriger, Nur-Sultan qalasynyń kópsalaly medıtsınalyq ortalyǵy dırektorynyń orynbasary Sáýle Atyǵaeva osylaı deıdi.

Dáriger ózin ózi emdeý qandaı jaǵdaıǵa jetkizetinin, reanımatsııalyq tósekterge kimder jıi túsetinin, al KVI-men aýyrǵanda aldymen ne isteý kerektigin jáne vaktsınatsııanyń mańyzyn tilge tıek etti .

Onyń aıtýynsha, ózin-ózi emdeýmen birneshe kún aınalysqan aýyr naýqastar ınfektsııalyq statsıonarlarǵa jatqyzylady.

«Internettegi aqparattar negizinde bıologııalyq qospalardy, shópterdi, ımmýnostımýlıatorlardy paıdalanyp emdeletinder bar. Olar antıkoagýlıanttardy birden qabyldap jatady. Ony paıdaly jáne ımmýndyq júıeni nyǵaıtady dep sanaıdy. Degenmen bul úıde emdelýdiń eń tıimsiz jáne eń saýatsyz tásili. Mamandandyrylǵan medıtsınalyq kómekke júginbeýi arqyly óz densaýlyǵyna zııan keltiredi. Koronavırýstyń óte qaýipti ekenin túsinýimiz kerek. Al mýtatsııalanǵan «Delta» shtammy tipten juqpaly. ıAǵnı, óziń ǵana emes jaqyndaryńnyń da reanımatsııaǵa túsýine sebep bolýyń múmkin», - deıdi Sáýle Atyǵaeva.

Dáriger naýqastar aýrý dendep ketken kezde medıtsınalyq kómekke júginetinin atap ótti.

«Joǵary temperatýra, entigý, dem ala almaý sekildi belgileri shyqqanda ǵana dárigerlerge habar beredi. Ókinishtisi, altyn ýaqytyn ózin-ózi emdeımin dep joǵaltady. Qansha degenmen statsıonarlyq emdeý men reanımatsııaǵa jetkizbeıtin ýaqyty boldy emes pe?!» - deıdi ol.

Mamannyń aıtýynsha, naýqastardyń basym bóligi aýyr jaǵdaıda kelip, tynys alý apparatyn qoldanady.

«Ókinishke qaraı, ózin-ózi emdeýden keıin bári birdeı aman qala bermeıdi. Biz ýaqyt joǵaltamyz, saldarynan naýqastardy aman alyp qalý múmkin bolmaı jatady. Reanımatsııaǵa túsip, qaıtys bolǵan patsıentterdiń basym bóligi der kezinde dárigerge habar bermeı, ózin-ózi emdeýmen aınalysqan. Al aıryqsha aıta keterligi, bul naýqastar vaktsınatsııalanbaǵan! Vaktsınany tolyǵymen alyp, reanımatsııa tóseginde jatqan birde-bir naýqas bolǵan joq. Sebebi biz biletindeı, vaktsınatsııa koronavırýstyń aýyr túrinen qorǵaıdy. Al reanımatsııada jatqan naýqastar ýaqytynda vaktsınatsııalanbaǵanyna ókinip jatady», - deıdi S. Atyǵaeva.


Joǵary qaraı